މިހާތަނަށް 390 ހާހަށްވުރެ ގިނަ ފަތުރުވެރިން ޒިޔާރަތްކޮށްފި

މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 3 ލައްކަ 90 ހާހަށް އަރައިފިއެވެ.

ޓޫރިޒަމް މިނިސްޓްރީގެ ފަރާތުން އާއްމުކޮށްފައިވާ ތަފާސް ހިސާބުތަކުން ދައްކާގޮތުން މިއަހަރުގެ މިހާތަނަށް ރާއްޖެއަށް 390،004 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

މިއަދަދަކީ ހުސްވި އަހަރުގެ މި މުއްދަތާއި އަޅާބަލާއިރު 8.2 އިންސައްތައިގެ ކުރިއެރުމެކެވެ.

ހުސްވި އަހަރުގެ ފެބްރުއަރީ މަހުގެ 20 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކޮށްފައިވަނީ 360,401 ފަތުރުވެރިންނެވެ.

ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ ގައުމުތަކަށް ބަލާއިރު ޗައިނާ އާއި އިނގިރޭސިވިލާތާއި އިޓަލީގެ އިތުރުން ރަޝިޔާ ހިމެނެއެވެ.

މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އެތެރެވެފައިވަނީ ވެލާނާ އިންޓަރނޭޝަނަލް އެއަރޕޯޓް، ވީއައޭ މެދުވެރިކޮށެވެ.

މިހާތަނަށް ރާއްޖެއަށް ، ޗުއްޓީ ހޭދަކޮށްލުމަށް 387,594 ފަތުރުވެރިން އައިސްފައިވެއެވެ.

ވިޔަފާރީގެ ބޭނުންތަކަށް 1,345 ފަތުރުވެރިން އަދި ކްރޫޒްލައިނާތަކުން 1,065 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.

ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 7,959 ފަތުރުވެރިން އަންނައިރު، މި މަހުގެ 14 ވަނަ ދުވަހު ވަނީ ރެކޯޑު އަދަދަކަށް ފަތުރުވެރިން ޒިޔާރަތްކޮށްފައެވެ.

މި ފެބްރުއަރީ މަހުގެ 14 ވަނަ ދުވަހު ރާއްޖެއަށް 11,136 ފަތުރުވެރިން ޒިޔާރަތްކޮށްފައިވެއެވެ.