ފަހު ދިހައިގައި އައިޑީކާޑުގެ ޚިދުމަތް ދޭ ގަޑިތައް އާންމުކޮށްފި

ރަމަޟާން މަހުގެ ފަހު ދިހައިގައި އައިޑީކާޑުގެ ޚިދުމަތް ދިނުމަށް ހަމަޖެހިފައިވާ ވަގުތުތައް ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) އިން އާންމުކޮށްފިއެވެ.

ރަމަޟާން މަހުގެ ފަހު ދިހައިގެ ދުވަސްތަކަކީ ސަރުކާރު ބަންދު ދުވަސްތަކެއް ކަމުގައި ރައީސް ހަމަޖައްސަވާފައިވުމާއެކު، އެ ޑިޕާޓްމަންޓުން އާންމު ރައްޔިތުންނަށް ޚިދުމަތް ދިނުމަށް ހަމަޖެހިފައިވާގޮތް އާންމުކޮށް ޑީއެންއާރު އިން އާންމުކުރި އިއުލާނުގައި ބުނީ 1447 ވަނަ އަހަރުގެ ރަމަޟާން މަހުގެ ފަހު ދިހައިގެ ރަސްމީ ބަންދު ދުވަސްތަކުގެ ތެރެއިން ވަކި ދުވަސްތަކެއްގައި އާންމުންނަށް އައިޑީ ކާޑު ދޫކުރުމުގެ ޚިދުމަތް ކުރިއަށްދާނެ ކަމަށެވެ. އެގޮތުން ޚިދުމަތް ދިނުމަށް ހަމަޖެހިފައިވަނީ ރަމަޟާން މަހުގެ ފަހު ދިހައިގެ ތެރެއިން މާރިޗު މަހުގެ 11، 15، 17 އަދި 19 (ބުދަ، އާދިއްތަ، އަންގާރަ އަދި ބުރާސްފަތި) މި ދުވަސްތަކުގައެވެ.

މި ދުވަސްތަކުގައި ޚިދުމަތް ދިނުމަށް ހަމަޖެހިފައިވަނީ ހެނދުނު 09:00 އިން މެންދުރު 13:00 އަށެވެ. ފަހު ދިހައިގެ ބަންދު ދުވަސްތަކުގައި އައިޑީ ކާޑު ދޫކުރުމުގެ ޚިދުމަތް ދޭނީ ، ޑީއެންއާރު ހެޑް އޮފީސް، އުމަރު ޒާހިރު ބިލްޑިންގ، ހުޅުމާލެ ފޭސް 1، ވިނަރެސް ޓަވަރ 2، ހުޅުމާލެ ފޭސް 2 އަދި ޑީއެންއާރު ވިލިމާލެ އޮފީހުންނެވެ.

އަދި މީގެ އިތުރުން އިމަރޖެންސީ ހާލަތްތަކުގައި ޑީއެންއާރުގެ ނަންބަރު 7280368އަށް ގުޅައިގެން އައިޑީކާޑުގެ ޚިދުމަތް ރައްޔިތުންނަށް ލިބޭނެ އިންތިޒާމުވެސް ހަމަޖައްސާފައިވާ ކަމަށްވެސް ޑީއެންއާރުން ވަނީ ބުނެފައެވެ.

އައިޑީކާޑު ޙަވާލުކުރުމުގައި ކާޑުގެ ވެރިފަރާތުން އެހެން ފަރާތަކާއި ޙަވާލުކޮށްދިނުމަށް އެދި ފޮނުވާ ސިޓީއަކާއެކު ފޮނުވުމުން ޙަވާލުކުރެވޭނެ ކަމަށްވެސް ޑީއެންއާރުން ވަނީ ބުނެފައެވެ.