އައިޓީބީ ބާލިން ގައި މިއަހަރު ރާއްޖޭގެ 67 ކުންފުންޏެއް

ފަތުރުވެރިކަން އިޝްތިހާރު ކުރަން ދުނިޔޭގައި ބާއްވާ އެންމެ ބޮޑު އެއް ފެއާ، އައިޓީބީ ބާލިން 2026 ގައި ވިޒިޓް މޯލްޑިވްސް ކޯޕަރޭޝަން އިން ރާއްޖެ އިޝްތިހާރު ކުރަން ފަށައިފިއެވެ.

މިއަހަރުގެ އައިޓީބީ ފެއަރގައި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 67 ކުންފުންޏަކުން ޖުމްލަ 159 ފަރާތަކުން ބައިވެރިވެއެވެ.

މިއަހަރުގެ ފެއަރގައި ރާއްޖެއިން ވަނީ 504 އަކަމީޓަރުގެ ބޮޑު ސްޓޭންޑެއް ތައްޔާރުކޮށްފައެވެ. މިއީ އައިޓީބީ ބާލިންގައި ރާއްޖެއިން ތައްޔާރުކުރި އެންމެ ބޮޑު ސްޓޭންޑެވެ.

މިއަހަރުގެ ފެއަރގެ ހަވާސާގައި ތަފާތު އެކި ހަރަކާތްތައް ކުރިއަށްގެންދިއުމަށް ވަނީ ރޭވިފައެވެ. އެގޮތުން ނޫސްވެރިންގެ ބައްދަލުވުމެއް ބޭއްވުމަށް ހަމަޖެހިފައިވާއިރު، މި ބައްދަލުވުމުގައި ރާއްޖޭގެ ފަތުރުވެރިކަމާ ގުޅޭ މުހިންމު ކަންތައްތަކެއް އިޝްތިހާރުކުރާނެ ކަމަށް ވިޒިޓް މޯލްޑިވްސ އިން ވަނީ ބުނެފައެވެ. މީގެ އިތުރުން، 'މޯލްޑިވިއަން ނައިޓް' ގެ ނަމުގައި ހާއްސަ ހަރަކާތެއް ރިޓްސް ކާރލްޓަން ބާލިންގައި ބޭއްވުމަށް ވަނީ ހަމަޖެހިފައެވެ. މި ހަރަކާތުގައި ބައިނަލްއަގުވާމީ މީޑިއާތަކާއި ރާއްޖޭގެ ފަތުރުވެރިކަމުގެ ދާއިރާގެ އިސް ފަރާތްތަކުން ބައިވެރިވާނެއެވެ. މީގެ އިތުރުން ވެސް ތަފާތު ހަރަކާތްތައް ކުރިއަށް ގެންދާނެއެވެ.

އައިޓީބީ ބާލިންއަކީ ދުނިޔޭގެ ފަތުރުވެރިކަމުގެ ސިނާއަތުގައި ބާއްވާ އެންމެ ބޮޑު އަދި އެންމެ ނުފޫޒުގަދަ ޓްރޭޑް ފެއަރ އެވެ. 1966 ވަނަ އަހަރުން ފެށިގެން މެދުނުކެނޑި ބާއްވަމުން އަންނަ މި ފެއަރއަކީ ދުނިޔޭގެ އެކި ކަންކޮޅުތަކުން ފަތުރުވެރިކަމުގެ ދާއިރާގެ މާހިރުންނާއި، ކުންފުނިތަކާއި، ކަމާބެހޭ ފަރާތްތައް އެއްތަނަކުން ބައްދަލުވާ މައި މަރުކަޒެވެ.