ދެ އިންތިހާބު އެއްކޮށްލުން: ތާރީހީ ބަދަލެއް !

ލޯކަލް ކައުންސިލް އިންތިހާބު ބާއްވަން ތައްޔާރުވަމުންދާ މި ދަނޑިވަޅުގައި މުހިއްމު ދެ އިންތިހާބެއް އެކުގައި ބާއްވަން ފެނޭތޯ ނުވަތަ ނޫންތޯ ބަލަން މިވަނީ ނިންމާފައެވެ.

ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެކުގައި ބާއްވަން ފެނޭތޯ ނުވަތަ ނޫންތޯ ބެލުމަށް ފެންނަ ނުފެންނަ ވޯޓެއް ނަގަން ސަރުކާރުން މިވަނީ ނިންމާފައެވެ.

އޭޕްރިލް މަހުގެ 4 ވަނަ ދުވަހު ބާއްވަން ނިންމާފައިވާ ފެންނަ ނުފެންނަ ވޯޓުގައި ދެ އިންތިހާބު އެއްކޮށް ބާއްވަން ފެނޭތޯ ނުވަތަ ނޫންތޯ އަހަން ވޯޓް ކަރުދާސް ދޫކުރާނެއެވެ.

މިއީ ތާރީހުގައި ވެސް މުޅިން އަލަށް ކުރާ ކަމެކެވެ.

ބޮޑު ދެ އިންތިހާބު އެކުގައި ބާއްވަން އަދުގެ ސަރުކާރުން ނިންމާފައިވަނީ އިންތިހާބު ތަކަށް ކުރާ ހަރަދު ކުޑަކުރުމުގެ ގޮތުންނެވެ.

ސަރުކާރުން ބުނީ ދެއިންތިހާބު އެއްކޮށްލުމުން ދައުލަތުގެ ބަޖެޓުން އަހަރަކު 120މިލިއަން ރުފިޔާ ސަލާމަތްކުރެވޭނެ ކަމަށެވެ.

ރައީސް ޑރ މުހައްމަދު މުއިއްޒު ވިދާޅުވީ ދައުލަތުގެ ބަޖެޓުން އިންތިހާބުތަކަށް ކުރާ ހޭދަ ދެ އިންތިހާބު އެކުގައި ބޭއްވުމުން ކުޑަވެގެންދާނެ ކަަމަށެވެ.

ވެރިކަން ހިންގާ މައި ޕާޓީ ޕީއެންސީ އަށް ތާއީދު ކުރާ ފަރާތްތަކާއި ޕީއެންސީގެ ލީޑަރޝިޕް އާއި އަދުގެ ސަރުކާރުން ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށްލަން ބޭނުންވި ނަމަވެސް އިދިކޮޅުން ދަނީ އެކަމާ ދެކޮޅު ހަދަމުންނެވެ.

އިދިކޮޅު އެންމެ ބޮޑު ޕާޓީ އެމްޑީޕީ އިން ވަނީ ފާޅުގައި ދެ އިންތިހާބު އެކުގައި ބާއްވަން ދެކޮޅު ހަދާފައެވެ. އެމްޑީޕީ އިން ވަނީ ދެ އިންތިހާބު އެއްކޮށްލަން ރައީސުލްޖުމްހޫރިއްޔާ ނިންމެވި ގަރާރު ބާތިލްކޮށްދޭން އެދި ސިވިލް ކޯޓަށް މައްސަލައެއްވެސް ހުށަހަޅާފައެވެ.

އެމްޑީޕީ އިން ބުނަމުންދަނީ ދެ އިންތިހާބު އެކުގައި ބާއްވަން އުޅެނީ ބާރުތައް ޖަމާކޮށް ބާރުތައް މުށުތެރެއަށް މަހާލުމަށް ކަމަށެވެ. ތިން ބާރު ވަކިވެފައިވާ ރިޔާސީ ނިޒާމެއްގައި ޝަރުއީ ނިޒާމްގެ އިތުރުން ބާކީ އޮތް ދެ ބާރު ކަމުގައިވާ ރައީސުލްޖުމްހޫރިއްޔާ އާއި ރައްޔިތުންގެ މަޖިލިސް އެއްކޮށްލަން މިއަދުގެ ސަރުކާރުން ދުރާލާ ރާވައިގެން މަސައްކަތް ކުރާ ކަަމަށް އެމްޑީޕީ އިން ވަނީ ތުހުމަތުކޮށްފައެވެ.

އިންތިހާބުތައް އެއްކޮށްލަނީ ހަރަދުކުޑަ ކުރަން ކަމަށް ބުނި ނަމަވެސް ހަގީގަތުގައި އެކަން ކުރަނީ އެނިޔަތުގައި ނޫންކަމަށް އިދިކޮޅުން ދަނީ ބުނަމުންނެވެ.

އިދިކޮޅުގެ ވާހަކަތަކަށް ސަރުކާރަށް ނިސްބަތްވާ މަޖިލިސް މެމްބަރުންނާއި ސަރުކާރު ހިންގާ ޕާޓީ އިން ވަނީ ރައްދު ދީފައެވެ.

ޕީއެންސީގެ ޕީޖީ ގްރޫޕް ލީޑަރ އިބްރާހިމް ފަލާހް އާއި ޕާޓީގެ ޑެޕިއުޓީ ލީޑަރ އަދި ފިޝަރީޒް އެންޑް އޯޝަން ރިސޯސް މިނިސްޓަރ އަހްމަދު ޝިޔާމް ވިދާޅުވެފައިވަނީ އިންތިހާބުތައް ވަކިވަކިން ބޭއްވުމަކީ ހަރަދުބޮޑުކަމެއް ކަމަށް ވިދާޅުވެފައެވެ. އޭގެ ބަދަލުގައި ދެ އިންތިހާބު އެކުގައި ބޭއްވުމަކީ ހަރަދުކުޑަވެގެންދާނެ ކަމެއް ކަމަށެވެ.

މީގެ ކުރިން އެމްޑީޕީ އިން ވެސް ދެ އިންތިހާބު އެކުގައި ބާއްވަން ފެންނަ ކަަމަށް ބުނަމުންދިޔަ ކަމަށްވެސް ސަރުކާރު ހިންގާ ޕީއެންސީގެ ބޭފުޅުން ވަނީ ބުނެފައެވެ. ނަމަވެސް ވެރިކަމުގައި ނެތި އިދިކޮޅުގައި ތިބުމުން މިއަދު ދެ އިންތިހާބު އެއްކޮށްލުމާއި އެމްޑީޕީ އިން ދެކޮޅު ހަދަމުންދާ ކަމަށް ޕީއެންސީގެ ބޭފުޅުން ވަނީ ބުނެފައެވެ.

ގާނޫނު އަސާސީ އަށް ބަދަލެއް ގެނެވޭނީ ރައްޔިތުންގެ ހިޔާލާއި އެކުގައި ކަމަށް ބުނެފައިވެއެވެ. އެހެންކަމުން ގާނޫނު އަސާސީގައި ބަޔާންކުރާ ފަދައިން ރިޔާސީ އިންތިހާބާއި މަޖިލިސް އިންތިހާބު ބާއްވާ ތާރީހު އެއް ދުވަހަކަށް ހަދަން ފެނޭތޯ ބެލުމަށް މިވަނީ މަޖިލީހުން ފާސްކޮށްފައެވެ.

ދެ އިންތިހާބު އެއްކޮށްލުމާއި އިދިކޮޅު ގިނަ ސިޔާސީ ލީޑަރުން ދެކޮޅު ހަދަމުންދާއިރު އެ ފަރާތްތަކުންވެސް ތުހުމަތުކުރަނީ އެމްޑީޕީ އިން ދައްކާ ވާހަކަތަކަށެވެ. ވައްކަމާއި ކޮރަޕްޝަނާއި ފަސާދަ އާއި ބާރުވެރިކަން ހޯދަން އިންތިހާބުތައް އެއްކޮށްލުމަކީ ކުރުން ރަނގަޅު ކަމެއް ނޫންކަމަށް އިދިކޮޅުން ދަނީ ބުނަމުންނެވެ.

އިންތިހާބުތައް ފުލުފުލުގައި ބޭއްވުމުގެ ސަބަބުން ގައުމަށް ގެންނަން ބޭނުންވާ ބަދަލު ގެންނަން އުނދަގޫވާ ކަމަށް ބައެއް ރައްޔިތުން ބުނަމުންދެއެވެ.

ރައްޔިތުންގެ މަޖިލިސް އިދިކޮޅު ޕާޓީއެއްގެ އަތުގައި އޮތުމުގެ ސަބަބުން ސަރުކާރުން މަޖިލިސް ތެރެއިން ކުރަން ބޭނުންވާ ކަންކަން ނުކުރެވޭ ކަމަށް އެކި ސަރުކާރުތަކުން މީގެކުރިން އަދި މިހާރުވެސް ދަނީ ބުނަމުންނެވެ.

އެއް ސަރުކާރަކުން އަނެއް ސަރުކާރަކާއި ހަވާލްވާއިރު ފަށާފައިވާ މަޝްރޫއުތައް ހިންގުމުގައި ދިމާވާ ގޮންޖެހުންތަކާއި ހުރަސްތަކަށް ހައްލެއް ދެއިންތިހާބު އެކުގައި ބޭއްވުމުގެ ސަބަބުން ލިބިގެންދާނެ ކަމަށް މިސަރުކާރުން ގަބޫލުކުރެއެވެ.

ރައްޔިތުންގެ ފެންނަ ނުފެންނަ ވޯޓެއް ނެގުމަށް އިލެކްޝަންސް ކޮމިޝަން، އީސީ އިން ތައްޔާރުވަމުންދާއިރު އެ ކޮމިޝަނުން 3 އިންތިހާބެއް އެކުގައި ބާއްވާނެއެވެ. އެއީ ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ އިތުރުން ރިޔާސީ އިންތިހާބާއި މަޖިލިސް އިންތިހާބު އެކުގައި ބާއްވަން ފެންނަ ނުފެންނަ ވޯޓް ނެގުމުގެ އިންތިހާބު ބާއްވަން ފެންނަ ނުފެންނަ ވޯޓް ނަގާ އިންތިހާބާއި އެކު 3 އިންތިހާބެވެ.

ރައްޔިތުންގެ އަތްމަތީގައި އޮތް އިންތިހާބީ ހައްގު އަދާކުރަން އޭޕްރިލް މަހުގެ 4 ވަނަ ދުވަހު ވީހާ ގިނަ ރައްޔިތުން ނިކުމެ ވޯޓްލާނެއެވެ.