ޛިކުރުކުރުމަކީ ހަމައެކަނި މިސްކިތުގައި ކުރާ ކަމެއް ނޫން، ކޮންމެ ޙާލަތެއްގައި ވެސް ޛިކުރުކުރެވިދާނެ: ޚުޠުބާ

މާތް ﷲ އަށް ޛިކުރުކުރުމަކީ ހަމައެކަނި މިސްކިތުގައި އިނދެގެން ކުރަންޖެހޭ ކަމެއް ނޫން ކަމަށާއި، ދިރިއުޅުމުގެ ކޮންމެ ޙާލަތެއްގައި ވެސް ޛިކުރުކުރެވިދާނެ ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.

ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުޠުބާ ޚާއްޞަކޮށްފައިވަނީ "ގިނަގިނައިން ﷲ ހަނދުމަކުރުން" މި މަޢޫޟޫޢަށެވެ.

ޚުޠުބާގައި ފާހަގަކުރެއްވި ގޮތުގައި، ހިނގާފައި ދާއިރުއާއި، ސަވާރީއެއްގައި ދަތުރުކުރާއިރު އަދި އޮށޯވެ އޮންނަ އިރުވެސް ޛިކުރުކުރެވިދާނެއެވެ. އަދި މަސައްކަތުގެ މައިދާނުގައި އުޅޭ ވަގުތުތަކުގައި ވެސް ޛިކުރުކުރުމަކީ ކުރެވިދާނެ ކަމެކެވެ. އެހެންކަމުން، ދުނިޔެއާއި އާޚިރަތުގެ ބާއްޖަވެރިކަމަށް އެދޭ މީހާގެ ދޫ އަބަދުވެސް އޮންނަންވާނީ މާތް ﷲ އަށް ޛިކުރުކުރުން މަތީގައި ކަމަށް ޚުޠުބާގައި ނަޞޭޙަތްތެރިވިއެވެ.

މާތް ﷲ ހަނދުމަކުރުމަކީ ހަމައެކަނި ދުލުން ކިޔާލާ ކަލިމަތަކެއް ނޫންކަން ފާހަގަކުރައްވައި ޚުޠުބާގައި ވިދާޅުވީ، ޙަޤީޤީ ޛިކުރަކީ ދުލުން ކިޔާ ކަލިމަތަކާއެކު ހިތްވެސް އެކަމަށް ޙާޟިރުކުރުން ކަމަށެވެ. އަދި މާތް ﷲ ނަހީކުރެއްވި ފާފައަކާ ދިމާއަށް ދެވޭ ހިނދު، އެކަލާނގެ މަތިން ހަނދުމަކޮށް އެ ފާފައަކާ ދުރުހެލިވުމަކީ ވެސް ޛިކުރުގެ ތެރޭގައި ހިމެނޭ ކަމެއް ކަމުގައި ބަޔާންކުރެއްވިއެވެ.

ޚުޠުބާގައި ބަޔާންކުރެއްވި ގޮތުގައި މާތް ﷲ ހަނދުމަކުރުން މައިގަނޑު ތިން ބަޔަކަށް ބެހިގެންވެއެވެ:

• ހިތުގެ އިޚްލާޞްތެރިކަމާއެކު ހަނދުމަކުރުން: މިއީ މާތް ﷲ ގެ ކުޅަދުންވަންތަކަމާއި ކައުނުގައިވާ އެކަލާނގެ އުފެއްދުންތަކާ މެދު ފުންކޮށް ފިކުރުހިންގުމެވެ. އަދި ތިމާ ކުރާ ކޮންމެ ކަމެއް އެކަލާނގެ ބައްލަވައިވޮޑިގެންވާކަން ދަނެ، ބިރުވެތިވުމާއި، ލޯބިވުމާއި، ވަކީލުކުރުމުގެ ސިފަ ހިތުގައި ވަރުގަދަކުރުމެވެ.
• ދުލުން ޛިކުރުކުރުން: މާތް ﷲ ގެ މަތިވެރިކަން ބަޔާންކޮށް ޙަމްދާއި ޘަނާގެ ކަލިމަތައް ކިޔުމެވެ. މީގެ ތެރޭގައި ޤުރްއާން ކިޔެވުމާއި، ތަސްބީޙަ ކިޔުމާއި، އިސްތިޣްފާރުކުރުމުގެ އިތުރުން ކީރިތި ރަސޫލާ ﷺ ގެ މައްޗަށް ޞަލަވާތް ކިޔެވުން ހިމެނެއެވެ.
• ޢަމަލީ ގޮތުން ނުވަތަ ގުނަވަންތަކުން ހަނދުމަކުރުން: ފަރުޟު ފަސް ނަމާދު އަދާކުރުމާއި، ރޯދަހިފުމާއި، ޒަކާތް ދިނުމާއި، ޙައްޖާއި ޢުމްރާގެ އަޅުކަން ފުރިހަމަކުރުމެވެ. އަދި މައިންބަފައިންނަށް އޯގާތެރިވުމާއި، މީސްތަކުންނަށް އެހީތެރިވެ ހެޔޮ ފޯރުވުމަކީ ވެސް ޢަމަލުން މާތް ﷲ ހަނދުމަކުރުމެވެ.

ޛިކުރުކުރުމުގެ މާތްކަމާއި ފައިދާތަކަށް އަލިއަޅުއްވާލައްވަމުން ޚުޠުބާގައި ވިދާޅުވީ، ޛިކުރުކުރުމަކީ މަރުވެފައިވާ ހިތްތަކަށް ދިރުންދީ، ޣާފިލުކަމުގެ ނިދީން އިންސާނާ ހޭލައްވައިދޭ ކަމެއް ކަމަށެވެ. އެހެނީ ޛިކުރަކީ ހިތުގެ ކާނާއެވެ. އަދި ޛިކުރުކުރުމުގެ ސަބަބުން ހަށިގަނޑަށް ދިރުމާއި ބާރު ލިބި، މޫނުމަތީގެ އުޖާލާކަމާއި ހައިބަތު ފާޅުވެގެންދާނެ ކަމަށާއި، މާތް ﷲ އަށް އޮންނަ ލޯތްބާއި އެކަލާނގެ މަތިވެރިކަން ހިތުގައި ބިންވަޅުނެގި، އެކަލާނގެ ޙަޟްރަތަށް ކުއްތަންވުމުގެ މަގު ފަހިވެގެންދާނެ ކަމަށް ވެސް މިއަދުގެ ހުކުރު ޚުޠުބާގައި ވަނީ ވިދާޅުވެފައެވެ.