ފިލްމު "ރޫޙް" އާއެކު އިމްރާން ހާޝްމީ އަނެއްކާވެސް ބިރުވެރި ފިލްމަކަށް!

ބޮލީވުޑްގެ މަޝްހޫރު އެކްޓަރު އިމްރާން ހާޝްމީ، ބިރުވެރި ފިލްމުތައް ކުޅުމަށް އަލުން އެނބުރި އަންނަކަން އިޢުލާންކޮށްފިއެވެ. އޭނާ ދެން އެންމެ އަވަހަށް ފެނިގެންދާނީ އަންނަ އަހަރު ރިލީޒްކުރުމަށް ހަމަޖެހިފައިވާ "ރޫހް" ކިޔާ ފިލްމަކުންނެވެ.

އިމްރާން ހާޝްމީ ކުރިން ކުޅެފައިވާ "ރާޒް: ދަ މިސްޓްރީ ކޮންޓިނިއުސް"، "އޭކް ތީ ދާޔަން" އަދި "ޑިބުކް" ފަދަ ކާމިޔާބު ބިރުވެރި ފިލްމުތަކުގެ ސަބަބުން، އޭނާގެ މި އާ ފިލްމަށް ފޭނުންގެ ބޮޑު ތަރުހީބެއް މިހާރުވެސް ލިބެމުންދެއެވެ. މި ފިލްމު އުފައްދާ ފަރާތްތަކުން ހާމަކުރާ ގޮތުގައި، މިއީ އާދަޔާޚިލާފު ބިރުވެރި ކަންތައްތަކަކާއި ހިތްގައިމު މިއުޒިކް އެކުލެވިގެންވާ، ބެލުންތެރިންނަށް މުޅިން ތަފާތު ތަޖުރިބާއެއް ގެނެސްދޭނެ ފިލްމެކެވެ.

ޚަބަރުތައް ބުނާގޮތުގައި "ރޫހް" އަކީ "މިއުޒިކަލް ހޮރޯ" ނުވަތަ މިއުޒިކާއި ބިރުވެރިކަން އެކުލެވޭ ގޮތަށް އުފައްދާ ފިލްމެކެވެ. މި ފިލްމުގައި ހިތްބިރުގަންނަ ފަދަ ހާދިސާތަކާއި، އަސަރުގަދަ މިއުޒިކީ ލަވަތަކެއް ހިމެނޭނެއެވެ. ފިލްމުގެ ވާހަކައިގެ މާ ބޮޑު ތަފްސީލެއް އަދި ހާމަކޮށްފައި ނުވި ނަމަވެސް، މިއީ ކަންތައްތަކެއް އޮޅުންބޮޅުންވެފައިވާ ސިއްރުތަކާއި، ރޫޙާނީ ކަންތައްތަކެއްގެ މައްޗަށް ބިނާކޮށް އުފައްދާ ފިލްމެއްކަމަށް ބެލެވެއެވެ. އަދި އިމްރާން ހާޝްމީގެ އެހެން ފިލްމުތަކެކޭ އެއްފަދައިން، މި ފިލްމުގައިވެސް ވަރަށް ފުރިހަމަ ލަވަތަކެއް ހިމެނޭނެ ކަމަށް އުންމީދު ކުރެވެއެވެ.

ބޮލީވުޑްގެ މަޝްހޫރު އެކްޓަރު އިމްރާން ހާޝްމީ، އިންޑިއާގެ ބިރުވެރި ފިލްމުތަކާ ބެހޭގޮތުން ވާހަކަދައްކަމުން ދާދިފަހުން ބުނެފައިވަނީ، އިންޑިއާގައި ބިރުވެރި ފިލްމުތައް އުފެއްދުމުގައި އެންމެ އެދެވޭ ކުރިއެރުމެއް އަދި ލިބިފައިނުވާ ކަމަށެވެ. މީގެ ސަބަބަކީ މި ދާއިރާއިން ތަޖުރިބާކޮށް އާ ކަންތައްތަކެއް ދައްކުވައިދޭން މަސައްކަތްކުރާ ފިލްމު އުފައްދާ ފަރާތްތައް މަދުވުންކަމަށް އޭނާ ގަބޫލުކުރެއެވެ. އިމްރާން ބުނި ގޮތުގައި، ހަމައެކަނި ކުއްލިއަކަށް ސިއްސުވާލާ މަންޒަރުތަކެއްގެ ބަދަލުގައި، ވަރުގަދަ ވާހަކައެއްގެ މައްޗަށް ބިނާކޮށްފައިވާ ފެންވަރު ރަނގަޅު ބިރުވެރި ފިލްމުތަކަށް ބެލުންތެރިން މިހާރު ތިބީ ތައްޔާރަށެވެ. އަދި އޭނާގެ އާ ފިލްމު "ރޫހް" އަކީ އިންޑިއާގެ ބިރުވެރި ފިލްމުތަކަށް އައު ދިރުމެއް ގެނެސްދޭނެ ފިލްމަކަށް ވާނެކަމަށް އޭނާ އުއްމީދުކުރެއެވެ.

އިމްރާން ހާޝްމީއަކީ ތުރިލާ، ކްރައިމް ޑްރާމާ އަދި ލޯބީގެ ފިލްމުތަކުން ބޮޑު މަގުބޫލުކަމެއް ހޯދާފައިވާ ފަންނާނެއް ނަމަވެސް، އޭނާ ކުޅެފައިވާ ބިރުވެރި ފިލްމުތަކަށް ސަޕޯޓަރުންގެ ހާއްސަ ލޯތްބެއް އަބަދުވެސް ލިބެއެވެ. މިފަދަ ގިނަ ފިލްމުތަކަކީ އެ ފިލްމުތަކުގައި ހިމެނޭ ރީތި ލަވަތަކުގެ ސަބަބުންވެސް ބެލުންތެރިންގެ ހިތްތަކުން ޖާގަ ހޯދާފައިވާ ފިލްމުތަކެކެވެ. އެހެންކަމުން، ބިރުވެރިކަމާއި ރީތި މިއުޒިކްގެ މި ގުޅުމަކީ އޭނާގެ ފިލްމީ ކެރިއަރުގެ ފާހަގަކޮށްލެވޭ ސިފައެކެވެ. "ރޫހް" އިން ވެސް މި ސިފަތައް ފެނިގެންދާއިރު، ފިލްމުގެ ވާހަކަ ގެނެސްދިނުމުގައި އައު އުކުޅުތަކެއް ފެންނާނެ ކަމަށް ބެލެވެއެވެ.

މިހާރު މި ފިލްމުގެ މަސައްކަތްތައް ކުރިއަށްދާއިރު، ފިލްމު ރިލީޒްކުރުމަށް ހަމަޖެހިފައިވަނީ 2027 ވަނަ އަހަރުގައެވެ. އެހެންކަމުން، އިމްރާން ހާޝްމީ އަލުން ބިރުވެރި ފިލްމަކުން ފެނިގެންދިއުމަށް ސަޕޯޓަރުން އަދި ކުޑަ އިންތިޒާރެއް ކުރަން ޖެހޭނެއެވެ. މިހާރުވެސް "ރޫހް" އަކީ ކުރިއަށް އޮތް ބޮލީވުޑްގެ ބިރުވެރި ފިލްމުތަކުގެ ތެރެއިން އެންމެ ގިނަ ބަޔަކު އިންތިޒާރުކުރާ އެއް ފިލްމެވެ.