ހައްޔަރުކޮށްފާނެ ކަމުގެ ބިރު އޮތުމުން، އިސްރާއީލު ސިފައިން އެހެން ގައުމުތަކަށް ދަތުރުނުކުރަން އަންގައިފި
ސައިފް އަޒުހަރު - 04 ޑިސެމްބަރު 2024 - 09:11
ހައްޔަރުކޮށްފާނެ ކަމުގެ ބިރު އޮތުމުން، އިސްރާއީލު ސިފައިން ބޭރު ގައުމުތަކަށް ދަތުރުނުކުރަން، އިސްރާއީލު އަސްކަރިއްޔާއިން އަންގައިފިއެވެ.
ޚާއްސަކޮށް ޣައްޒާއަށް އަރައިގަތް ސިފައިންގެ ގްރޫޕްތަކުގައި ހިމެނޭ މީހުން އެހެން ގައުމުތަކަށް ނުދިއުމަށް އަންގާފައި ވެއެވެ.
އެއީ، ޣައްޒާގައި ސިފައިން ހިންގާފައިވާ އުދުވާނުތަކާ ގުޅިގެން އިންޓަރނޭޝަނަލް ކްރިމިނަލް ކޯޓާއި، އިންޓަރނޭޝަނަލް ކޯޓު އޮފް ޖަސްޓިސްއިން ނެރެފައިވާ އަމުރުތަކާ ގުޅިގެން، އެހެން ގައުމުތަކަށް ދަތުރުކޮށްފިނަމަ ހައްޔަރުކޮށްފާނެ ކަމުގެ ބިރު އޮތުމުން ކަމަށް ބުނެފައި ވެއެވެ.
ޣައްޒާއަށް އަރައިގަނެ ބޮޑެތި ޖަރީމާތައް ހިންގުމުގައި ބައިވެރިވެފައިވާ އިސްރާއީލު ސިފައިންގެ އޮފިސަރުންނާއި، ސިފައިންނާ ދެކޮޅަށް އެ ގައުމުތަކުގެ ކޯޓުތަކަށް ހުށަހެޅިފައިވާ 30 ވަރަކަށް މައްސަލަ، އިސްރާއީލު އަސްކަރިއްޔާއިން ފާހަގަކޮށްފައި ވެއެވެ. އޭގެ ތެރެއިން ބައެއް މައްސަލަތަކުގެ ޖިނާއީ ތަހްގީގު މިހާރުވެސް ފަށާފައި ވެއެވެ.
އެހެންވެ، އެފަދަ މައްސަލަތައް ކުރިއަށްދާ ގައުމަކަށް ސިފައިން ދަތުރުކޮށްފިނަމަ ހައްޔަރު ކުރުމުގެ ބިރު އެބައޮތް ކަމަށް އިސްރާއީލު އަސްކަރިއްޔާއިން ބުނެއެވެ.
އެހެންވެ، ސައިޕްރަސް، ސްލޮވީނިއާ އަދި ނެދަރލޭންޑްގައި މިވަގުތު ތިބި އިސްރާއީލު ސިފައިންގެ 8 މީހަކު ވީހާވެސް އަވަހަކަށް އެނބުރި އައުމަށް އަންގާފައި ވެއެވެ. އެ ސިފައިންނަކީ ޣައްޒާގައި ބޮޑެތި ޖަރީމާތައް ހިންގުމުގައި ބައިވެރިވެފައިވާ މީހުންނެވެ.
ޣައްޒާގެ އާންމުން މަރައި އަދި ގެތަކާއި ތަންތަން ގޮއްވާލުމުގެ ޖަރީމާތައް ހިންގުމުގައި ބައިވެރިވެ، އޭގެ މަންޒަރުތައް ވީޑިއޯކޮށް، އިސްރާއީލު ސިފައިންގެ އެތައް ބަޔަކު އެ ވީޑިއޯތައް އެމީހުންގެ ސޯޝަލް މީޑިއާ އެކައުންޓުތަކުގައި ޕޯސްޓްކޮށްފައި ވެއެވެ.
އެހެންވެ، އެފަދަ ހުރިހާ ވީޑިއޯތައްވެސް ޑިލީޓްކުރަން އަސްކަރިއްޔާއިން މިހާރުވަނީ އަންގާފައެވެ.
އެފަދަ ސިފައިން ބޭރު ގައުމުތަކަށް ދަތުރުކޮށްފިނަމަ ހައްޔަރުކޮށް ޝަރީއަތް ހިންގުމަށް މަގުފަހިކުރުމުގެގޮތުން، ފަލަސްތީނަށް ތާއީދުކުރާ އެކްޓިވިސްޓުން ގެންދަނީ، ސޯޝަލް މީޑިއާގައި ވީޑިއޯތައް ޕޯސްޓްކުރާ ސިފައިންގެ ނަންތަކުގެ ލިސްޓް ހަދައި، އެމީހުން ހިންގި ޖަރީމާތަކުގެ މައުލޫމާތު އެއްކުރަމުންނެވެ.
އެފަދަ ޖަރީމާތައް ހިންގި ސިފައިންގެ މައްސަލަތައް، އެކްޓިވިސްޓުން މިހާރުވެސް ވަނީ އެކި ގައުމުތަކުގެ ކޯޓުތަކަށް ހުށަހަޅާފައެވެ.
ގުޅުން ހުރި ޙަބަރުތައް
