އިސްރާއީލުން ގްލޯބަލް ސުމޫދު ފްލޮޓިލާ ހިސާރުކުރުން، ރައީސް ކުށްވެރިކުރައްވައިފި

ގްލޯބަލް ސުމުދް ފްލޮޓިލާ، އިސްރާއީލުުން ހިފަހައްޓައި ޙިސާރުކުރުން ރައީސް ޑރ. މުޙައްމަދު މުޢިއްޒު ކުށްވެރިކުރައްވައިފިއެވެ.

ބައިނަލްއަޤްވާމީ ކަނޑުގެ ސަރަހައްދުގައި އިސްރާއީލުން ގްލޯބަލް ސުމޫދު ފްލޮޓިލާ ހުއްޓުވުން، ހަތިޔާރު ނެތް މަދަނީ އުޅަނދުތަކުން ޣައްޒާއަށް މުހިއްމު އިންސާނީ އެހީތައް ގެންދާކަން ވަރަށް ބޮޑަށް ކުށްވެރިކުރާ ކަމަށް ރައީސް ޑރ މުއިއްޒުގެ އެކްސް ޕޯސްޓްގައި ވަނީ ވިދާޅުވެފައެވެ.

މިފަދަ ބިރުދެއްކުމުގެ އަމަލުތަކަކީ ބަލައިގަނެވޭނެ ކަމެއް ނޫން ކަމަށާއި މިނިވަންކަމާއި އަސާސީ ޒަރޫރީ ބޭނުންތައް ގެއްލިފައިވާ މީހުންނަށް އެހީ ފޯރުކޮށްދޭ އިންސާނީ އެފަދަ ފަރާތްތަކަށް ހަމަލާ ދިނުމަކީ އިންސާނީ ހައްގުތަކާއި ބައިނަލްއަގުވާމީ ގާނޫނުތަކާ ވަރަށް ބޮޑަށް ހިލާފު އަމަލެއް ކަމަށް ރައީސް ވަނީ ވިދާޅުވެފައެވެ.

އިންސާނީ ކަރާމާތަށް ތަކުރާރުކޮށް ފަރުވާކުޑަކުރުމުގެ ތެރެއިން، ރަޙްމަތެއްވެސް އަދި އޯގާތެރިކަމެއްވެސް ނުދައްކާ، އިސްރާއީލުން ވަނީ ދުނިޔޭގެ އެހެން ޤައުމުތަކާ އިތުރަށް އެކަހެރިވެފައި ކަމަށް ރައީސް ގެ ޕޯސްޓްގައި ވިދާޅުވެފައިވެއެވެ.

އިންސާނިއްޔަތުން ހިއްސާކުރާ އަޚްލާޤީ ސަމުގާއަށް ވުރެ މާ ބޮޑަށް ކުރިއަށްދާ ބައިނަލްއަޤްވާމީ ޤާނޫނުތަކާ ދެކޮޅަށް އިސްރާއީލުން ބޮޑެތި އަދި ތަކުރާރުކޮށް ހިލާފުވުމާ ދެކޮޅަށް ނިންމާ ފިޔަވަޅުތައް އެޅުމަށް ބައިނަލްއަގްވާމީ މުޖުތަމަޢަށް ރައީސް ވަނީ ގޮވާލައްވާފައެވެ.

އިންސާނީ ހައްގާއި، އިންސާފާއި، ސުލްހައާއި، ސަލާމަތަށްޓަކައި ފަލަސްތީނުގެ ރައްޔިތުން ކުރަމުންދާ އިންސާފުވެރި މަސައްކަތުގައި ރާއްޖެއިން ކޮޅަށް ތެދުވަނީ ފަސްނުޖެހޭ އެއްބައިވަންތަކަމެއްގައި ކަމަށް ރައީސް ވިދާޅުވެފައިވެއެވެ.

ގްލޯބަލް ސުމޫދު ފްލޮޓިލާ މޫވްމަންޓަށް އިސްރާއީލުން ހުރަސް އަޅަމުންދާ ދިޔުން ކުށްވެރިކޮށް އެ މައްސަލަ ސަރުކާރުގެ ސަމާލު ކަމަށް ގެނައުމަށް ރައްޔިތުންގެ މަޖިލީހަށް ކުއްލި މައްސަލައެއް ވެސް ވަނީ ހުށަހަޅާފައެވެ.