ޖަވާބު ނުދީފިނަމަ ޓްރައިބިއުނަލުން ޣައިރުހާޒިރުގައި މައްސަލަ ކުރިއަށްގެންދަނީ

ވަޒީފާއާބެހޭ ޓްރައިބިއުނަލަށް ހުށަހެޅޭ މައްސަލަތަކުގައި ދެވޭ މުއްދަތުގެ ތެރޭގައި ޖަވާބުދާރީ ނުވެއްޖެނަމަ، މައްސަލަ ރައްދުވާ ފަރާތުގެ ގައިރު ހާޒިރުގައި މައްސަލަ ކުރިއަށްގެންދެވޭ ގޮތަށް އެ ޓްރައިބިއުނަލުގެ ގަވާއިދު އިސްލާހުކޮށްފިއެވެ.

ސަރުކާރުގެ ގެޒެޓުގައި މިހާރު ޝާއިޢުކޮށްފައިވާ ވަޒީފާއާބެހޭ ޓްރައިބިއުނަލުގެ ގަވާއިދުގެ ތިންވަނަ އިޞްލާޙުގައިވާ ގޮތުން، ގަވާއިދުގެ 33 ވަނަ މާއްދާއަށް ވަނީ ބޮޑެތި ބަދަލުތަކެއް ގެނެސްފައެވެ. އެގޮތުން، ކަނޑައެޅިފައިވާ މުއްދަތުގައި ޖަވާބު ހުށަނާޅައިފިނަމަ، އެ ފަރާތުން ޖަވާބުދާރީވާން ބޭނުންނުވަނީ ކަމަށް ބަލައި، އެ ފަރާތުގެ ޣައިރުޙާޟިރުގައި މައްސަލަ ކުރިއަށްގެންދަން ނިންމޭނެއެވެ. އަދި އެފަދައިން ނިންމާ ނިންމުން މައްސަލައިގައި ހިމެނޭ އެންމެހައި ފަރާތްތަކަށް ލިޔުމުން އަންގަންޖެހޭނެއެވެ.

މި އިޞްލާޙުގައި ބަޔާންކޮށްފައިވާ ގޮތުގައި، ޖަވާބު ހުށަހެޅުމުގެ މުއްދަތު އިތުރުކުރަން އެދޭނަމަ، މުއްދަތު ހަމަވުމުގެ ކުރިން އެކަށީގެންވާ ސަބަބު ބަޔާންކޮށް ލިޔުމުން ހުށަހަޅަންވާނެއެވެ. އަދި މަޤްބޫލު ސަބަބެއް އޮތްކަމަށް ފެންނަނަމަ، މުއްދަތު އިތުރުކޮށްދިނުމުގެ އިޚްތިޔާރު ޓްރައިބިއުނަލުގެ މަޖިލީހަށް ލިބިގެންވާ އިރު، އެ ނިންމުންވެސް ހިއްސާކުރަންވާނީ ލިޔުމުންނެވެ.

މީގެއިތުރުން، ޣައިރުޙާޟިރުގައި މައްސަލަ ކުރިއަށްގެންދިޔަ ނަމަވެސް، ޢަދުލުވެރި އަދި އިންސާފުވެރި ނިންމުމެއް ނިންމުމަށްޓަކައި މައްސަލައާ ގުޅުންހުރި އެންމެހައި ލިޔެކިޔުންތަކާއި ރެކޯޑުތައް ހުށަހެޅުމަށް އެންގުމުގެ ބާރު ޓްރައިބިއުނަލަށް ލިބިދީފައިވެއެވެ.

ގަވާއިދުގެ 33 ވަނަ މާއްދާގެ ގިނަ އަކުރުތަކަކަށް ބަދަލު ގެނެސް، ބައެއް ބައިތައް އުނިކޮށްފައިވާ މި އިޞްލާޙަށް ޢަމަލުކުރަން ފަށާނީ ގެޒެޓުގައި ޝާއިޢުކުރި ތާރީހުން ފެށިގެންނެވެ.