
ދުންފަތް މަނާކުރާ އުމުރުފުރާ ކަނޑައެޅުމަށް އާންމުންގެ ޚިޔާލު ރައީސް ހޯއްދަވަނީ

އައިޝަތު އިބްރާހިމް - 03 އޭޕްރީލު 2025 - 12:28
ރާއްޖޭގައި ދުންފަތުގެ އިސްތިޢުމާލު ކުރާ ޢުމުރު ފުރާ ކަނޑައެޅުމަށް ޢާއްމުންގެ ޚިޔާލު ހޯދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުޅުވާލައިފިއެވެ.
އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވެފައިވަނީ، ދުންފަތުގެ އިސްތިޢުމާލުކުރުން މަނާކުރުމުގެ ޖީލުތަކެއް ރާއްޖޭގައި ތަންފީޒުކުރާނަމަ ދުންފަތުގެ އިސްތިޢުމާލު ކުރުމުގެ ގެއްލުންތަކުން ޒުވާނުންނާއި އަންނަން އޮތް ޖީލުތަކުގެ ޞިއްޙަތު ރައްކާތެރިކުރެވިގެން ދާނެ ކަމަށެވެ.
ރާއްޖޭގައި ދުންފަތުގެ އިސްތިޢުމާލުކުރުން ހުއްޓުވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނުހަނު ބޭނުންފުޅުވާ ކަމެކެވެ. ދިވެހި ޅަދަރިން ދުންފަތުގެ ނުރަނގަޅު އާދައިގެ ތެރެއަށް ދޫކޮށްލައިގެން ސަރުކާރެއް އޮންނަންޖެހޭ ކަމަށް ޤަބޫލުނުކުރާ ކަމަށާއި ދުންފަތުގެ އިސްތިޢުމާލުކުރުން އާދައަކަށް ނުވަނީސް އެކަން ހުއްޓުވަން ޖެހޭ ކަމަށް އެމަނިކުފާނު ވަނީ ވިދާޅުވެފައެވެ.
މި މައްސަލަ ހައްލުކުރުމަށް "ޖެނެރޭޝަން ބޭން" އެއް މުހިންމު ކަމަށާއި ކަމާބެހޭ ފަރާތްތަކާ މަޝްވަރާކޮށް، ދިރާސާކުރުމަށްފަހު ކެބިނެޓް ކަރުދާހެއް ތައްޔާރުކުރެއްވުމަށް ސިއްޙީ ވަޒީރަށް އިރުޝާދު ދެއްވާފައިވާނެ ކަމަށްވެސް ރައީސްގެ "ރައްޔިތުންނާ އެކު" ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި ވިދާޅުވިއެވެ.
ރައީސް ވިދާޅުވީ ކުރިއަށް އޮތް ޖީލު، ދުންފަތުން ސަލާމަތް ކުރުމަށް ޤާނޫނެއް ހެދުމަށް ނިންމަވާފައިވަނީ 2000ވަނަ އަހަރުން ފެށިގެން ނުވަތަ 2004ވަނަ އަހަރުން ފެށިގެން ނުވަތަ 2007 ވަނަ އަހަރުން ފެށިގެން އުފަންވެފައިވާ އަދި އުފަންވާ ކުދިންނަށް ދުންފަތް މަނާ ކުރާ ގޮތަށް ކަމަށެވެ.
އާއްމުންގެ ޙިޔާލު ހޯދުމަށް ހުޅުވާލާފައިވަނީ އެންމެ ރަނގަޅު އުމުރު ފުރާއެއް ހޯދުމަށެވެ. 2000 ވަނަ އަހަރުން ފެށިގެން ނަމަ އެއީ 25 އަހަރުން ދަށުގެ އުމުރު ފުރާއެވެ. 2004 ވަނަ އަހަރުން ފެށިގެން ނަމަ އެއީ 21 އަހަރުން ދަށުގެ އުމުރު ފުރާއެވެ. އަދި 2007ވަނަ އަހަރު ފެށިގެން ނަމަ އެއީ 18 އަހަރުން ދަށުގެ އުމުރުފުރާގެ ކުދިންނަށެވެ.
ރައީސް ވަނީ މި ތިން ގޮތް ހުށައެޅުއްވުމުގެ ފަހަތުގައިވާ ސަބަބު ވެސް ހާމަކުރައްވާފައެވެ. އެގޮތުން 18 އަހަރާއި 25 އަހަރާއި ދެމެދުގެ އުމުރުފުރާގެ މީހުން، ނުވަތަ ޒުވާނުން އެކަމުގެ ތެރޭގައި އެހާ ގިނަ ދުވަސް ނުވަނީސް، އެ ވަބާއިން ސަލާމަތް ކުރަން ފަސޭހަވާނެކަމުގައި ރައީސް ވަނީ ވިދާޅުވެފައެވެ.
ރައީސުލްޖުމްހޫރިއްޔާ ވަނީ ދުންފަތުގެ އިސްތިއުމާލުކުރާ އެހެނިހެން އުމުރުފުރާތަކުގެ މީހުންވެސް އެ އާދަ ދޫކޮށްލުމަށް އިލްތިމާސްކުރައްވާފައެވެ. އަދި ރާއްޖެއަށް ދުންފަތުގެ ބާވަތްތައް އެތެރެކޮށް، ވިޔަފާރި ކުރާ ފަރާތްތަކުން އެކަން ހުއްޓާލުމަށްވެސް އެމަނިކުފާނު އިލްތިމާސްކުރެއްވިއެވެ.