ޗައިނާއިން ސަގާފީ ތަރިކަ ރައްކާތެރިކުރުމަށް އޭއައި އަދި ސެޓެލައިޓް ޓެކްނޮލޮޖީގެ ބޭނުން ފުޅާކުރަނީ

ސަގާފީ ތަރިކަތައް ރައްކާތެރިކޮށް ދެމެހެއްޓުމަށްޓަކައި ޗައިނާއިން އެކުލަވާލާފައިވާ އައު ފަސް އަހަރުގެ މަޝްރޫއުގެ ދަށުން، އާޓިފިޝަލް އިންޓެލިޖެންސް (އޭއައި) އާއި، ސެޓެލައިޓް ރިމޯޓް ސެންސިންގް އާއި، ޑްރޯން، ތްރީޑީ މޮޑެލިންގް އަދި ވާޗުއަލް ރިއަލިޓީ ފަދަ ޒަމާނީ ވަސީލަތްތަކުގެ ބޭނުން ފުޅާދާއިރާއެއްގައި ހިފުމަށް ނިންމައިފިއެވެ.

2026 އިން 2030 އަށް އެކުލަވާލާފައިވާ މި މަޝްރޫއުގެ ދަށުން، އެކި ބާވަތުގެ ސަގާފީ ތަރިކަތައް ކަމަށްވާ، އިހުގެ ހޮހަޅަތަކާއި، ފާރުތަކުގައި ކުރަހާފައިވާ ކުރެހުންތަކާއި، ހިލައިގެ ކުރެހުންތަކުގެ އިތުރުން ދުވަސްވީ ފޮތްތަކާއި އާކައިވް ކުރެވިފައިވާ މުހިންމު ލިޔެކިޔުންތައް ރައްކާތެރިކުރުމަށް ވަނީ ހުށަހަޅާފައެވެ.

ނުއުފުލޭ 760،000 (ހަތްލައްކަ ފަސްދޮޅަސް ހާސް) އަށްވުރެ ގިނަ އާސާރީ ބިނާތަކާއި، ދައުލަތުގެ މިލްކިއްޔާތުގައިވާ 108 މިލިއަނަށްވުރެ ގިނަ އާސާރީ ތަކެތި ހިމެނޭ ޗައިނާގެ މުއްސަނދި ސަގާފީ ތަރިކަ ދިރާސާކުރުމަށާއި، މޮނިޓަރކޮށް ބެލެހެއްޓުމުގައި އެ ގައުމުން މިހާރު ދަނީ ޓެކްނޮލޮޖީގެ އެހީތެރިކަން ހޯދަމުންނެވެ.

އޭއައި އާއި ޑިޖިޓަލް ޓެކްނޮލޮޖީގެ ބޭނުން އިތުރުވުމުގެ ސަބަބުން، ސަގާފީ ތަރިކަ ރައްކާތެރިކުރާ ގޮތަށް ބޮޑެތި ބަދަލުތަކެއް އަންނަމުންދާކަން މާހިރުން ފާހަގަކުރެއެވެ. މިގޮތުން، ހަމައެކަނި ތަންތަން ރެކޯޑުކޮށް ބެލެހެއްޓުމުގެ ބަދަލުގައި، ކުރިމަތިވެދާނެ ނުރައްކާތައް ކުރިއާލާ ދެނެގަތުމުގެ ނިޒާމަކަށް މިހާރު ވަނީ ބަދަލުވެފައެވެ.

މި ސެޓެލައިޓަކީ އާސާރީ ބިނާތަކުގެ ވަށައިގެންވާ މާހައުލަށް އަންނަ ބަދަލުތައް މޮނިޓަރ ކުރުމަށް ފަރުމާކޮށްފައިވާ އެއްޗެކެވެ. މީގައި ހިމެނޭ މަތީ ފެންވަރުގެ އިމޭޖިންގ އަދި އޭއައި ރިކޮގްނިޝަން މޮޑެލްގެ އެހީގައި، ގަވާއިދާ ހިލާފަށް ކުރިއަށްދާ އިމާރާތްކުރުމުގެ މަސައްކަތްތައް ފަދަ ކަންކަން ދެނެގަނެވޭނެއެވެ. މީގެ އިތުރުން، ބިންގަނޑު ކަނޑައިގެން ދިއުމާއި، ފެންބޮޑުވުމާއި، ވައިގެ ސަބަބުން ވެލި ގިރުމާއި، ބިންގަނޑު އަޑިއަށް ދިއުން ފަދަ ނުރައްކާތައް ދިގު މުއްދަތަކަށް މޮނިޓަރ ކުރުމުގެ ގާބިލުކަން މި ސެޓެލައިޓަށް ލިބިގެންވެއެވެ.

މި މަޝްރޫޢުގެ ދަށުން 2026 އިން 2030 އަށް ސަގާފީ ތަރުކާ ފާހަގަކޮށް ރައްކާތެރިކުރުމަށްޓަކައި 33 މުހިންމު މަސައްކަތެއް ކުރުމަށް ވަނީ ކަނޑައަޅާފައެވެ. މީގެ ތެރޭގައި ޓެކްނޮލޮޖީގެ އައު އީޖާދުތަކާއެކު އާސާރީ މަސައްކަތްތަކާއި، އަތްތެރި މަސައްކަތްތަކާއި ސަގާފީ ހުނަރުތަކާއި، ދާރުލްއާސާރުތައް އަދި ބައިނަލްއަގުވާމީ އެއްބާރުލުން ހިމެނޭހެން ފުރިހަމަ ނިޒާމެއްގެ ތެރެއިން ކަންކަން ތަރުތީބުކުރެވިގެންދާނެއެވެ.

މި ޕްލޭންގެ މައިގަނޑު މަގުސަދަކީ ތަރައްގީގެ މަޝްރޫޢުތައް ފެށުމުގެ ކުރިން އާސާރީ ދިރާސާތައް ކުރިއަށް ގެންދިއުމެވެ. ހާއްސަކޮށް ބިމުގެ އަޑީގައި ހުރެދާނެ އާސާރީ ތަކެއްޗަށް ގެއްލުންވެދާނެ ފަދަ އިމާރާތްކުރުމުގެ މަސައްކަތްތަކުގެ ކުރިން އާސާރީ ސާވޭތައް ހެދުމަށް މި ޕްލޭންގައި ލާޒިމުކުރެއެވެ. އަދި އާސާރީ ބިނާތަކާއި އެ ތަންތަނުގެ ތާރީޚީ މާހައުލު އެކުއެކީގައި ރައްކާތެރިކުރުމަށްވެސް މި ޕްލޭންގައި ބާރުއަޅާފައިވެއެވެ.