އުމުރުން ދުވަސްވީ މީހުންގެ ހައްގުތައް ރައްކާތެރިކުރުމަށް އަޒުމް ކަނޑައަޅަންޖެހޭ: މެޑަމް ސާޖިދާ

އުމުރުން ދުވަސްވީ މީހުންގެ ޙައްޤުތައް ފުރިހަމައަށް ރައްކާތެރިކޮށްދީ، އެ ފަރާތްތަކުގެ ދުޅަހެޔޮކަން ކަށަވަރުކުރުމަށް އެންމެން ގުޅިގެން އަޒުމް ކަނޑައަޅަންޖެހޭ ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.

ބައިނަލްއަގްވާމީ ގޮތުން ފާހަގަކުރާ އުމުރުން ދުވަސްވީ މީހުންގެ ދުވަހުގެ މުނާސަބަތުގައި ސޯޝަލް މީޑިއާ މެދުވެރިކުރައްވައި ހިއްސާކުރެއްވި މެސެޖެއްގައި މެޑަމް ސާޖިދާ ވިދާޅުވީ، އުމުރުން ދުވަސްވީ ފަރާތްތަކަކީ މުޖުތަމަޢުގެ އަގުހުރި އާދަކާދަތައް ދަމަހައްޓައި، ޖީލުން ޖީލަށް ޢިލްމާއި ޙިކުމަތް ފޯރުކޮށްދެއްވާ މުހިންމު ބަޔެއް ކަމަށެވެ. އެހެންކަމުން، އެ ފަރާތްތަކުން ޤައުމަށާއި މުޖުތަމަޢަށް ކޮށްދެއްވާފައިވާ އަދި ކޮށްދެއްވަމުން ގެންދަވާ އަގުނުކުރެވޭ ފަދަ ހިދުމަތްތައް ބަލައިގަނެ، އެ ހިދުމަތްތަކުގެ އަގުވަޒަންކުރުމާއެކު، އެބޭފުޅުންގެ ޙައްގުތަކާއި ދުޅަހެޔޮކަން ކަށަވަރުކުރުމަކީ މުހިންމު ކަމެއްކަން އެކަމަނާ ވިދާޅުވިއެވެ.

މީގެއިތުރުން، ދުޅަހެޔޮކަމާއެކު ދޮށީ އުމުރަށް ވާސިލުވުމަށް މަގުފަހިކުރުމަށްޓަކައި ދާއިމީ އިންވެސްޓްމަންޓްތަކާއި، ހަރުދަނާ ސިއްހީ ނިޒާމަކާއި، އިޖުތިމާޢީ ރައްކާތެރިކަމުގެ އިތުރުން އިގްތިސާދީ ފުރުސަތުތައް ފަހިވާނޭހެން ސިޔާސަތުތައް ބައްޓަންކުރުމުގެ މުހިންމުކަމަށްވެސް އެކަމަނާ އަލިއަޅުއްވާލެއްވިއެވެ.

ގައުމީ ތަރައްގީގެ މަރުޙަލާތަކުގައި ދޮށީ އުމުރުގެ ބޭފުޅުންގެ ފުރިހަމަ ބައިވެރިވުން ޔަޤީންކުރުމަކީ، އެންމެންގެ ހިއްސާ އޮންނަ، އޯގާތެރި އަދި އެކުވެރި މުޖުތަމަޢެއް ބިނާކުރުމަށް ކޮންމެހެން ބޭނުންތެރި ކަމެއް ކަމުގައިވެސް ރައީސުލްޖުމްހޫރިއްޔާގެ އަނބިކަނބަލުން ވިދާޅުވިއެވެ.