ރައްމަންދޫ ރައްޔިތުންނަށް ތުލުސްދޫއިން 44 ގޯތި

މ. ރަތްމަންދޫ މީހުން ކ. ތުލުސްދުއަށް ބަދަލުކުރަން 44 ގޯތި ދޫކުރުމަށް ތުލުސްދޫ ކައުސިލުން ހަމަޖައްސައިފި އެވެ.

ހައުސިން މިނިސްޓްރީން ރަތްމަންދޫ ކައުންސިލަށް ފޮނުވި ސިޓީއެއްގައި ބުނެފައިވަނީ ރަތްމަންދޫ މީހުން ތުލުސްދުއަށް ބަދަލުކުރުމުގެ މަސައްކަތް ކުރިއަށް ގެންދިއުމަށް އެ ރަށުން 44 ގޯތި ހަމަޖައްސާފައިވާ ކަން ތުލުސްދޫ ކައުންސިލުން އެމިނިސްޓްރީއަށް އަންގާފައިވާ ކަމަށެވެ.

އެހެންވެ، އެ މަސައްކަތް ކުރިއަށް ގެންދިއުމަށް ކުރަން ޖެހޭ މަސައްކަތްތައް އެ މިނިސްޓްރީން ކުރާނެ ކަމަށް، ހައުސިން މިނިސްޓްރީއިން ވަނީ ބުނެފައެވެ.

ރަތްމަންދޫގެ މީހުން އެހެން ރަށަކަށް ބަދަލުވުމާ މެދު ރަށުގެ މީހުންގެ މެދުގައި މިދިޔަ އަހަރު ވަނީ ހިޔާލު ތަފާތުވުންތައް އުފެދިފަ އެވެ. ރައީސް ޑރ. މުހައްމަދު މުއިއްޒު މިދިޔަ އަހަރުގެ ސެޕްޓެމްބަރު މަހު އެ ރަށަށް ކުރެއްވި ދަތުރުފުޅުގައި ވަނީ އެ މައްސަލައިގައި ރަށުގެ ރައްޔިތުންގެ ހިޔާލުތައް އަޑުއައްސަވައިފަ އެވެ.

ރަތްމަންދޫ މީހުން އެދިފައިވަނީ މާލޭ ސަރަހައްދުގެ ރަށަކަށް ބަދަލުވުމަށެވެ.

އެނގިފައިވާގޮތުގައި މިކަމާއި ގުޅިގެން ތުލުސްދޫގެ ރައްޔިތުންގެ މެދުގައި ވަނީ ކަންބޮޑުވުން އުފެދިފައެވެ. އެރަށުން ވާހަކަދެއްކި މީހަކު ބުނީ، އެރަށުގެ ރައްޔިތުން ގޯއްޗަށް ބޭނުންޖެހިފައިވަނިކޮށް، އެރަށުގެ ރައްޔިތުނަށް ދޫކުރާ ގޯތިތަކުން އެހެން ރަށެއްގެ ރައްޔިތުންނަށް ގޯތިދޭން ނިންމުމާގުޅިގެން ބައެއް ރައްޔިތުން ހިންހަމަނުޖެހިފައި ތިބިކަމަށެވެ.

ކުޑަ އާބާދީގެ ސަބަބުން ގޮންޖެހުންތަކާއި ކުރިމަތިވާ ރަށްރަށުގެ މީހުން ބޭނުންނަށް އެހެން ރަށަކަށް ބަދަލުކޮށްދެއެވެ. އާބާދީ މަދުވުމުގެ ސަބަބުން ހދ. ހިރިމަރަދޫ މީހުން އެ އަތޮޅު ހަނިމާދުއަށް ބަދަލުކުރަން ވެސް ސަރުކާރުން ވަނީ ނިންމައިފަ އެވެ. ރައީސް މުއިއްޒު އެކަން އިއުލާން ކުރެއްވީ މިދިޔަ އަހަރުގެ އޯގަސްޓް މަހު އެވެ.