މީޑިއާ ކޮމިޝަންގެ ރަސްމީ ލޯގޯ އިފްތިތާހްކޮށްފި

މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުގެ ރަސްމީ ލޯގޯ އިފްތިތާޙުކޮށް ބޭނުންކުރަން ފަށައިފިއެވެ.

މީޑިއާތަކާއި ބްރޯޑްކާސްޓަރުން ރެގިއުލޭޓްކުރުމަށް އަލަށް އުފެއްދި މި ކޮމިޝަނުގެ ލޯގޯ ރަސްމީކޮށް ބޭނުންކުރަން ފަށާފައިވަނީ މި މާރިޗު މަހުގެ 3 ވަނަ ދުވަހުން ފެށިގެންނެވެ. މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމް.އެމް.ބީ.ސީ) އިން ހާމަކުރެއްވި ގޮތުގައި، މި ލޯގޯ ފަރުމާކޮށްފައިވަނީ އެ މުއައްސަސާގެ މަޤްޞަދުތަކާއި ތަޞައްވުރު ރަމްޒުކޮށްދޭ ގޮތަށެވެ.

ހަތަރު މައިގަނޑު ބަޔެއްގެ މޗަށް އެކުލެވޭ މި ލޯގޯއިން ދޭހަކޮށްދޭ މާނަތަކަށް ބަލާއިރު، ލޯގޯގައި ހިމެނޭ ކޮމާކޯޅިން ރަމްޒުކޮށްދެނީ ޚިޔާލުފާޅުކުރުމުގެ މިނިވަންކަމެވެ. އަދި ބްރޯޑްކާސްޓިންގ ވޭވްސް ނުވަތަ ރާޅުތަކުން ދައްކުވައިދެނީ މަޢުލޫމާތު ފެތުރިގެންދާ ހަލުވި މިނެވެ. ލޯގޯ ހަތަރު ބަޔަކަށް ބެހިފައިވުމުން ދޭހަކޮށްދެނީ ދައުލަތުގެ ހަތަރުވަނަ ބާރުގެ ގޮތުގައި މީޑިއާ އަދާކުރާ މުހިންމު ދައުރެވެ. މީގެ އިތުރުން، ތާނަ އަކުރުތައް ކަމުގައިވާ "މ"، "ބ" އަދި "ކ" ލޯގޯގައި ހިމަނާފައިވަނީ ދިވެހި ބަހާއި ސަޤާފަތަށް އެ ކޮމިޝަނުން ދޭ ޚާއްޞަ އިސްކަން ހާމަކުރުމަށެވެ.

އެމް.އެމް.ބީ.ސީން އިތުރަށް ބަޔާންކުރި ގޮތުގައި، މި އައު ބްރޭންޑިންގއާއެކު ކޮމިޝަނުގެ އެންމެ އިސް އަމާޒަކީ ރާއްޖޭގެ މީޑިއާގެ މިނިވަންކަން ހިމާޔަތްކޮށް، ޒިންމާދާރު ނޫސްވެރިކަމެއް ބިނާކުރުމަށް ކުރަމުންދާ މަސައްކަތްތައް އައު ހަކަތައަކާއެކު އިތުރަށް ހަރުދަނާކުރުމެވެ.