މާލޭގެ ވިޔަފާރި ބަނދަރުން މުދާ އުފުލާ ބޯޓުތަކުން މުދާ އުފުލާ މިންވަރު އިތުރުވެއްޖެ

މާލޭގެ ވިޔަފާރި ބަނދަރުން މުދާ އުފުލާ ބޯޓުތަކުން މުދާ އުފުލާ މިންވަރު އިތުރުވެފައިވާ ކަމަށް އެމްޕީއެލްއިން ބުނެފި އެވެ.

މާލޭގެ ވިޔަފާރި ބަނދަރުގައި ސައުވީސް ގަޑީރަށް މުދާ އުފުލުމާއި ބޭލުމަށް އާގު ބޯޓު ފަހަރު ކައިރި ކުރުމުމަށާއި، މަސައްކަތް ކުރުމަށް ރައީސުލް ޖުމްހޫރިއްޔާ ވަނީ ނިންމާފަ އެވެ. މީގެ ކުރިން މި ޚިދުމަތް ދެމުން އައީ، 18 ގަޑިއިރަށެވެ.

ރޯދަމަހާއި ދިމާކޮށް މާލޭ ވިޔަފާރި ބަނދަރަށް މުދާ ބޭލުމަށް ގިނަ އަދަދެއްގެ އުޅަނދު އައުމުން އުފެދިފައިވާ ބެކްލޮގް ކްލިއަރ ކުރުމުގެ މަސައްކަތް ކުރަމުންދާ ކަމަށް އެމްޕީއެލްއިން ވަނީ ބުނެފަ އެވެ.

އެމްޕީއެލް އިން ބުނީ މިހިނގާ ޖަނަވަރީ މަހުގެ 12 ވަނަ ދުވަހުން ފެށިގެން، މާލޭ ވިޔަފާރި ބަނދަރަށް ކޮންޓޭނަރ އުފުލާ 7 އުޅަނދު ކޯލްކޮށްފައިވާ ކަމަށެވެ. މި އުޅަނދު ފަހަރުން މާލޭ ވިޔަފާރި ބަނދަރަށް ބާލަން ޖުމްލަ 3،901 ޓީއީޔޫ ހުރިއިރު، ލޯޑް ކުރުމަށް ހުރީ ޖުމްލަ 2،700 ޓީއީޔޫއެވެ.

މާލޭ ވިޔަފާރި ބަނދަރުން މުދާ ބޭލުމުގައި އުފެދިފައިވާ ބެކްލޮގް ފިލުވުމަށް އެމްޕީއެލްގެ އޮޕަރޭޝަންސްގެ ޓީމުތަކުން ކުރި ބުރަ މަސައްކަތުން، މިއަދުގެ 12:00 އާ ހަމައަށް ނުބޭލި ހުރީ، 1،250 ޓީއީޔޫ ކަމަށް އެކުންފުނިން ވިދާޅުވެއެވެ. އަދި ލޯޑް ކުރަން ހުރީ، 1،118 ޓީއީޔޫކަން އެމްޕީއެލްއިން ފާހަގަކުރެއެވެ.

އެމްޕީއެލްގެ މާލޭ ސަރަހައްދުގެ ކޮންޓޭނަރ ޓަރމިނަލްތައް މާލޭ ވިޔަފާރި ބަނދަރާއި ހުޅުމާލެ ޓަރމިނަލް ހިމެނޭ ހެން ޖުމްލަ ކެޕޭސިޓީއަކީ، 2،750 ޓީއީޔޫއެވެ. އެހެން ނަމަވެސް، މި ވަގުތުވެސް އެމްޕީއެލްގެ ޓަރމިނަލްތަކުގައި ޖުމްލަ 5،338 ޓީއީޔޫ އެބަހުއްޓެވެ.