އީވާން ނަސީމްގެ މަރަކީ ޖަލުތަކުގެ ލާއިންސާނީ އަނިޔާ ހާމަވެ، އިސްލާހީ ބަދަލަށް މަގުފަހިކުރި ހާދިސާއެއް: ފައްޔާޒް

މީގެ 21 އަހަރު ކުރިން (2003 ވަނަ އަހަރު) މާފުށީ ޖަލުގައި ޒުވާން އީވާން ނަސީމް އަނިޔާވެރި ގޮތަކަށް މަރާލި ހާދިސާއަކީ، އޭރު ރާއްޖޭގެ ޖަލުތަކުގައި އާންމުވެފައި އޮތް ލާއިންސާނީ އަނިޔާކުރުމާއި ގައިދީންގެ އިންސާނީ ކަރާމާތް ނަގާލުމުގެ ސަގާފަތް ހާމަވެގެންދިޔަ ހާދިސާއެއް ކަމަށް އިދިކޮޅު އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެއެވެ.

އީވާން ނަސީމްގެ ހަނދާންތައް އާކުރައްވައި އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ، މިއަދު އަޅުގަނޑުމެން މި ދެކޭ އަސާސީ ހައްގުތައް ޔަގީންކޮށްދޭ ފެހި ގާނޫނުއަސާސީ ވުޖޫދުވެގެން އައީ އެ އަނިޔާވެރި ހާދިސާއަށްފަހު، ސެޕްޓެމްބަރު 19 އަދި 20 ވަނަ ދުވަހު ބިރުފަހަނައަޅައި މަގުތަކަށް ނުކުތް ހިތްވަރުގަދަ ދިވެހި ރައްޔިތުންތަކެއްގެ ސަބަބުން ކަމަށެވެ. އަދި މިއަދު އާކުރަމުން މިދަނީ ކޮންމެ އަނިޔާވެރި ވެރިކަމަކަށް ވެސް ނިމުމެއް އޮންނާނެކަން ސާބިތުކޮށްދިން ދިވެހިންގެ ތާރީޚީ ހަނދާންތައް ކަމަށް ވެސް އޭނާ ފާހަގަކުރެއްވިއެވެ.

ރާއްޖޭގެ ޒަމާނީ ސިޔާސީ ތާރީޚުގައި އެންމެ ކަޅު އަދި އެންމެ ނުފޫޒުގަދަ އެއް ހާދިސާއަކީ 2003 ވަނަ އަހަރުގެ ސެޕްޓެމްބަރު މަހުގެ 19 އަދި 20 ވަނަ ދުވަހު ހިނގައިދިޔަ ކަންތައްތަކެވެ.

މާފުށީ ޖަލުގައި އީވާން ނަސީމަށް އޭރުގެ ސަލާމަތީ ބާރުތަކުން ލާއިންސާނީ އަނިޔާދީ މަރާލުމަށްފަހު، އޭނާގެ ހަށިގަނޑު މާލެ ގެނެސް އާއިލާއާ ހަވާލުކުރިއިރު ހަށިގަނޑުގައި ހުރި ޒަޚަމްތަކާއި އަނިޔާގެ ނިޝާންތައް އާންމުންނަށް ފެނިގެންދިޔައެވެ. މިއާއެކު މާލޭގައި އެތައް ހާސް ރައްޔިތުންނެއް މަގުތަކަށް ނުކުމެ، އޭރު އޮތް ވެރިކަމާ ދެކޮޅަށް އަޑުއުފުލައި ވަރުގަދަ މުޒާހަރާތަކެއް ފެށިއެވެ. ރައްޔިތުންގެ ކެކުޅުންތައް ބޮޑުވެ، އޭރުގެ ވެރިކަމުގެ ބާރުތަކަށް ނުކިޔަމަންތެރިކަން ދައްކަން ފެށިއެވެ.

މި ހާދިސާއާ ވިދިގެން މާފުށީ ޖަލުގައި ހަމަނުޖެހުން ހިނގައި، ސިފައިން ޖަލު ބަލަހައްޓަން ތިބެ ގައިދީންގެ ގަޔަށް ބަޑިޖެހުމުގެ ސަބަބުން އިތުރު އެތައް ގައިދީންނެއް ޝަހީދުވެ، އެތައް ބަޔަކު ޒަޚަމްވިއެވެ. މި ލޭއޮހޮރުވުން ވެގެންދިޔައީ 30 އަހަރުވީ ދިގު ވެރިކަމުގެ ބިންގަލަށް އެޅުނު އެންމެ ބޮޑު ގުޑުމަށެވެ.

އެ ހާދިސާތަކަށްފަހު ދިވެހިން ފެށި އިސްލާހީ މަސައްކަތުގެ ނަތީޖާއެއްގެ ގޮތުން:

1. ގިނަ ސިޔާސީ ޕާޓީތައް އެކުލެވޭ ޑިމޮކްރެޓިކް ނިޒާމަކަށް ޖާގަ ލިބުނެވެ.
2. 2008 ވަނަ އަހަރު ރައްޔިތުންގެ އަސާސީ ހައްގުތަކާއި އިންސާނީ ކަރާމާތް ހިމާޔަތްކޮށްދޭ އާ ގާނޫނުއަސާސީ އެކުލަވާލެވުނެވެ.
3. ޖަލުތަކުގެ ހާލަތު ބަދަލުކުރުމަށާއި، އަނިޔާކުރުން ހުއްޓުވުމަށް މިނިވަން މުއައްސަސާތައް (ހިއުމަން ރައިޓްސް ކޮމިޝަން ފަދަ) އުފެދިގެން ދިޔައެވެ.

އީވާން ނަސީމްގެ މަރަކީ ރާއްޖެއަށް ޑިމޮކްރަސީއާއި އިންސާނީ ހައްގުތައް ހޯދައިދިނުމުގައި ދިވެހި ރައްޔިތުންގެ ލޮލުން ބިރުވެރިކަމުގެ ފަރުދާ ކަހާލައި، އިސްލާހީ ހެޔޮ ބަދަލަކަށް މަގުކޮށައިދިން އެންމެ ވަރުގަދަ ބިންގަލެވެ.