ސިއްޙީ ދާއިރާއާއި ގޮނޑުދޮށް ހިމާޔަތްކުރުމާ ގުޅޭގޮތުން ރާއްޖެއާއި ކުވެއިތުން މަޝްވަރާކޮށްފި

ސިއްޙީ ދާއިރާއާއި ގޮނޑުދޮށް ހިމާޔަތްކުރުން ފަދަ މުހިންމު ދާއިރާތަކުން ދެޤައުމުގެ ދެމެދުގައިވާ ގުޅުން އިތުރަށް ބަދަހިކުރުމާ ގުޅޭގޮތުން، ދިވެހިރާއްޖެއާއި ކުވެއިތުގެ މާލީ ވަޒީރުން ބައްދަލުކުރައްވައި މުހިންމު މަޝްވަރާތަކެއް ކުރައްވައިފިއެވެ.

މި ބައްދަލުވުން ބާއްވަވާފައިވަނީ ދިވެހިރާއްޖޭގެ މިނިސްޓަރ އޮފް ފައިނޭންސް އެންޑް ޕަބްލިކް އެންޓަޕްރައިސަސް ޙަސަން ޒަރީރު އަދި ކުވެއިތުގެ މާލީ ވަޒީރު ޑރ. ޔަޢުޤޫބް އަލް ސައްޔިދު އަލް ރިފާއީއާ ދެމެދުގައެވެ.

މި ބައްދަލުވުން ކުރިއަށްދިޔައީ ޤަޠަރުގެ ވެރިރަށް ދޯހާގައި މިހާރު ކުރިއަށްދާ މި އަހަރުގެ އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކް (އޭއައިއައިބީ) ގެ އަހަރީ ބައްދަލުވުމުގެ ހަވާސާގައެވެ.

މި ބައްދަލުވުމުގައި ދެ ވަޒީރުން މައިގަނޑު ގޮތެއްގައި އަލިއަޅުއްވާލައްވާފައިވަނީ ސިއްޙީ ދާއިރާއާއި ގޮނޑުދޮށް ހިމާޔަތްކުރުމުގެ ދާއިރާއިން މިހާރުވެސް ދެޤައުމުގެ ދެމެދުގައި ކުރިއަށްދާ އެއްބާރުލުންތަކުގެ މައްޗަށެވެ. އަދި ކުރިއަށް ރޭވިފައިވާ ތަރައްޤީގެ އެކި މަޝްރޫޢުތައް މެދުވެރިކޮށް، ކުވެއިތު ސަރުކާރާއި ކުވެއިތު ފަންޑް ފޯ އަރަބް އިކޮނޮމިކް ޑިވެލޮޕްމަންޓް (ކޭއެފްއޭއީޑީ) އާއެކު އޮތް ގުޅުން އިތުރަށް ހަރުދަނާކޮށް ފުޅާކުރުމަށް ހުރި ފުރުޞަތުތަކާ ގުޅޭގޮތުންވެސް ދެބޭފުޅުން ވަނީ ފުޅާ ދާއިރާއެއްގައި ޚިޔާލު ބަދަލުކުރައްވާފައެވެ.

ކުވެއިތަކީ ޒަމާނުއްސުރެ ރާއްޖޭގެ ތަރައްޤީގެ މުހިންމު ބައިވެރިއެކެވެ. ޚާއްޞަކޮށް ކުވެއިތު ފަންޑު މެދުވެރިކޮށް ރާއްޖޭގެ އެކި ކަންކޮޅުތަކުގައި ބަނދަރު ހެދުމާއި، ގޮނޑުދޮށް ހިމާޔަތްކުރުމުގެ މަޝްރޫޢުތަކުގެ އިތުރުން ސިއްޙީ ޚިދުމަތްތައް ތަރައްޤީކުރުމަށް މާލީ އެހީތެރިކަން ފޯރުކޮށްދެމުން އަންނަކަން ފާހަގަކޮށްލެވެއެވެ. މިގޮތުން ސަރުކާރުންވެސް އަންނަނީ ޢުމްރާނީ އަދި އިޤްތިޞާދީ ތަރައްޤީގެ އެކި މަޝްރޫޢުތައް ހިންގުމުގައި ބޭރުގެ މާލީ އިދާރާތަކާއި ގުޅުންހުރި ޤައުމުތަކާއެކު އޮންނަ ގުޅުން އިތުރަށް ބަދަހިކުރަމުންނެވެ.