އިސްލާމީ ވުޒާރާއާއި ސަޢޫދީ ގުޅިގެން ހިންގި ދަޢުވާ ޕްރޮގްރާމް ނިންމާލައިފި

ދިވެހިރާއްޖޭގެ އިސްލާމީކަންތައްތަކާ ބެހޭ ވުޒާރާއާއި، ސަޢޫދީ ޢަރަބިއްޔާގެ މިނިސްޓްރީ އޮފް އިސްލާމިކް އެފެއާޒް، ދަޢުވާ އެންޑް ގައިޑެންސް ގުޅިގެން ރާއްޖޭގައި ސިލްސިލާކޮށް ކުރިއަށްގެންދާ ޢިލްމީ ދައުރާ ޕްރޮގްރާމް ކާމިޔާބުކަމާއެކު ނިންމާލައިފިއެވެ.

ދީނީ ޢިލްމު ފެތުރުމަށާއި، ދީނީ ހޭލުންތެރިކަން އިތުރުކުރުމުގެ މަޤްޞަދުގައި ކުރިއަށްގެންދިޔަ މި ޕްރޮގްރާމުގެ ސެޝަންތައް ނަންގަވައިދެއްވީ މިކަމަށް ޚާއްޞަވެގެން ސަޢޫދީ ޢަރަބިއްޔާއިން ރާއްޖެ ވަޑައިގެންނެވި ފުންނާބުއުސް ދީނީ ޢިލްމުވެރިންނެވެ. މި ތަމްރީނު ޕްރޮގްރާމުގައި ރާއްޖޭގެ ދީނީ ޢިލްމުވެރިންނާއި، މިސްކިތްތަކުގެ އިމާމުންގެ އިތުރުން ގިނަ ޢަދަދެއްގެ ޒުވާން ޚަޠީބުން ބައިވެރިވެ، ޢިލްމީ މުހިންމު މަޢުލޫމާތުތަކާއި ތަޖުރިބާތައް ޙާޞިލުކުރައްވާފައިވެއެވެ.

މި ޕްރޮގްރާމް ނިންމުމުގެ ގޮތުން ބޭއްވި ޚާއްޞަ ރަސްމިއްޔާތުގައި، ދައުރާ ފުރިހަމަކުރެއްވި ހުރިހާ ބައިވެރިންނަށް ވަނީ އެކަމުގެ އަގުވަޒަންކޮށް ހަނދާނީ ލިޔުން ޙަވާލުކުރައްވާފައެވެ.

ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު އޮތް ޒަމާންވީ އަޚުވަންތަ ގުޅުމުގެ ތެރެއިން، ދީނީ ދާއިރާއިން ދެ ޤައުމުގެ އެއްބާރުލުން އިތުރުކުރުމަށް ފަށާފައިވާ މި ސިލްސިލާ ޕްރޮގްރާމަކީ ސަޢޫދީ ޢަރަބިއްޔާގެ އިސްލާމިކް މިނިސްޓްރީގެ ވަރަށް ބޮޑު ދީލަތި އެހީތެރިކަމަކާއެކު ކުރިއަށްގެންދެވޭ ޕްރޮގްރާމެކެވެ. މީގެ އިތުރުން، މި ޙަރަކާތްތައް އިންތިޒާމުކޮށް ކާމިޔާބުކަމާއެކު ކުރިއަށް ގެންދިއުމުގައި ދިވެހިރާއްޖޭގައި ހުންނަ ސަޢޫދީ ޢަރަބިއްޔާގެ އެމްބަސީން ދެއްވަމުން ގެންދަވާ ފުރިހަމަ އެއްބާރުލުމާއި އެހީތެރިކަން މިނިސްޓްރީން ވަނީ ޝުކުރުވެރިކަމާއެކު ފާހަގަކުރައްވާފައެވެ.

މިފަދަ ޕްރޮގްރާމްތަކަކީ ރާއްޖޭގެ ދީނީ ޢިލްމުވެރިންނާއި އިމާމުންގެ ޢިލްމީ ޤާބިލުކަން އިތުރުކޮށް، ދަޢުވަތުގެ މައިދާނުގައި ޒަމާނީ ވަޞީލަތްތަކާއެކު މަސައްކަތްކުރުމުގެ ހުނަރު އަށަގެންނެވުމަށް އެޅިގެންދާ ވަރަށް މުހިންމު ފިޔަވަޅެކެވެ.