ހިމަބިހި ޖެހުނު މީހުންގެ އަދަދު 269 އަށް އަރައިފި: އެޗްޕީއޭ

މިދިޔަ ހަފުތާގައި އިތުރު ފަސް މީހަކު ހިމަބިއްސަށް ޕޮޒިޓިވްވެ، މި ބަލި ޖެހުނު މީހުންގެ ޖުމްލަ އަދަދު 269 އަށް އަރާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

ރާއްޖެއިން މީގެ ނުވަ އަހަރު ކުރިން މުޅިން ނައްތާލެވިފައިވާ މި ބަލި، އަލުން ފެންނަން ފަށާފައިވަނީ މިދިޔަ ޖޫން މަހުގެ ތެރޭގައެވެ. އަދި އޭގެ ފަހުން ބަލި ޖެހޭ މީހުންގެ ނިސްބަތް އަންނަނީ އިތުރުވަމުންނެވެ.

ހިމަބިހި ފެތުރުން ހުއްޓުވުމަށްޓަކައި ކަމާބެހޭ މުއައްސަސާތަކުން ގިނަ ފިޔަވަޅުތަކެއް އަޅަމުންދާއިރު، ސަރުކާރުން ކުރިއަށްގެންދާ ހަރަކާތްތަކަށް އެއްބާރުލުން ދިނުމުގެ ގޮތުން އިންޑިއާ ސަރުކާރުން ވަނީ 20،000 ޑޯޒްގެ ހިމަބިހި ވެކްސިނާއި، ތިން ޓަނުގެ ސިއްހީ އާލާތްތައް ރާއްޖެއަށް ހަދިޔާކޮށްފައެވެ.

ބަލިން ރައްކާތެރިވުމަށް ހިންގާ ވެކްސިން ދިނުމުގެ ކެމްޕޭނުގެ ދަށުން، މިހާތަނަށް 16،368 މީހުންނަށް ވަނީ ވެކްސިން ޖަހައިދީފައެވެ.

ހިމަބިއްސަކީ ޕެރަމިކްސޯ ވައިރަސް އާއިލާގެ މޯބިލިވައިރަސް ގެ ސަބަބުން ޖެހޭ، ވަރަށް ފަސޭހައިން ގައިންގަޔަށް އަރާ ނުރައްކާތެރި ބައްޔެކެވެ.

މި ބަލި އާންމުކޮށް ކުޑަކުދިންގެ މެދުގައި ގިނަ ނަމަވެސް، ކޮންމެ އުމުރެއްގެ މީހަކަށް ވެސް މި ބަލި ޖެހުމުގެ ފުރުސަތު އޮވެއެވެ. އެހެންކަމުން، ބަލިން ރައްކާތެރިވުމުގެ ގޮތުން ވެކްސިންގެ ޑޯޒްތައް ފުރިހަމަކުރުމަށް ސިއްހީ މާހިރުން އިލްތިމާސްކުރަމުންދެއެވެ.