ނަރުހުންނަށް ދާއިމީ ސެޓްފިކެޓު ދޫކުރަނީ ކޮލިފިކޭޝަން ސެޓްފިކެޓު އަސްލު ހުށަހެޅުމުން

ދިވެހި ނަރުހުން އަލަށް ރަޖިސްޓްރީ ވުމަށް ކޯސް ނިންމި ކަމުގެ ލިޔުން ހުށައެޅި ކަމުގައިވިނަމަވެސް ނަރުހުންގެ ދާއިމީ ސެޓުފިކެޓް ދޫކުރާނީ ކޮލިފިކޭޝަންގެ އަސްލު ހުށަހެޅުމުން ކަމަށް މޯލްޑިވްސް ނާސިން އެންޑް މިޑްވައިފަރީ ކައުންސިލުން ނިންމައިފިއެވެ.

ނަރުސްކަން ކިޔަވައި އަލަށް ވަޒީފާގެ މާހައުލަށް ނިކުންނަ ކުދިންނަށް ރަޖިސްޓްރީވުމަށް ކޯސް ނިންމިކަމުގެ ލިއުން ހުށަހެޅިނަމަވެސް ކޮލިފިކޭޝަން ސެޓްފިކެޓް ހުށަނާޅާނަމަ ވަގުތީ ރަޖިސްޓްރޭޝަނެއް ދިނުމަށް ވަނީ ނިންމާފަ އެވެ.

ނާސިން ކައުންސިލުން ވިދާޅުވީ އެ ކައުންސިލުގައި ދިވެހި ނަރުހުން އަލަށް ރަޖިސްޓްރީވުމަށް ކޯސް ނިންމިކަމުގެ ލިއުން ހުށަހަޅަމުންދިޔަނަމަވެސް ކޮލިފިކޭޝަން ސެޓްފިކެޓް ހުށަނާޅާކަން ފާހަގަކުރެވިފައިވާކަމަށެވެ.

އެކައުންސިލުން ބުނީ މިހާރު އަމަލުކުރަމުންދާ އުސޫލުގެ ދަށުން، ކޯސް ނިންމިކަމުގެ ލިޔުމަށް ބިނާކޮށް ދާއިމީ ރަޖިސްޓްރޭޝަނަކާއެކު ޕްރޮވިޝަނަލް ލައިސަންސެއް ދޫކުރި ނަމަވެސް އަންނަ މަހުގެ ފުރަތަމަ ދުވަހުން ފެށިގެން އެ އުޞޫލަށް ބަދަލު ގެނައުމަށް ނިންމާފައިވާކަމަށެވެ.

އަންނަ މަހުގެ ފުރަތަމަ ދުވަހުން ފެށިގެން ކޯސް ނިންމިކަމުގެ ލިޔުމާއެކު ރަޖިސްޓްރީވުމަށް ހުށަހަޅާ ފަރާތްތަކަށް ދޫކުރަނީ ޕްރޮވިޝަނަލް ރަޖިސްޓްރޭޝަނާއި ޕްރޮވިޝަނަލް ޕްރެކްޓިސިންގ ލައިސަންސް އެކެވެ.

މީގެ އިތުރުން، ކޮމްޕިޓެންސީ އިމްތިހާނުން ފާސްވެގެން ލައިސަންސް ހޯދުމަށް ހުށަހަޅާ ނަރުހުންނާއި، އިތުރު ކޮލިފިކޭޝަން ހިމަނަން އެދޭ ނަރުހުންވެސް، ކޮލިފިކޭޝަން ސެޓްފިކެޓް ހުށަހަޅަންޖެހޭނެ އެވެ.