މި އަހަރު މުދަލު ޒަކާތުގެ ގޮތުގައި ބަލައިގަތް ޢަދަދު، މިދިޔަ އަހަރު ލިބުނު ޖުމުލަ ޢަދަދަށް ވުރެ އިތުރު!

މި އަހަރުގެ މިހާތަނަށް މުދަލު ޒަކާތުގެ ގޮތުގައި ދައުލަތަށް ބަލައިގަތް ޢަދަދު، ވޭތުވެދިޔަ އަހަރު މުދަލު ޒަކާތުގެ ގޮތުގައި ލިބުނު ޖުމުލަ ޢަދަދަށް ވުރެ އިތުރުވެއްޖެއެވެ.

މޯލްޑިވްސް ޒަކާތު ހައުސްގެ ތަފާސްހިސާބުތައް ދައްކާގޮތުން މިއަހަރު ފެށިގެން ސެޕްޓެންބަރު މަހުގެ ނިޔަލަށް މުދަލު ޒަކާތުގެ ގޮތުގައި ޖުމުލަ 109,262,025.69 (އެއްސަތޭކަ ނުވަ މިލިއަން ދެލައްކަ ފަސްދޮޅަސް ދެހާސް ފަންސަވީސް ރުފިޔާ ފަސްދޮޅަސް ނުވަ ލާރި) ވަނީ ބަލައިގަނެފައެވެ. މިއީ މިދިޔަ އަހަރު މުދަލު ޒަކާތުގެ ގޮތުގައި ލިބުނު 106,456,071.00 (އެއްސަތޭކަ ހަ މިލިއަން ހަތަރުސަތޭކަ ފަންސާސް ހަ ހާސް ހަތްދިހަ އެކެއް) ރުފިޔާއަށް ވުރެ 2,805,954.69 (ދެ މިލިއަން އަށް ސަތޭކަ ފަސް ހާސް ނުވަ ސަތޭކަ ފަންސާސް ހަތަރެއް ޕޮއިންޓް ހައެއް ނުވަ) ރުފިޔާ އިތުރު ޢަދަދެކެވެ. މިއީ މިދިޔަ އަހަރުގެ ޖުމްލަ ޢަދަދާ އަޅާބަލާއިރު 2.64 އިންސައްތައިގެ ކުރިއެރުމެކެވެ.

ޒަކާތު ހައުސްއިން ހާމަކުރައްވާފައިވާ ގޮތުގައި މުދަލު ޒަކާތް ދައުލަތަށް ބަލައިގަންނަނީ ދިވެހި ރުފިޔާ އަދި ޔޫ.އެސް ޑޮލަރުންނެވެ. އެގޮތުން ނިމިދިޔަ ސެޕްޓެންބަރު މަހުގެ ނިޔަލަށް ދިވެހި ރުފިޔާއިން ޖުމްލަ 108,739,116.62 (ސަތޭކަ އަށް މިލިއަން، ހަތްސަތޭކަ ތިރީސް ނުވަ ހާސް، ސަތޭކަ ސޯޅަ ރުފިޔާ ފަސްދޮޅަސް ދެ ލާރި) ރުފިޔާ ލިބިފައިވާއިރު، ޑޮލަރުން ލިބިފައިވަނީ 34,021.41 (ތިރީސް ހަތަރު ހާސް އެކާވީސް ޕޮއިންޓް ހަތަރެއް އެކެއް) ޔޫ.އެސް ޑޮލަރެވެ.

މިދިޔަ އަހަރު ލިބުނު ޖުމްލަ ޢަދަދު މިހާރު ފަހަނައަޅައި ގޮސްފައިވާއިރު، މި އަހަރު ނިމެން އަދި ބާކީ ތިން މަސްދުވަސް އެބައޮތެވެ. އެހެންކަމުން މިއަހަރު ނިމޭއިރު، މުދަލު ޒަކާތުގެ ގޮތުގައި ދައުލަތަށް ލިބޭ މިންވަރު މިދިޔަ އަހަރަށްވުރެ ބޮޑުތަނުން އިތުރުވެގެންދާނެ ކަމަށް ޒަކާތު ހައުސްއިން ލަފާކުރެއެވެ.

މުދަލުގެ ޒަކާތަކީ އިސްލާމްދީނުގެ ރުކުނަކަށްވާއިރު، އެމީހެއްގެ މުދަލުގައި ނިޞާބު ހަމަވާތާ ހިޖުރީ ގޮތުން އަހަރެއް ފުރިފައިވާ ކޮންމެ މުސްލިމެއްގެ މައްޗަށް އެ ޒަކާތް ނެރުމަކީ ދީނީ ގޮތުން ވާޖިބު ކަމެކެވެ. މުދަލުގެ ޒަކާތް އަހަރުގެ ކޮންމެ ދުވަސްވަރެއްގައިވެސް ދެއްކޭނެ އިންތިޒާމު ވަނީ ހަމަޖެހިފައެވެ. މުދަލު ޒަކާތުގެ ނިޞާބަކީ ތިމާގެ މުދަލުގައި އެ މިންވަރެއް ހަމަވުމުން ޒަކާތް ނެރުން ވާޖިބުވާ އެންމެ މަދު މިންވަރެވެ. އެގޮތުން މިދިޔަ ސެޕްޓެންބަރު މަހުގެ 20 ވަނަ ދުވަހުން ފެށިގެން ރާއްޖޭގައި މުދަލު ޒަކާތް ނެރުން ވާޖިބުވާ ނިޞާބަކީ، 19،266.10 (ނަވާރަހާސް ދުއިސައްތަ ފަސްދޮޅަސް ހަ ރުފިޔާ ދިހަ ލާރި) އެވެ.

ރާއްޖޭގައި މުދަލު ޒަކާތް ބަލައިގަތުމުގެ އެންމެހައި އިންތިޒާމުތައް ހަމަޖައްސަނީ ދައުލަތުގެ ޓެކްސް އިދާރާ (މީރާ) މެދުވެރިކޮށެވެ. މީރާގެ އޮންލައިން ޕޯޓަލް މެދުވެރިކޮށް ފަސޭހަކަމާއެކު ޒަކާތް ދެއްކޭއިރު، ކޮންމެ މީހަކުވެސް މުދަލު ޒަކާތް ދައްކަން ޖެހޭ މިންވަރު ބަލާލުމުގެ ޚިދުމަތް މީރާގެ ވެބްސައިޓުން ލިބެން ހުރެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ ޒަކާތުގެ ނިޒާމު ހަރުދަނާކޮށް، އޭގެ ފައިދާ އެންމެ ޙައްޤުވެރި ފަރާތްތަކަށް ފޯރުކޮށްދިނުމަށްޓަކައި ޚާއްޞަ އިސްކަމެއް ދެއްވައިގެން "މޯލްޑިވްސް ޒަކާތު ހައުސް" ގެ ނަމުގައި ވަކި އިދާރާއެއް އުފައްދަވާފައެވެ. މި ފިޔަވަޅާއެކު ޒަކާތާ މެދު ރައްޔިތުންގެ ހޭލުންތެރިކަން އިތުރުވެ، ޒަކާތް ދައްކާ ފަރާތްތަކުގެ ޢަދަދު ވަނީ ފާހަގަކޮށްލެވޭ މިންވަރަކަށް އިތުރުވާން ފަށާފައެވެ.