ޣައްޒާގައި އާންމުން ރައްކާތެރިކަން ހޯދާނެ އެއްވެސް ސަރަހައްދެއް މިހާރު ނެތްކަމަށް އދއިން ބުނެފިއެވެ.
ފަލަސްތީނުގެ ރެފިއުޖީންނާބެހޭ އދގެ އޭޖެންސީން މިއަދު ބުނީ، އާންމުން ތިބޭ ސަރަހައްދުތައް ދޫކޮށް ދިއުމަށް އިސްރާއީލުގެ އަސްކަރިއްޔާއިން ތަކުރާރުކޮށް އަމުރު ކުރަމުން ގެންދާ ކަމަށާއި، އާންމުން ރައްކާތެރިކަން ހޯދަންދާނެ ވަކި ރައްކާތެރިތަނެއް މިހާރު ނެތް ކަމަށެވެ.
އދގެ އޭޖެންސީންވަނީ، ހަނގުރާމަ ހުއްޓާލުމަށް އެ އޭޖެންސީން ގޮވާލާ ގޮވާލުން މިއަދުވެސް ތަކުރާރު ކޮށްފައެވެ.
ޣައްޒާގެ އުތުރުން، ޝައިޚް ޒައިދު ސަރަހައްދުގައި ރައްކާތެރިކަން ހޯދައިގެން ތިބި އާންމުން އެ ސަރަހައްދު ދޫކޮށް ދިއުމަށް އިސްރާއީލު ސިފައިން އަމުރު ކުރަމުން އެބަގެންދެއެވެ. އަދި ޣައްޒާގެ އެހެން ހިސާބުތަކުންވެސް އާންމުން ދުރަށް ދިއުމަށް އަމުރު ކުރަމުން އެބަގެންދެއެވެ.
ޣައްޒާގައި، ގެދޮރުގެއްލި މަގުމަތިވެފައިވާ މީހުންގެ ތެރެއިން ގާތްގަނޑަކަށް މިލިއަނަކަށްވުރެ ގިނަމީހުން މިހާރު ތޮއްޖެހި، ވަރަށް ދަތި ހާލުގައި އުޅެމުންދަނީ ޚާން ޔޫނިސްގެ އަލްމަވާސީޫ ސަރަހައްދުގައެވެ.
ޣައްޒާގެ އުތުރާއި، ޣައްޒާގެ މެދުތެރެއާއި އަދި ޣައްޒާ ދެކުނުގެ އެކި ހިސާބުތަކުން އާންމުން ފައްސަމުން ފައްސަމުން ގޮސް، ގިނަމީހުން މިހާރުތިބީ މުޅި ޣައްޒާގެ 15 އިންސައްތަ ވަރުގެ ކުޑަ ސަރަހައްދަކަށް ތޮއްޖައްސާފައި ކަމަށް ފަލަސްތީނިއަން ސިވިލް ޑިފެންސުން ބުނެފައި ވެއެވެ.
އާންމުން ޖަމާވެފައިތިބި ސަރަހައްދުތަކުގައި ހޮސްޕިޓަލްތަކެއް ނެތް ކަމަށާއި، ވަށައިގެން ހުރި މަގުތައްވެސް އިސްރާއީލުގެ އުދުވާނީ ސިފައިން ބަންދުކޮށްފައި ވުމުން، އާންމުންނަށް އެހީވާން ދެވޭނޭ ގޮތެއްވެސް ނެތްކަމަށް ސިވިލް ޑިފެންސުން ބުނެއެވެ.
އިސްތިއުމާރީ ސިފައިން މިއަދު ޣައްޒާގެ ދެކުނުން ޚާން ޔޫނިސްއަށާއި، ޣައްޒާގެ މެދުތެރެއިން ދީރުލް ބަލާހަށާއި، ޣައްޒާގެ އުތުރުން ސަބްރާއަށާއި، ޖަބަލިއާ ރެފިއުޖީ ކޭމްޕަށްވެސް ބޮމާއި މިސައިލުން ހަމަލާދީފައެވެ.
ދީރުލް ބަލާހަށް ދިން ހަމަލާތަކުގައި އެއް އާއިލާއެއްގެ 8 މެމްބަރުން ޝަހީދުވިއެވެ. އިސްރާއީލު ޓެރަރިސްޓުން މިސައިލް ވައްޓާލީ އާއިލާ އެންމެން ނިދަންތިބި ގޭގެ މައްޗަށް ކަމަށާއި، ހަމަލާގައި މުޅި ގެ ބިމާހަމަވި ކަމަށް ރިޕޯޓްތައް ބުނެއެވެ.
މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން އިސްތިއުމާރީ އިސްރާއީލުން ޣައްޒާއަށް ދެމުންގެންދާ އުދުވާނީ ހަމަލާތަކުގައި މިހާތަނަށް 40،099 މީހުން ޝަހީދުވެ، 92،609 މީހުން ޒަޚަމް ކޮށްލާފައި ވެއެވެ.
ހަނގުރާމަ ހުއްޓާލުމުގެ ވާހަކަތައް ގަތަރުގައި ކުރިއަށްދާއިރު، ހަނގުރާމަ ހުއްޓާލަފާނެ ކަމުގެ ނިޝާނެއް ވާހަކަތަކުން އަދިއެއް ނުފެނެއެވެ.
