ބޮގޯޓާ ކޯލް ޓު އެކްޝަން ގަރާރުގައި ރާއްޖެއިން ސޮއިކޮށްފި

ބޮގޯޓާ ކޯލް ޓު އެކްޝަން ގަރާރުގައި ދިވެހިރާއްޖެއިން ރަސްމީކޮށް ސޮއިކޮށްފިއެވެ.

މި ގަރާރަކީ ކުޑަކުދިންނަށް ކުރާ އެކި ބާވަތުގެ އަނިޔާތައް ހުއްޓުވުމަށާއި، އެ ކުދިންގެ ޙައްޤުތައް ރައްކާތެރިކުރުމުގެ ނިޒާމު ހަރުދަނާކޮށް، އަނިޔާގެ ޝިކާރައަކަށްވާ ކުދިންނަށް އެހީތެރިކަން ފޯރުކޮށްދިނުމުގައި ޤައުމީ އަދި ބައިނަލްއަޤްވާމީ ފެންވަރުގައި ކުރެވޭ މަސައްކަތްތައް އިތުރަށް ހަރުދަނާކުރުމަށް އެކުލަވާލާފައިވާ މުހިންމު ގަރާރެކެވެ.

ދިވެހި ދައުލަތުގެ ފަރާތުން މި ގަރާރުގައި ސޮއިކުރެއްވީ މިނިސްޓަރ އޮފް ހެލްތް، ފެމިލީ އެންޑް ވެލްފެއަރ ޤީލާ ޢަލީ އެވެ.

"ބޮގޯޓާ ކޯލް ޓު އެކްޝަން" އަކީ، 2024 ވަނަ އަހަރުގެ ނޮވެންބަރު މަހު ކޮލަމްބިއާގެ ބޮގޯޓާގައި ބޭއްވުނު، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަޤްވާމީ މަހާސިންތާގައި ބައިވެރިވި ޤައުމުތަކުގެ އިސްނެގުމާއެކު އެކުލަވާލައި އިފްތިތާޙުކުރެވުނު ގަރާރެކެވެ.

މި ގަރާރުގެ މައިގަނޑު އަމާޒަކީ، ކުޑަކުދިންނަށް ކުރާ އަނިޔާތައް ހުއްޓުވުމަށާއި، އެފަދަ މައްސަލަތަކުގައި އެކަށީގެންވާ އަވަސް ފިޔަވަޅު އެޅޭނެ ނިޒާމެއް ބައިނަލްއަޤްވާމީ ފެންވަރުގައި ޤާއިމުކޮށް، ކުޑަކުދިންގެ ރައްކާތެރިކަން ކަށަވަރުކުރުމުގެ ޤާބިލުކަން އިތުރުކުރުމެވެ.

މީގެއިތުރުން، މި ގަރާރުގައި މައިގަނޑު ގޮތެއްގައި ބާރުއަޅާފައިވަނީ ޢިލްމީ ދިރާސާތަކާއި ހޯދުންތަކުގެ މައްޗަށް ބިނާކޮށް ރައްކާތެރިކަމުގެ ފިޔަވަޅުތައް އެޅުމަށާއި، ޤާނޫނީ އަދި ސިޔާސަތުތަކުގެ އޮނިގަނޑުތައް ހަރުދަނާކޮށް، ކުޑަކުދިން ޙިމާޔަތްކުރުމުގެ ޤައުމީ ނިޒާމުތައް އިތުރަށް ވަރުގަދަކުރުމުގެ މައްޗަށެވެ.