ރާއްޖެއަންނަން އޮތް ގިނަ ފްލައިޓްތަކެއް ކެންސަލް ކޮށްފި

މިއަދު ރާއްޖެއަންނަން އޮތް ގިނަ ފްލައިޓްތަކެއް ކެންސަލް ކޮށްފިއެވެ.

މިއަދު އެކަނިވެސް ރާއްޖެ އަންނަން އޮތް 18 ފްލައިޓެއް ކެންސަލްވެފައިވާއިރު، މީގެ ތެރޭގައި މެދުއިރުމަތީގެ މައި މަންޒިލްތައް ކަމަށްވާ އަބޫދާބީ، ދުބާއީ، ޝާރްޖާހް، ދޯހާ އަދި ބަހްރެއިން އިން ރާއްޖެއަށް އަންނަން އޮތް ދަތުރުތައް ހިމެނެއެވެ.

މީގެ އިތުރުން ކޮލަމްބޯ މަގުން ރާއްޖެ އަންނަން އޮތް ފްލައި ދުބާއީ، ގަލްފް އެއާ އަދި އެމިރޭޓްސްގެ ފްލައިޓްތައް ވެސް ވަނީ ކެންސަލްވެފައެވެ.

މި ދަތުރުތައް މެދުކަނޑާލަން ޖެހުމުގެ ސަބަބުން އިއްތިހާދު އެއާވޭސް، ގަތަރު އެއާވޭސް އަދި އެއާ އަރަބިއްޔާ ފަދަ ބޮޑެތި އެއާލައިންތަކުގެ ޝެޑިއުލްތަކަށް ވަނީ ބުރޫއަރާފައެވެ. ފްލައިޓްތައް ކެންސަލްކުރަން ޖެހުނީ މެދުއިރުމަތީގައި މިހާރު ހިނގަމުންދާ ހަނގުރާމައިގެ ސަބަބުން، އެ ސަރަހައްދުގެ ގިނަ ގައުމުތަކަކުން މަދަނީ އުދުހުންތަކަށް ވައިގެ ސަރަހައްދު ބަންދުކުރުމާ ގުޅިގެން، ސަލާމަތީ ގޮތުން ދަތުރުކުރެވެން ނެތުމުންނެވެ.

މެދުއިރުމަތީގެ ހަނގުރާމަ އާއި ގުޅިގެން ގިނަ އެއަރލައިންތަކުގެ ދަތުރުތައް ކެންސަލް ކޮށްފައިވާއިރު ދިވެހިރާއްޖޭގެ ސަރުކާރުން ދަނީ ރާއްޖެއިން ނުފުރި ތިބި ފަތުރުވެރިން އަނބުރާ ގައުމުތަކަށް ފޮނުވުމަށް ކުރަންޖެހޭ މަސައްކަތްތައް ކަމާއި ބެހޭ ވުޒާރާތަކާއި ގުޅިގެން ކުރަމުންނެވެ.