އާރަށް ހިޔާނާތުގެ މައްސަލައިގައި ރައީސް ޔާމީންގެ ދިފާޢީ ހެކިތައް ބަލައިނުގަތުމަށް ދައުލަތުން ކޯޓުގައި އެދިއްޖެ

ވ. އާރަށް ކުއްޔަށް ދޫކުރުމުގެ މުޢާމަލާތާ ގުޅިގެން ކުރީގެ ރައީސް ޢަބްދުﷲ ޔާމީން ޢަބްދުލް ގައްޔޫމްގެ މައްޗަށް އުފުލާފައިވާ ރިޝްވަތު ހިފުމުގެ ދަޢުވާގައި، އެމަނިކުފާނުގެ ފަރާތްޕުޅުން ހުށަހެޅުއްވި ދިފާޢީ ހެކިތައް ބަލައިނުގަތުމަށް ދައުލަތުން މިއަދު ކޯޓުގައި އެދިއްޖެއެވެ.

ކްރިމިނަލް ކޯޓުގައި މިއަދު ކުރިއަށްދިޔަ ޝަރީޢަތުގެ ކުރިން ހުށަހަޅާ ހުށަހެޅުންތަކާ ގުޅޭ އަޑުއެހުމުގައި ދައުލަތުގެ ވަކީލުން ވިދާޅުވީ، ރައީސް ޔާމީންގެ އެކައުންޓަށް ޖަމާވި އެއް މިލިއަން ޑޮލަރާ ގުޅޭގޮތުން ތަހުގީގު މަރުޙަލާގައި ސުވާލުކުރުމުން އެމަނިކުފާނު ބޭނުންކުރެއްވީ ހަނުހުރުމުގެ ހައްގު ކަމަށެވެ.

ނަމަވެސް، ޝަރީޢަތުގެ މަރުޙަލާގައި އެ ފައިސާއަކީ ޑޮލަރު މާރުކުރުމުގެ މުޢާމަލާތަކުން ލިބުނު ފައިސާ ކަމަށް ވިދާޅުވެ، އެކަން ސާބިތުކުރުމަށް ހެކި ހުށަހަޅުއްވާފައިވަނީ ޖިނާއީ އިޖުރާއަތުގެ ޤާނޫނުގެ 47 ވަނަ މާއްދާގެ (ބ) އާ ހިލާފަށް ކަމަށް ދައުލަތުން ވަނީ ފާހަގަކޮށްފައެވެ.

ރައީސް ޔާމީންގެ ފަރާތްޕުޅުން ހުށަހަޅުއްވާފައިވާ ދިފާޢީ ހެކިންނާއި ކިތާބީ ހެކިތައް ބަލައިނުގަތުމަށް ދައުލަތުން ވަނީ އެދިފައެވެ. އެގޮތުން ބަލައިނުގަތުމަށް އެދިފައިވާ ހެކިތަކުގެ ތެރޭގައި ހިމެނެނީ:

އަޙްމަދު ނަރީޝް ( ޔޫތު މިނިސްޓަރުގެ އެޑްވައިޒަރު)

ޢަބްދުﷲ ރަޝީދު

މުޙައްމަދު އިސްމާޢީލް (ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު)

މުހައްމަދު ޝާހިދު (ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު)

ޑޮލަރު މާރުކުރިކަން ސާބިތުކުރުމަށް ހުށަހެޅި ލިޔެކިޔުންތައް

ދައުލަތުގެ ހުއްޖަތް

ތަހުގީގު މަރުޙަލާގައި ދިފާޢު ބިނާކުރާނެ ގޮތެއް ހާމަނުކޮށް ހަނުހުރުމަށްފަހު، އެ މަރުޙަލާގައި ފާހަގަނުކުރާ އައު ކަންތައްތަކެއްގެ މައްޗަށް ބިނާކޮށް ޝަރީޢަތުގެ މަރުޙަލާގައި ކުއްލިއަކަށް ހެކި ހުށަނޭޅޭނެ ކަމަށް ދައުލަތުން ބަޔާންކުރިއެވެ.

ރައީސް ޔާމީންގެ ގާނޫނީ ވަކީލުން ރައްދުގައި ފާހަގަކޮށްފައިވާ ގޮތުން އެމަނިކުފާނު ފުލުހުންގެ އިދާރާއަށް ހާޒިރުކޮށްފައިވަނީ ކުރިން އެންގުމަކާ ނުލައެވެ. އަދި އެފަދަ ހާލަތެއްގައި މާލީ މުއާމަލާތްތަކާ ގުޅޭގޮތުން ސުވާލުކުރުމުން، އަމިއްލަ ނަފްސުގެ ދިފާޢުގައި ކޮންމެ މީހަކުވެސް މަސައްކަތްކުރާނެ ކަމަށާއި، އެހެންކަމުން އެފަދަ ހާލަތެއްގައި ހަނުހުރުމުގެ ހައްގު ބޭނުންކުރުމަކީ ދައުލަތުން އެ މާއްދާގެ ނާޖާއިޒު ފައިދާ ނެގުމަށް އޮތް ޖާގައެއް ނޫން ކަމަށް ވިދާޅުވިއެވެ.

ދެފަރާތުގެ ވާހަކަތަކަށްފަހު، މައްސަލަ ބައްލަވާ ގާޒީ ވިދާޅުވީ ކުރިއަށްއޮތް މަހުގެ 12 ވަނަ ދުވަހު ފުއްގިރި މައްސަލައިގެ އަޑުއެހުމެއް ބޭއްވުމަށްފަހު، އާރަށު މައްސަލައިގެ އަޑުއެހުމެއް ވެސް ކުރިއަށް ގެންދަވާނެ ކަމަށެވެ.

މިއަހަރު ނިމުމުގެ ކުރިން މި މައްސަލައިގެ ހުކުމް އިއްވައި މައްސަލަ އެއްކޮށް ނިންމަވާލައްވާނެ ކަމަށްވެސް ގާޒީ ވިދާޅުވިއެވެ.