ދަރަވަންދޫއަކީ ބ. އަތޮޅުގައި މީހުން ދިރިއުޅޭ ރަށްތަކުގެ ތެރެއިން އާބާދީގެ ގޮތުން ހަތަރު ވަނައަށް އެންމެ ބޮޑު ރަށެކެވެ. ދަރަވަންދޫއަކީ މިއަތޮޅުގައި އެންމެ ފުރަތަމަ އަތޮޅުވެރިކަން ކުރި ރަށެވެ. ދަރަވަންދޫއިން އަތޮޅުވެރިކަން ބަދަލު ކުރީ 4 ޖޫން 1962 ވަނަ އަހަރު އަލްމަރްޙޫމް އިބްރާހިމް ނާސިރުގެ ވެރިކަމުގައެވެ.
އަތޮޅުގެ މެދުތެރޭގައި އިރުން ހުޅަގަށް ހަނި ދިގުކޮށް އޮންނަ މިރަށަކީ ފަތުރުވެރީންގެ މެދުގައި މަގުބޫލު މަންޒިލަކަށް ހެދުމަށް އަންނަނީ ގިނަ މަސައްކަތްތަކެއް ކުރަމުންނެވެ. ގެސްޓްހައުސް ވިޔަފާރީ ފުޅާވަމުން އަންނަ މިރަށް "މަގޭ ދަރަވަންދޫ"ގެ ގޮތުގައި ބްރޭންޑްކޮށް ވިއްކުމަށް އެ ރަށު ކައުންސިލުން ވަނީ މީގެ އަހަރުތަކެއް ކުރިން މަސައްކަތް ފަށާފައެވެ.
ބ. އަތޮޅުގައި އޮތް ހަމައެކަނި އެއާޕޯޓްގެ ޝަރަފާއެކު ދަރަވަންދޫ އެއާޕޯޓް ވެފައިވަނީ ރާއްޖޭގެ އެންމެ ޑިމާންޑު ބޮޑު ޑޮމެސްޓިކް އެއާޕޯޓަށެވެ. ރާއްޖޭގެ އެހެން ރަށްރަށެކޭ އެއްފަދައިން މި ރަށަކީ ވެސް މުރަކައިގެ ދޮންވެލިން އުފެދިފައިވާ ވަރަށް ރީތި ރަށެކެވެ. ދަރަވަންދޫއަކީ މަލަމަތި އެއްވަރު ރަށުގެ މެދުން ބޮޑު ނިކަގަހެއް ހުންނަ ރަށެކެވެ.
ބ. ދަރަވަންދޫގައި ހުންނަ އެ ރަށުގެ މޮނިއުމަންޓް
ރަށުގެ މީހުން ދިރިއުޅޭ ސަރަހައްދައްވުރެ ބޮޑީ މީހުން ދިރި ނޫޅޭ ވަލުގެ ސަރަހައްދެވެ. ދަރަވަންދޫގެ މަގުތަކަކީ ޕްލޭން ކޮށްގެން ހަދާފައިވާ މަގުތަކެކެވެ. 1950ގެ ތެރޭގައި މަލިން ދޮހުއްތުގެ އަތޮޅުވެރިކަމުގައި ދަރަވަންދޫގެ މަގުތައް ކޮށާ މަގުތަކަށް އަރާ ގެތައް ބަދަލުކޮށް މަގުތައް ސީދާކުރިއެވެ. ދަރަވަންދޫގައި އޮންނަ މަގުތަކުގެ ތެރެއިން ކުރިން ފެށިގެން މަޝްހޫރު މަގުތަކަކީ މަލަންމަގު، ބަނޑަހަމާމަގު، ހުވަދުމާމަގު، ދޭލިޔާމަގު، ކޯރުކެނޑިމަގު، ވަށާހިގާމަގު (ވަލުތެރޭގެ މަގެއް)އެވެ. ފަހުގެ މަގުތަކުގެ ތެރެއިން އާބާދުމަގު، އަމީނީމަގު، ސޯސަންމަގު ހިމެނެއެވެ.
ދަރަވަންދޫއަކީ ފެންމީރު އަދި ފެންތިލަ ރަށެކެވެ. ގުރުރަތީ ގޮތުން ހާއްސަ އެތައް ސިފައެއް ލިބިފައިވާ ދަރަވަންދުއަށް ޒިޔާރަތްކުރުމުގެ އަހަރުގެ ގޮތުގައި 2025 ވަނަ އަހަރު ފާހަގަކުރުމަށް ނިންމައި، 'ދަރަވަންދޫއަށް ޒިޔާރާތްކުރުމުގެ އަހަރު 2025' ވަނީ ރަސްމީކޮށް އިފުތިތާހުކޮށްފައެވެ.
ދަރަވަންދޫއަށް ޒިޔާރަތްކުރުމުގެ އަހަރު 2025 އަކީ އެ ރަށުގައި ފަތުރުވެރިކަން ކުރިއަރުވާ، އިތުރަށް ފުޅާކުރުމަށް 2021 ވަނަ އަހަރު ކައުންސިލުން ލިޔެފައިވާ ޕްލޭނެކެވެ. އަދި މިޕްލޭނަށް އަމަލު ކުރަން ނިންމާފައިވަނީ 2025 ވަނަ އަހަރުން ފެށިގެންނެވެ.
ބ. ދަރަވަންދޫ ޖޯލި ޕާކު ---- ފޮޓޯ: ޒިދާން މުޙައްމަދު
ދަރަވަންދޫއަށް ޒިޔާރަތްކުރުމުގެ އަހަރު 2025 އިފްތިތާހުކުރުމަށް ބޭއްވި ހަފްލާގައި ދަރަވަންދޫ ކައުންސިލްގެ ރައީސް އަލީ ސަމީހު ވިދާޅުވީ މިކަމަށްޓަކއި ޕްލޭނެއް ހެދުމަށް ވަކި ކޮމިޓީއެއް ނަގާ، އެ ކޮމިޓީގެ މަޝްވަރާއާއެކު ޕްލޭން ފައިނަލް ކޮށްފައިވާ ކަމަށެވެ. މި ޕްލޭންގެ ދަށުން އަންނަ އަހަރުގެ 12 މަހަށް ބަހާލައިގެން ރަށުގައި ފަތުރުވެރިކަން ކުރިއެރުވުމަށް އެކި ހަރަކާތްތައް ހިންގުމަށް ކަނޑައަޅާފައިވާކަމަށެވެ.
މިޕްލޭންގައި ކުރިއަށް ގެންދިޔުމަށް ނިންމާފައިވާ މުހިންމު ބައެއް ކަންތައްތަކަކީ ފަތުރުވެރިކަމުގެ ދާއިރާގައި އުޅޭ މީހުންނަށް ޓެކްނިކަލް އެހީތެރިކަން ފޯރުކޮށްދިނުމާއި ގެސްޓް ބީޗެއް ހުރިހާ ވަސީލަތްތަކާއެކު ޤާއިމުކުރުމާއި ނައިޓް ލައިފް ސެންޓަރެއް ޤާއިމުކުރުން ހިމެނެއެވެ. މީގެއިތުރުން ޑައިވް ޖެޓީއެއް ޤާއިމުކުރުމާއި ސަން ސެޓް ޑެކް ޤާއިމުކުރުމާއި އިންޓަރގްރޭޓެޑް ޓޫރިޒަމް ޒޯނެއް ކަނޑައެޅުން ހިމެނެއެވެ. އަދި ފަތުރުވެރިކަން ކުރިއެރުވުމަށް ވަކި ބޯޑެއް އެކުލަވާލުމާއި ވޯޓަރ ސްޕޯޓްސް ޤާއިމުކުރުމަށް ވަކި ޒޯނެއް ކަނޑައަޅާ ބިން ދޫކުރުމަށްވެސް ވަނީ ނިންމާފައެވެ.
ބ. ދަރަވަންދޫ މަތިން ނަގާފައިވާ ފޮޓޯއެއް
ދަރަވަންދޫ ކައުންސިލުން މިކަން ކުރަނީ ތަސައްވަރަކާ ވިސްނުމަކާއެކުއެވެ. މިއީ އަދި ނިމުން ނޫން ކަމަށާއި މިއީ ލޯކަލް ޓޫރިޒަމް ރަށުގައި ކުރިއެރުވުމަށް ކުރެވުނު މަސައްކަތުގެ ފެށުން ކަމަށް އެ ކައުންސިލުން ބުނެއެވެ.
ދަރަވަންދޫގައި އަންނަނީ 14 ގެސްޓް ހައުސް އާއި ތިން ޑައިވް ސެންޓަރު ހިންގަމުންނެވެ. އަންނަ އަހަރަކީ މިރަށަށް ޒިޔާރަތްކުރަންވީ އަހަރެވެ.
