ކައުންސިލަރުން ޕާޓް ޓައިމް ކުރަން އެމްޑީޕީގެ ކޮންގްރެސްއަށް ހުށަހެޅި ކަރުދާހަށް ދެކޮޅު ހަދަނީ

ކައުންސިލްތަކުގެ ރައީސާއި ނައިބު ރައީސް ފިޔަވައި އެހެން މެންބަރުންނަކީ ޕާޓް ޓައިމް ބައެއްގެ ގޮތުގައި ހަމަޖެއްސުމަށް މައި އިދިކޮޅު ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ 5 ވަނަ ކޮންގްރެސްއަށް ހުށަހެޅި ސިޔާސަތު ކަރުދާހަށް ކޮންގްރެސްގެ ގިނަ މަންދޫބުންތަކެއް ދެކޮޅު ހަދައި، ކަންބޮޑުވުން ފާޅުކުރަން ފަށައިފިއެވެ.

މިހާރު ކުރިއަށްދާ އެމްޑީޕީގެ ކޮންގްރެސްގައި ލާމަރުކަޒީ ނިޒާމު ހަރުދަނާކުރުމުގެ ނަމުގައި ހުށަހެޅި މި ކަރުދާހުގެ ބަހުސް މަރުހަލާގައި ވާހަކަދެއްކެވި ގިނަ މަންދޫބުން ވަނީ ކައުންސިލްތަކުގެ އާންމު މެންބަރުން ޕާޓް ޓައިމް ބަޔަކަށް ބަދަލުކުރުމަކީ ލާމަރުކަޒީ ނިޒާމުގެ އަސްލު މަގުސަދު ގެއްލި، ރައްޔިތުންނަށް ދޭންޖެހޭ ޚިދުމަތްތަކަށް ބޮޑެތި ހުރަސްތަކެއް އެޅިގެންދާނެ ކަމެއް ކަމަށް ބުނެފައެވެ.

މި ބަހުސްގައި ވާހަކަދައްކަވަމުން އެމްޑީޕީގެ ކުރީގެ ޗެއާޕާސަން އަދި ކުރީގެ ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވީ، މީގެ ކުރިން އަންހެނުންގެ ތަރައްގީއަށް މަސައްކަތްކުރާ ކޮމިޓީތައް ވެސް ޕާޓް ޓައިމްކޮށް ހިންގަން އުޅުމުން އެކަން އެންމެ އެދެވޭ ގޮތުގައި ކުރިއަށް ނުދިޔަ ކަމަށެވެ. އަދި އެ ކޮމިޓީތަކުގެ މަސައްކަތްތައް ރަނގަޅަށް ހިނގައިގަތީ ފުލްޓައިމް ބަޔަކަށް ބަދަލުކޮށް، އެކަށީގެންވާ އުޖޫރައެއް ކަނޑައެޅުމުން ކަން އޭނާ ފާހަގަކުރެއްވިއެވެ. އެހެންކަމުން ކައުންސިލަރުން ޕާޓް ޓައިމް ކުރުމަކީ ފަހަތަށް އެޅޭ ފިޔަވަޅެއް ކަމަށް މާރިޔާ ވިދާޅުވިއެވެ.

މީގެ އިތުރުން، ކުޅުދުއްފުށީ ސިޓީގެ ޑެޕިއުޓީ މޭޔަރު އަހްމަދު އަބްދުﷲ ވިދާޅުވީ، ކައުންސިލަރުން ޕާޓް ޓައިމްކޮށް ތިބުމުން ރައްޔިތުންގެ ކަންކަމާ މަޝްވަރާކުރުމަށާއި، ރަށުގެ ތަރައްގީގެ ކަންކަން ގާތުން ބެލެހެއްޓުމަށް އެކަށީގެންވާ ވަގުތު ނުލިބޭނެ ކަމަށެވެ. އަދި ލާމަރުކަޒީ ނިޒާމު ހިންގުމުގައި ކައުންސިލްގެ ހުރިހާ މެންބަރުންގެ ފުރިހަމަ ބައިވެރިވުން މުހިންމު ދައުރެއް އަދާކުރާ ކަމަށް ވެސް އޭނާ ވިދާޅުވިއެވެ.

ދިވެހިރާއްޖޭގެ ލާމަރުކަޒީ ނިޒާމަކީ އެމްޑީޕީގެ މައިގަނޑު އެއް އަސާސް ކަމަށްވާއިރު، ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ވަނީ ލާމަރުކަޒީ ގާނޫނަށް ބޮޑެތި އިސްލާހުތަކެއް ގެނެސް، ކައުންސިލްތަކަށް މާލީ އަދި އިދާރީ ބޮޑެތި ބާރުތަކެއް ދީފައެވެ. ނަމަވެސް، މިހާރުގެ ސަރުކާރުންނާއި ބައެއް ސިޔާސީ ފަރާތްތަކުން ކައުންސިލްތަކުގެ ޚަރަދު ކުޑަކުރުމުގެ ވާހަކަތައް ދައްކަމުންދާ ދަނޑިވަޅެއްގައި، އެމްޑީޕީގެ އެތެރޭގައި މިފަދަ ބަހުސެއް އުފެދިގެން ދިއުމަކީ އެ ޕާޓީގެ ސިޔާސަތުތަކަށް އަންނަމުންދާ ބަދަލުތައް ހާމަވާ ކަމެކެވެ.