2028 ގައި އެކުލަވާލާ ސަރުކާރަކުން ރާއްޖެއަށް ބޮޑު ބަދަލެއް ގެންނާނަން: ޝިއްޕެ

2028 ވަނަ އަހަރު އުފެދޭ އެމްޑީޕީގެ ސަރުކާރެއްގައި ތިބެގެން ރާއްޖެއަށް ބޮޑު ބަދަލެއް ގެނެސްދޭނެ ކަމަށާއި، އަދި މިއަދުން ފެށިގެން މަގުމައްޗަށް ނުކުމެ ވަކާލާތުކޮށްގެން މިހާރުގެ ސަރުކާރަށް މަޖުބޫރު ކުރުވައިގެން ވެސް އެ ބަދަލުތައް ގެނެވޭނެ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޑެޕިއުޓީ ޗެއަރޕާސަން މުހައްމަދު ޝިފާޒް (ޝިއްޕެ) މިއަދު ވިދާޅުވެއްޖެއެވެ.

މިހާރު ކުރިއަށްދާ އެމްޑީޕީގެ 5 ވަނަ ކޮންގްރެސްގެ ތެރެއިން ވާހަކަދައްކަވަމުން ޝިއްޕެ ވިދާޅުވީ، ކުރީގައި އެމްޑީޕީން ބަދަލުތައް ގެނައީ މަގުމަތީގައި މުޒާހަރާކޮށްގެން ކަމަށެވެ. އެހެންނަމަވެސް، ކުރިއަށް އޮތް ތަނުގައި މި ސަރުކާރަށް މަޖުބޫރުކޮށްގެން އެމްޑީޕީގެ ސިޔާސަތުތަކާ އެއްގޮތަށް ބަދަލު ގެނެވިއްޖެނަމަ އެއީ ވެސް ލިބޭނެ ވަރަށް ބޮޑު ކުރިއެރުމެއް ކަމަށް އޭނާ ފާހަގަކުރެއްވިއެވެ.

"އިރާދަކުރެއްވިއްޔާ މީ 2028 ގައި ބަދަލުކުރާ ސަރުކާރުގައި އަޅުގަނޑުމެން ތިބެގެން މިކަން ކުރާނީ. އަދި ވަރަށް ބޮޑަށް ރަނގަޅަށް އަޅުގަނޑުމެން މިއަދުން ފެށިގެންވެސް މަގުމައްޗަށް ނުކުމެ، މި ބަދަލު މި ސަރުކާރުންވެސް އަޅުގަނޑުމެންނަށް ގެނެސްދެވޭނެ،" ޝިއްޕެ ވިދާޅުވިއެވެ.

ޝިއްޕެ ވިދާޅުވީ އެމްޑީޕީގެ ސިޔާސަތެއްގެ ގޮތުގައި "ބޮޑު ބަދަލު" ކަނޑައެޅޭ ދުވަހުން ފެށިގެން، ޕާޓީ ކުރިއަށްދާނީ އެ ސިޔާސަތުގެ މަތީގައި ކަމަށެވެ. އަދި ކޮންގްރެސްއިން އެ ކަރުދާސް ފާސްކުރާނެ ކަމަށް އުއްމީދުކުރައްވާ ކަމަށާއި، ބިރުން ފަހަތަށް ނުޖެހި މާދަމައަށް ތައްޔާރުވާންޖެހޭ ކަމަށް ވިދާޅުވިއެވެ.

ތާރީޚަށް އަލިއަޅުއްވާލައްވަމުން ޝިއްޕެ ވިދާޅުވީ ރައީސް މައުމޫނުގެ ވެރިކަމުގެ ފަހުކޮޅު އެމްޑީޕީން ކުރި މަސައްކަތަކީ ވެސް ބޮޑު ބަދަލެއް ކަމަށާއި، އޭރު އާ ޤާނޫނުއަސާސީއެއް ހޯދީ މުޒާހަރާ ކޮށްގެން ކަމަށެވެ. އަދި އޭރު ރައްޔިތުން ގަބޫލުނުކުރި ނަމަވެސް، ހިލޭ ޑިގްރީއަށް ކިޔެވުމާއި، އާސަންދައިގެ ޚިދުމަތާއި، ރަށްރަށުގައި ބަނދަރާއި ނަރުދަމާ އަދި ފެނުގެ ނިޒާމު ގާއިމުކުރުން ފަދަ އެތައް ކަމެއް އެމްޑީޕީން ހަގީގަތަކަށް ހަދައިދީފައިވާ ކަމަށް އޭނާ ވިދާޅުވިއެވެ. މީގެއިތުރުން ލާމަރުކަޒީ ނިޒާމާއި ޖަލުތަކުގެ އަނިޔާ ހުއްޓުވުމަށް ވެސް އެންމެ ބޮޑު މަސައްކަތެއް ކުރީ އެމްޑީޕީން ކަން ފާހަގަކުރެއްވިއެވެ.

"މި ޕާޓީއަށް ވާ ގޮތަށް މި ދައުލަތަށް ވާނީ. ރާއްޖެއަށް ވާނީ. އެމްޑީޕީގެ އެތެރޭގެ ހިންގުމާ، އެމްޑީޕީ ބައްޓަންކުރާ ގޮތަކަށް މި ރާއްޖެ ބައްޓަންވާނެ،" ޝިއްޕެ ވިދާޅުވިއެވެ.

އޭނާ އިތުރަށް ވިދާޅުވީ ވިހި އަހަރު ފަހުން މިއަދު އަނެއްކާވެސް ރާއްޖެ ބަދަލުކުރަން ޖެހިފައިވާ ކަމަށާއި، ޕާޓީގެ ޗެއަރޕާސަން ފައްޔާޒް އިސްމާއިލް ހުށަހެޅުއްވި "ބޮޑު ބަދަލު"ގެ ސިޔާސަތަށް އެއްވެސް މެމްބަރަކު ޖެހިލުންވެ ބިރުގަންނަން ނުޖެހޭނެ ކަމަށެވެ. އަދި ރާއްޖެއަށް ބޭނުންވާ ބަދަލު ގެނެވޭނީ ހަމައެކަނި އެމްޑީޕީއަށް ކަމުގެ ފުރިހަމަ ޔަގީންކަން އެބައޮތް ކަމަށް ވެސް ޝިއްޕެ ވިދާޅުވިއެވެ.