ގެދޮރާއި އުމްރާނީ ތަރައްގީގެ ގޮތުން ގައުމު ބިނާކުރާ ފަދައިން ފިކުރާއި ސިކުނޑީގެ ގޮތުންވެސް ގައުމު ބިނާކުރުމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ގޮވާލައްވައިފި އެވެ.
އެމަނިކުފާނު މިގޮތަށް ގޮވާލެއްވީ ރާއްޖެ އިސްލާމްވި ދުވަހުގެ މުނާސަބަތުގައި މިއަދު ބޭއްވި ރަސްމީ ޖަލްސާގައި ވާހަކަދައްކަވަމުން ނެވެ.
މިއަދަކީ ރާއްޖެ އިސްލާމްވި ދުވަހުގެ އިތުރުން މުދައްރިސުންގެ ދުވަހަށް ވާތީ ރައީސްގެ ވާހަކަފުޅުގައި މުދައްރިސުންނާ ވެސް މުހާތަބުކުރައްވައި ވާހަކަފުޅު ދެއްކެވި އެވެ. އެގޮތުން، އެމަނިކުފާނު ވިދާޅުވީ އިންސާނިއްޔަތާއި، އަހުލާގާއި، މައުނަވީ ހަރުދަނާކަން އަދުގެ ޖީލުތަކުގައި އަށަގެންނެވުމަށް މުދައްރިސުންގެ އެއްބާރުލުން މުހިއްމު ކަމަށެވެ.
ރައީސް ވިދާޅުވީ ދިވެހި ދަރީންނަކީ ދިވެހި ގައުމިއްޔަތަށް އަހުލުވެރި، ދިވެހީންގެ ހަރުދަނާ، މާތް ސިފަތަކުން ޒީނަތްތެރިވެފައި ތިބި، މަސައްކަތްތެރިކަމާއި، އުފެއްދުންތެރިކަމާއި، މަސްއޫލިއްޔަތު އުފުލުމުގައި ޝައުގާއި ގާބިލުކަން ލިބިފައިތިބި ދަރީންތަކަކަށް ހަދަން ޖެހޭ ކަމަށެވެ. މިކަން ފާހަގަކުރައްވަމުން އެމަނިކުފާނު އެދިވަޑައިގެންނެވީ މުދައްރިސުންގެ އެއްބާރުލުމަށެވެ.
އެކަމުގައި އާއްމު ރައްޔިތުންގެ އެއްބާރުލުން ވެސް ބޭނުންވާނޭކަން ފާހަގަކުރައްވަމުން ރައީސް ވަނީ، އެ ފަދަ ދަރީންތަކެއް ބިނާކުރުމަށްޓަކައި، އާރާސްތުކުރަންޖެހޭ އަހުލާގީ އެތައް ބިނާއެއް އެބަހުރިކަމަށް ވިދާޅުވެފައެވެ. އަދި ކީރިތި ގުރުއާނުން އެނގޭ ފަދައިން ހާލަތު ބަދަލުކުރުމަކީ ދިވެހިންގެ އަމިއްލަ މަސްއޫލިއްޔަތެއްކަންވެސް އެމަނިކުފާނު ހަނދުމަކޮށްދެއްވި އެވެ.
ފިކުރާއި ސިކުނޑީގެ ގޮތުން ގައުމު ބިނާކުރުމުގެ ޝިއާރަކީ ރައީސުލްޖުމްހޫރިއްޔާ ތަކުރާރުކުރައްވަމުން ގެންދަވާ ޝިއާރެކެވެ. މިއަހަރުގެ ފެބްރުއަރީ މަހު އިއްވެވި ރިޔާސީ ބަޔާނުގައިވެސް ރައީސުލްޖުމްހޫރިއްޔާ ވަނީ، ދިވެހި ސަރުކާރުގެ ފަލްސަފާއަކީ، ގައުމު އާރާސްތުކޮށް ބިނާކުރާ ފަދައިން، އައުމުގެ ކޮންމެ ރައްޔިތަކުވެސް ހެޔޮގޮތުގައި ބިނާކޮށްދިނުންކަމަށް ވިދާޅުވެފަ އެވެ.
