ފުލުހުން ބަލަމުންދާ މައްސަލައެއްގެ ތަހުގީގަށް މީހަކު ހޯދަން އިއުލާނުކޮށްފި

ޑްރަގް އެންޑް ސަބްސްޓެންސް އެބިއުސް ކޮންޓްރޯލުން ތަހުގީގު ކުރަމުންދާ މައްސަލައެއްގެ ތަހުގީގަށް މީހަކު ހޯދަން އިއުލާނުކޮށްފި އެވެ.

މި މައްސަލައާ ގުޅިގެން ފުލުހުން ހޯދަމުން ދަނީ، ތ. ތިމަރަފުށި / ކަށިމާގެ، އުމުރުން 33 އަހަރުގެ މުޙައްމަދު ޙައްސާން އެވެ.

ފުލުހުން ކުރި އިއުލާނުގައި ބުނީ މުޙައްމަދު ޙައްސާން ޑްރަގް އެންޑް ސަބްސްޓެންސް އެބިއުސް ކޮންޓްރޯލުން ތަހުގީގު ކުރަމުންދާ މައްސަލައެއްގެ ތަހުގީގަށް ހާޒިރުކުރަން ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާ ކަމަށެވެ. އެހެންކަމުން ، ޖިނާއި މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ތަހުގީގަށް ހާޒިރުވުމަށް އަންގާ ކަމަށް އިއުލާންގައި ބުނެފައި ވެއެވެ.

ޙައްސާން ހޯދަމުން ދަނީ މި މައްސަލައިގެ ތުހުމަތުގައި ތަހުގީގުގައި ސުވާލުކުރުމަށް ކަމަށް ފުލުހުން ބުނެއެވެ. އިއުލާނުގައި ބުނެފައިވަނީ 2026 ޖަނަވަރީ 22 ވަނަ ދުވަހުގެ 14:00އަށް، ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގއަށް އޭނާ ހާޒިރު ވުމަށް އަންގާ ކަމަށެވެ.