ބްރޯޑްކޮމްގެ މެމްބަރު ކަމަށް ކުރިމަތިލުމުގެ ފުރުސަތު ހުޅުވާލައިފި

މޯލްޑިވްސް ބްރޯޑްކާސްޓިން ކޮމިޝަން (އެމްބީސީ) ގެ މެމްބަރު ކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.

ރައީސް އޮފީހުން މިއަދު ބުނީ އެ ކޮމިޝަނަށް އާ މެމްބަރަކު ކުރިމަތިލުމުގެ ފުރުސަތު ހުޅުވާލީ މިވަގުތު ކޮމިޝަންގެ މެމްބަރު ކަން ކުރައްވަމުން ގެންދަވާ އެއް މެމްބަރެއްގެ ދައުރު ހަމަވާން ގާތްވެފައިވާތީ ކަމަށެވެ.

މެމްބަރުކަމަށް އެދޭ ފޯމާއި، އިގުރާރާއި، ކުށުގެ ރިކޯޑާއި ދަރަނީގެ ރިކޯޑު ފޯމު އަންނަ މަހުގެ ފަހެއް އަދި ހައެއްގައި ބަލައިގަންނާނެކަމަށް އިއުލާންގައިވެއެވެ. އެ ދެ ދުވަހު ވެސް ރައީސް އޮފީހުން ފޯމު ބަލައިގަންނާނީ ހެނދުނު 09:30 އިން މެންދުރު 12:30 އާއި ހަމައަށެވެ.

މި މަހުގެ 12 ގައިވެސް ރައީސް އޮފީހުން ވަނީ ބްރޯޑްކޮމްއަށް އައު މެމްބަރަކު އައްޔަންކުރުމަށްޓަކައި މަގާމަށް ކުރިމަތިލުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލައިފައިއެވެ.

އެއީ އެ ކޮމިޝަނުގެ ނައިބު ރައީސްގެ މަގާމް އަދާކުރައްވަމުންދިޔަ އަހްމަދު ގައިސް އެ މަގާމުން އިސްތިއުފާ ދެއްވުމާ ގުޅިގެންނެވެ.