އެމްއެމްއޭގެ ރިސާޗް ކޮންފަރެންސްގެ ކަރުދާސްތައް އިވެލުއޭޓްކުރާނެ ފަރާތްތައް ހޯދަނީ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކުރާ ރިސާޗް ކޮންފަރެންސަށް ހުށަހެޅޭ ދިރާސީ ކަރުދާސްތައް އިވެލުއޭޓްކުރުމަށް އެކުލަވާލާ ޕިއަރ ރިވިއު ޕޫލް ގައި ބައިވެރިވުމުގެ ފުރުސަތު މިއަދު ހުޅުވާލައިފިއެވެ.

މި ޕޫލުގައި ހިމެނުމަށް ހަމަޖެހިފައިވަނީ ތަޢުލީމީ އަދި ދިރާސީ ދާއިރާގެ ބޭފުޅުންނާއި، ކަމާގުޅޭ އެކި ފަންނުތަކުގެ މާހިރުންނެވެ.

މި ޕޫލަށް ހޮވޭ ފަރާތްތަކުގެ މައިގަނޑު މަސްއޫލިއްޔަތަކީ ކޮންފަރެންސަށް ހުށަހެޅޭ ކަރުދާސްތަކުގެ ފަންނީ ފެންވަރާއި، މަޢުލޫމާތުގެ ސައްހަކަމާއި ، އަދި ދިރާސާގެ މުހިންމުކަމުގެ މައްޗަށް ބިނާކޮށް މިނިވަން، އިލްމީ އަދި ބިނާކުރަނިވި ޚިޔާލު ފޯރުކޮށްދިނުމެވެ.

މި ފުރުސަތު ހުޅުވާލެވިފައިވަނީ ކަމާގުޅޭ އެކި ދާއިރާތަކުން ފަންނީ ތަޖުރިބާ ލިބިފައިވާ ފަރާތްތަކަށެވެ.

މީގެ ތެރޭގައި މެކްރޯ އިކޮނޮމިކްސް، މަނިޓަރީ އިކޮނޮމިކްސް، އިސްލާމިކް ފައިނޭންސް، ޕަބްލިކް ފައިނޭންސް، ފަތުރުވެރިކަން، ބައިނަލްއަޤުވާމީ ވިޔަފާރި، ޑިޖިޓަލް ފައިނޭންސް އަދި މި ކޮންފަރެންސާ ގުޅުންހުރި އެހެނިހެން ދާއިރާތަކުގެ ތަޖުރިބާކާރުން ހިމެނެއެވެ.

މި ކޮންފަރެންސަށް ހުށަހެޅޭ ކަރުދާސްތައް ދިރާސާކުރުމަށް ހަމަޖެހިފައިވަނީ ޑަބަލް-ބްލައިންޑް ޕިއަރ ރިވިއު އުސޫލުންނެވެ. އެހެންކަމުން، ރިވިއުކުރާ ފަރާތާއި ދިރާސާ ހުށަހަޅާ ފަރާތުގެ މަޢުލޫމާތު ދެފަރާތަށްވެސް ސިއްރުކުރެވޭނެއެވެ.

އެމްއެމްއޭގެ ޕިއަރ ރިވިއު ޕޫލުގައި ބައިވެރިވެ، ކަނޑައެޅިފައިވާ އުޞޫލުތަކާ އެއްގޮތަށް މަސައްކަތް ފުރިހަމަކުރާ ފަރާތްތަކަށް ސެޓްފިކެޓާއި، އުޖޫރައިގެ އިތުރުން އެހެނިހެން ފުރުޞަތުތައްވެސް ލިބިގެންދާނެއެވެ.

މި ޕޫލުގައި ރިވިއުއަރއެއްގެ ގޮތުގައި ބައިވެރިވާން އެދޭ ފަރާތްތަކުން، ރިސާޗް ކޮންފަރެންސްގެ ވެބްސައިޓުގައިވާ ހާއްސަ ފޯމު މެދުވެރިކޮށް އެޕްލިކޭޝަން ހުށަހެޅުމުގެ ފުރުސަތު މިހާރު ވަނީ ހުޅުވާލެވިފައެވެ.

އެޕްލިކޭޝަން ހުށަހެޅުމުގެ ސުންގަޑިއަކީ 27 ސެޕްޓެންބަރު 2026އެވެ.

ތިންވަނަ އެމްއެމްއޭ ރިސާޗް ކޮންފަރެންސް 2026 ކުރިއަށް ދާނީ ޑިސެމްބަރު މަހުގެ 5 އިން 7 އަށެވެ.