މިއޮތް އަނިޔާވެރި، ލާހޫރޭ ސަރުކާރު ހަމަމަގަށް އަޅުވާނެ މަގުޗާޓު ކުރަހާނީ އެމްޑީޕީ: ޝާހިދު

ދިވެހިރާއްޖޭގައި މިހާރު އޮތް އަނިޔާވެރި އަދި ލާހޫރޭ ސަރުކާރު ހަމަމަގަށް އަޅުވައި، 2028 ވަނަ އަހަރު އަލުން ވެރިކަމަށް އައުމަށްޓަކައި އެކުލަވާލަންޖެހޭ ސިޔާސީ މަގުޗާޓު ކުރަހާނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކަމަށް އެ ޕާޓީގެ ކުރީގެ ރައީސް އަދި ކުރީގެ ފޮރިން މިނިސްޓަރު ޢަބްދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ އެމްޑީޕީގެ ފަސްވަނަ ކޮންގްރެސް ފެށުމާ ގުޅިގެން ރޭ ސޯޝަލް މީޑިއާ ޕްލެޓްފޯމް އެކްސްގައި ހިއްސާކުރެއްވި ޕޯސްޓެއްގައެވެ.

އެމްޑީޕީގެ ކޮންގްރެސްގައި ބައިވެރިވުމަށް ރާއްޖޭގެ އެކި ކަންކޮޅުތަކުން މާލެ ވަޑައިގެންނެވި މަންދޫބުންނަށް މަރުޙަބާ ދަންނަވަމުން ޝާހިދު ވިދާޅުވީ، ރާއްޖޭގެ އެކި ހިސާބުތަކުން ވަޑައިގެންނެވި ޕާޓީގެ އިސްސަފުގެ ބޭފުޅުންނާ އެއްފުރާޅެއްގެ ދަށުން ބައްދަލުވުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށެވެ. އަދި ތިން ދުވަހުގެ މުއްދަތަށް ކުރިއަށްދާ މި ކޮންގްރެސް އިން ނިންމާ ނިންމުންތަކަކީ ޤައުމާއި ޕާޓީގެ މުސްތަޤުބަލަށްޓަކައި ނިންމޭ ހަރުދަނާ ނިންމުންތަކަކަށް ވާނެ ކަމަށް އުންމީދު ކުރައްވާ ކަމަށްވެސް އޭނާ ވިދާޅުވިއެވެ.

ޝާހިދު އިތުރަށް ވިދާޅުވީ، މި ކޮންގްރެސްގެ އެންމެ މުހިންމު އެއް އަމާޒަކީ 2028 ވަނަ އަހަރު ބޭއްވޭ ރިޔާސީ އިންތިޚާބުގައި އެމްޑީޕީއަށް އަލުން ވެރިކަން ހޯދައިދިނުމަށް ބޭނުންވާ ސްޓްރެޓީޖިކް މަގުޗާޓު އެކުލަވާލުން ކަމަށެވެ. އެގޮތުން، ކުރިއަށް އޮތް ދުވަސްތަކުގައި ކޮންގްރެސްގެ ބައިވެރިން މައިގަނޑު ގޮތެއްގައި ކުރައްވާނެ މަސައްކަތަކީ އެ މަގަށް މިސްރާބު ހިފޭނޭހެން ޕާޓީގެ ސިޔާސަތުތަކާއި ކަންކަން ރޭވުން ކަމަށް ވިދާޅުވިއެވެ.

"އަޅުގަނޑުމެން ނިކުމެ މިތިބީ މި އަނިޔާވެރި ވެރިކަން ބަދަލުކުރަން. ދިވެހިރާއްޖޭގައި މި އޮތް އަނިޔާވެރި، ލާހޫރޭ ސަރުކާރު ހަމަ މަގަށް އަޅުވާނޭ މަގުޗާޓު ކުރަހާނީ އެމްޑީޕީ،" ޝާހިދު ވިދާޅުވިއެވެ.

މީގެއިތުރުން، މި ކޮންގްރެސްގެ ތެރެއިން ހުރިހާ ބައިވެރިންގެ ތަނަވަސް ޚިޔާލުތައް ފާޅުކުރައްވައި، ޕާޓީ ހަރުދަނާކޮށް ކުރިއަށް ގެންދިއުމަށް ފުރިހަމަ އެއްބާރުލުމާއި ބައިވެރިވުން ދެއްވާނެ ކަމުގެ ފުރިހަމަ ޔަޤީންކަން އެބައޮތް ކަމަށްވެސް އެމަނިކުފާނު ފާހަގަކުރެއްވިއެވެ.

ރާއްޖޭގެ އެންމެ ބޮޑު އިދިކޮޅު ޕާޓީގެ ގޮތުގައި އޮތް އެމްޑީޕީން ފަސްވަނަ ކޮންގްރެސް ބާއްވަން މި ފެށީ، 2023 ވަނަ އަހަރުގެ ރިޔާސީ އިންތިޚާބާއި 2024 ވަނަ އަހަރުގެ ރައްޔިތުންގެ މަޖިލިސް އިންތިޚާބުގައި ލިބުނު ނާކާމިޔާބީތަކަށްފަހު، ޕާޓީ އަލުން ރީ-އޮގަނައިޒްކޮށް، ސިޔާސީ ގޮތުން ވަރުގަދަ ކުރުމަށް ގިނަ މަސައްކަތްތަކެއް ކުރަމުންދާ ދަނޑިވަޅެއްގައެވެ. ރައީސް ޑރ. މުޙައްމަދު މުޢިއްޒުގެ ސަރުކާރު ވެރިކަމާ ހަވާލުވިފަހުން، ޚިޔާލުފާޅުކުރުމުގެ މިނިވަންކަމާއި، ވަޒީފާގެ ބިރުވެރިކަމާއި، އަދި އިޤްތިޞާދީ ކަންކަން މެނޭޖުކުރުމުގައި ސަރުކާރު ފެއިލްވެފައިވާ ކަމަށް ބުނެ އެމްޑީޕީން ދަނީ ސަރުކާރަށް ވަރަށް ބޮޑަށް ފާޑުކިޔަމުންނެވެ.

މި ކޮންގްރެސްއަކީ އެމްޑީޕީގެ އަސާސީ ޤަވާއިދަށް ގެންނަންޖެހޭ އިސްލާޙުތައް ގެނައުމަށާއި، ޕާޓީގެ އެތެރޭގެ ހިންގުން ހަރުދަނާކޮށް، ކުރިއަށް އޮތް ލޯކަލް ކައުންސިލް އިންތިޚާބާއި 2028 ގެ ރިޔާސީ އިންތިޚާބަށް ޕާޓީ ތައްޔާރުކުރުމަށް ބާއްވާ ވަރަށް މުހިންމު ބައްދަލުވުމެކެވެ. މުޅި ރާއްޖެއިން އެތައް ސަތޭކަ މަންދޫބުން ބައިވެރިވާ މި ކޮންގްރެސް ކުރިއަށްދާނީ ތިން ދުވަހުގެ މުއްދަތަށެވެ.