މިސަރުކާރު ހުދުމުހުތާރުނަމަ ސިޔާސީ ވެރިން މިއަދު ތިބޭނީ ޖަލުގައި: ރައީސް

މިސަރުކާރު ހުދުމުހުތާރުނަމަ ސިޔާސީ ވެރިން މިއަދު ތިބޭނީ ޖަލުގައި ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ހުދުމުހުތާރު ކަމަށް ބުނެވޭނީ ކުރީގެ ސަރުކާރުތަކާއި ދިމާލަށް ކަމަށެވެ. މިސަރުކާރާއި ދިމާލަށް ހުދުމުހުތާރު ކަމަށް ނުބުނެވޭނެ ކަމަށް ރައީސް ވިދާޅުވިއެވެ.

މިސަރުކާރުން ހުދުމުހުތާރު ނަމަ އިދިކޮޅު ޕާޓީތަކަށް އެއްވެ ނޫޅެވުނީސް ކަމަށާއި އެއްވެ އުޅެވޭނީ ހަމައެކަނި ކާނިވާ ސަރަހައްދުގައި ކަމަށް ރައީސް ވިދާޅުވިއެވެ.

މިސަރުކާރުން ހުދުމުހުތާރު ނަމަ ސިޔާސީ ކުށްވެރިން ޖަލުގައި ތިބޭނެ ކަަން ފާހަގަކޮށް ރައީސް ވިދާޅުވީ މިއަދު ސިޔާސީ ކުށްވެރިން ޖަލުގައި ނެތް ކަމަށެވެ.

ދެއިންތިހާބު އެއްކޮށްލުމަކީ ހުދުމުހުތާރު ވެރިކަމެއް ކުރަން މަސައްކަތް ކުރުން ކަމަށް އިދިކޮޅުން ބުނަމުންދާތީ ރައީސް ވިދާޅުވީ ދެ އިންތިހާބު އެކުގައި ބޭއްވުމުން ވޯޓްލާން ނިކުންނަ މީހުންގެ އަދަދު އިތުރުވެގެންދާނެ ކަމަށެވެ.

ރިޔާސީ އިންތިހާބުގެ ދެވަނަ ބުރެއް ނުބާއްވަން ނިންމާފައިނުވާނެ ކަމަށާއި އަދި އެކަމުގެ މަޝްވަރާތައް ކުރިއަށްދާ ކަމަށް ރައީސް ވިދާޅުވިއެވެ.

ރިޔާސީ އިންތިހާބާއި މަޖިލިސް އިންތިހާބު އެކުއެކީގައި ބޭއްވުމުން ދައުލަތުގެ ބަޖެޓުން ބޮޑު އަދަދެއް ސަލާމަތްވާނެ ކަމަށް ރައީސް ވިދާޅުވިއެވެ.

ފެންނަ ނުފެންނަ ވޯޓް ލޯކަލް ކައުންސިލް ވޯޓާއި އެކު ނަގަނީ ހަރަދުކުޑަ ކުރުމުގެ ގޮތުން ކަމަށް ރައީސް ވިދާޅުވިއެވެ.

ދެ އިންތިހާބު އެކުގައި ބޭއްވުމަކީ އެކަމުގެ ސަބަބުން ރައްޔިތުންނަށް ފައިދާކުރާނެ ކަމެއް ކަމަް ރައީސް ވިދާޅުވިއެވެ.