ފަހު ދިހައެއްގެ ދެ ދުވަހަކު އެމްއެމްއޭއިން ޚިދުމަތްދޭނެ

ރަމަޟާން މަހު ފަހު ދިހައެއް ބަންދު ނަމަވެސް އާންމުންނަށާއި ބޭންކުތަކަށް ޚިދުމަތް ދިނުމަށް ފަހުދިހައިގެ 2 ދުވަހަކު އެމްއެމްއޭ ހުޅުވާނެ ކަމަށް މޯލްޑިވްސް މަނިޓަރީ އޮތޯރިޓީއިން ހާމަކޮށްފިއެވެ.

މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީއިން ބުނީ ، ރަމަޟާން މަހުގެ ފަހު ދިހައެއްގައި ޚިދުމަތް ދިނުމަށް ހަމަޖެހިފައިވަނީ މާރިޗު މަހު 11 ވަނަ ދުވަހާއި 18 ވަނަ ދުވަހު ކަމަށެވެ. އަދި މި ދެ ދުވަހު އެމްއެމްއޭއިން ޚިދުމަތް ދިނުމަށް ހަމަޖެހިފައިވަނީ، ހެނދުނު 9:00 އަކުން މެންދުރުފަހު 01:00 އަށް ކަމަށްވެސް އެ އިދާރާއިން ވިދާޅުވިއެވެ.

އެމްއެމްއޭއިންބުނެފައިވަނީ މާރިޗު މަހު 11 އަދި 18ވަނަ ދުވަހު ފައިސާ ދޫކޮށް ބަލައިގަތުމާއި، ސިޓީއާއި އެހެނިހެން ތަކެތި ބަލައިގަތުމުގެ ޚިދުމަތް ކުރިއަށް ދާނީ ހެނދުނު 9:00 އިން މެންދުރުފަހު 12:00 އަށް ކަމަށެވެ.

ރަމަޟާން މަހާއި، ޝައްވާލު މަހުގެ 7 ވަނަ ދުވަހާއި ހަމައަށް ސަރުކާރު ބަންދުނޫން ހުރިހާ ދުވަހެއްގެ ހެނދުނު 9:00 އިން މެންދުރުފަހު 13:00 އަށް އެމްއެމްއޭއިން ޚިދުމަތް ދިނުމަށް ވަނީ ހަމަޖެހިފައެވެ.

ރަމަޟާން މަހުގެ ފަހުދިހައެއް ސަރުކާރު ބަންދު ނަމަވެސް، އެކިއެކި އިދާރާތަކުން ރައްޔިތުންނަށް ކޮންމެހެން ދޭންޖެހޭ ޚިދުމަތްތައް، އެ އިދާރާތަކުން ކަނޑައަޅުއްވާ ގޮތެއްގެ މަތިން ފޯރުކޮށްދިނުމުގެ އިންތިޒާމު ކޮންމެ އަހަރަކުވެސް ދަނީ ކުރައްވަމުންނެވެ.