ޕްރިވެންޓިވް ހެލްތު ކެއަރއަށް ސަރުކާރުން ޚާއްސަ އިސްކަމެއް ދޭނެ: ރައީސް

ޕްރިވެންޓިވެ ހެލްތް ކެއަރއަށް މި ސަރުކާރުން ވަރަށް ބޮޑު އިސްކަމެއްދޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރައްޔިތުންނާ ވީހާވެސް ގާތުން މަޢުލޫމާތު ޙިއްޞާކުރައްވައި، ރައްޔިތުންގެ ޚިޔާލުތަކާއި ކަންބޮޑުވުންތައް އަޑުއައްސަވައި، ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައްޔިތުންނާ އެކު" ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި ވާހަކަފުޅު ދައްކަވަމުންނެވެ.

އެމަނިކުފާމި ވިދާޅުވީ، ބަލިޖެހުމުގެކުރިން އަޅަންޖެހޭ ފިޔަވަޅުތައް އެޅުމަށް "އިންވެސްޓްކުރަން" ނުވަތަ އެކަމަށް ވަރަށް ބޮޑަށް ސަމާލުކަން ދޭން ޖެހޭ ކަމަށާއި، އެފަދަ ފިޔަވަޅުތައް އެޅުމަށް މަގުފަހިކުރުމަށް މި ސަރުކާރުން ޚާއްޞަ އިސްކަމެއްދޭ ކަމަށެވެ. އަދި މިކަމަށް މީގެކުރިން ދިވެހިންގެ ތެރޭގައި ސަމާލުކަން ދިން ކަމަށާއި ނަމަވެސް މިހާރު އެ އާދަ އަންނަނީ ކޮންމެވެސް ވަރަކަށް ނެތުމުން ކަމަށެވެ.

ބަލިން ރައްކާތެރިވުމަށް ކުރެވުނު އެންމެ މުހިންމު އެއްކަމަކީ ޖީލެއް ދުންފަތުގެ އިސްތިއުމާލުކުރުމުން ދުރުހެލިކުރުވުން ކަން ރައީސް ފާހަގަކުރެއްވިއެވެ.

މީގެ އިތުރަށް، ތަރުކާރީއާ މޭވާ ގިނަކޮށް ހަކުރުގެ ބާވަތްތައް މަދުކުރުމުގެ މުހިންމުކަމަށް ވެސް އެމަނިކުފާނު އަލިއަޅުވާލެއްވިއެވެ. ހަމައެހެންމެ ދުޅަހެޔޮ ޞިއްޙަތަކަށް މުހިންމު ވާނޭ ރަނގަޅު ކާނާތައް ރައްޔިތުންނަށް ލިބޭނެ އިންތިޒާމު ހަމަޖައްސަވައިދެއްވާނެ ކަމަށް ރައީސް ވިދާޅުވިއެވެ.

"ދެން އޭގެއިތުރަށް، ކަސްރަތު ކުރުމަށް އިސްކަންދިނުމާއި، ކުޅިވަރުތަކަށް އިސްކަން ދިނުމާއި، މި ހިންގޭ މަޝްރޫޢުތައް ހިންގުންވެސް އެއީ، އޭގެތެރެއިން ހިނގާ ކަންކަން އިނގޭތޯ. އެހެންވީމާ، ވަރަށް އިސްކަމެއް ދެން. އަދި އޭގެއިތުރަށް، ހަމަ ޢާންމު ޞިއްޙަތު ރައްކާތެރިކުރުމަށް ކުރެވޭ ޕަބްލިކް ހެލްތުގެ ކަންތައްތައްވެސް. ތަންކޮޅެއް ކުރިން ވަރަށް ރަނގަޅަށް އޮތް ކަމެއް. ވަކިހިސާބަކުން ދޫވެގެންދިޔަ ކަމެއް. އަނެއްކާ އަޅުގަނޑުމެން މި ރަނގަޅުކުރަނީ. ވަރަށް މުހިންމު ކަމެއް، ކުޑަކުދިން ބަރާބަރަށް ކިރުމާއި، އެ ކުދިންނަށް ދޭންޖެހޭ ވެކްސިންތައް ބަރާބަރަށް ދިނުމާއި، މިހެންގޮސް ދަމަނަވެށީގައި
މި ކުރާ ކަންތައްތައް ކުރަންޖެހޭ. އަޅުގަނޑު ވަޢުދުވެފައި އޮންނާނެ، ކޮންމެ އަތޮޅެއްގައިވެސް ހަމަ އެންމެ ފެންވަރު ރަނގަޅުކޮށް ދަމަނަވެށީގެ ޚިދުމަތްވެސް ދޭނެ ކަމަށް". ރައީސް

ދިވެހި މުޖުތަމަޢުގައި މިހާރު ދިރިއުޅުމުގެ އާދަތަކާއި ގުޅިފަހުންނަ ބަލިތައް ގިނަކަން ރައީސްގެ ވާހަކަފުޅުގައި ފާހަގަ ކުރެއްވިއެވެ. އެގޮތުން ކެންސަރާ ގައިންގަޔަށް އަރާ ބަލިތަކާ ވާރުތަކުރާ ބަލިތައް ހުންނަ ކަމަށާއި، އެހެންނަމަވެސް އެތައް ބަލިތަކުން ދުރުވެވޭނެ ގޮތްތައް ފަހިވެފައިވާކަމަށް ރައީސް ވިދާޅުވިއެވެ.

ވަށާޖެހޭ ޞިއްޙީ ޕޮލިސީއެއް ތަންފީޛު ކުރެވޭތޯ ބައްލަވާކަން ފާހަގަކުރައްވާ އެމަނިކުފާނު ވިދާޅުވީ، ބޭނުންފުޅުވާ ޕޮލިސީއަކީވެސް އެއީ ކަމުގައެވެ. އޭރުން ޑޮކްޓަރަށް ދައްކަންޖެހޭވަރު މަދުކުރެވި، ދައްކަންޖެހޭ ޙާލަތުގައި، ރާއްޖޭގައި ތިބެގެން އެންމެ ރަނގަޅު ޚިދުމަތް ހޯދޭނެގޮތް ހެދޭނެ ކަމަށްވެސް ވިދާޅުވިއެވެ. ރައީސް ވިދާޅުވީ، މިހާރު ބައްޔެއް ވީމަ ދާން ޖެހެނީ އެކި ޤައުމުތަކަށް ކަމަށާއި އެއީކީ ފަސޭހަކަމެއް ނޫން ކަމަށެވެ.

އެކަމަކު ރާއްޖޭގައި ތިބެގެން، އެންމެ ފެންވަރު ރަނގަޅު ޚިދުމަތް، ބަލިވީމަ ލިބޭނެގޮތްވެސް ވާންޖެހޭނެ ކަމަށާއި، ވަށާ ޖެހޭގޮތަށް އެކަން ކުރެވޭތޯ ބައްލަވާކަމަށް އެމަނިކުފާނު ވިދާޅުވިއެވެ.

ޕޮޑްކާސްޓްގައި ވާހަކަފުޅު ދައްކަވަމުން، މިއަންނަ އަހަރުގެ ނިޔަލަށް ކޮންމެ ރަށެއްގައިވެސް އައުޓްޑޯ ޖިމެއް ޤާއިމުކުރެވޭނެ ކަމުގައި އެމަނިކުފާނު ވިދާޅުވިއެވެ. އަދި ކުޑަކުދިންވެސް ބޭރަށް ނުކުމެ ހަރަކާތްތެރިވެ އުޅުމަށާއި، އާއިލާއާއެކު ވަގުތު ހޭދަކޮށްލުމަށް، ކުޑަކުދިންގެ ޕާކްތައް ހަދަމުންދާކަންވެސް އެމަނިކުފާނުގެ ވާހަކަފުޅުގައި ވަނީ ފާހަގަކުރައްވާފައެވެ. އެކަމުގެ ސަބަބުން ސިކުނޑިއަށް ހަމަޖެހުން ލިބިގެންދާނެކަން ވިދާޅުވިއެވެ.

މި މަސައްކަތުގެ ތެރެއިން މާލޭގެ ހަލާކުވެފައިވާ ޕާކުތައް މަރާމާތުކޮށްދެއްވުމަށް ނިންމަވާފައިވާ ކަމަށާއި، ސަލްޓަން ޕާކް މަރާމާތުކުރުމަށް ކުރައްވާނެ މަސައްކަތްތަކުގެ ތަފްޞީލީ މަޢުލޫމާތުވެސް އެމަނިކުފާނު ވަނީ ޙިއްޞާ ކުރައްވާފައެވެ. އެގޮތުން އެ ޕާކް ތަރައްޤީ ކުރައްވާނީ "އެޑްވެންޗަރަސް" ކަންކަން ހިމަނައިގެން ކަމުގައި އެމަނިކުފާނު ވިދާޅުވިއެވެ.

މި މޭރުމުން ވާހަކަފުޅު ކުރިއަށްގެންދަވަމުން ރައީސުލްޖުމްހޫރިއްޔާ ވިދާޅުވީ، ސަރުކާރުން ހިންގާ ކުޅިވަރާގުޅުންހުރި މަޝްރޫޢުތައް ހިންގަވަނީވެސް "ޕްރިވެންޓިވް ހެލްތު ކެއަރ"އަށް މަގުފަހިކުރުމުގެ މަޤްޞަދު ހާސިލުކުރެވޭނެ ގޮތަށްކަމަށެވެ.