މިހާތަނަށް 350 ބުޅާ އޮޅުހިޔާއަށް ގެންދެވިއްޖެ: ވަޒީރު މާރިޔާ

ހުޅުމާލޭގައި ގާއިމްކޮށްފައިވާ އޮޅުހިޔާ ފެސިލިޓީއަށް މިހާތަނަށް 350 ބުޅާ ބަދަލުކުރެވިފައިވާ ކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.

ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، އެ ފެސިލިޓީގައި ހިމެނޭ ވެޓް ކްލިނިކްގެ ހިދުމަތްތައް މިހާރު ފެށިފައިވާ ކަމަށާއި، އެތަނަށް ގެންދެވޭ ބުޅާތައް ނިޔުޓާ ކުރުމުގެ އަމަލީ މަސައްކަތްވެސް ކުރިއަށްދާ ކަމަށެވެ.

އޮޅުހިޔާ އަކީ މާލެ ސަރަހައްދުގައި ބުޅާ ގިނަވުމުގެ ސަބަބުން ކުރިމަތިވެފައިވާ އިޖުތިމާއީ މައްސަލަތަކަށް ހައްލެއް ހޯދުމަށްޓަކައި، ސަރުކާރުން މާލެ ސިޓީ ކައުންސިލާ ގުޅިގެން ތަރައްގީކޮށްފައިވާ ހާއްސަ މަރުކަޒެކެވެ. މި ފެސިލިޓީގައި ބުޅާތައް ކަރަންޓީނު ކުރާނެ ސަރަހައްދެއްގެ އިތުރުން، ޒަމާނީ ކްލިނިކަކާއި، ލެބޯޓްރީއެއް އަދި ފާމަސީއެއްގެ ހިދުމަތް ވަނީ ގާއިމުކޮށްފައެވެ.

މިދިޔަ އަހަރުގެ ފެބްރުއަރީ މަހުގެ 28 ވަނަ ދުވަހު ހުޅުވި މި ފެސިލިޓީއަށް ބުޅާތައް ބަދަލުކުރުމުގެ މަސައްކަތް ސަރުކާރުން އަންނަނީ މެދުނުކެނޑި ކުރަމުންނެވެ.