ނަތަންޔާހޫގެ ވެރިކަން ވައްޓާލަން ޔަހޫދީންނާއި އަރަބިންގެ އިއްތިޙާދަކަށް ގޮވާލައި މުޒާހަރާކޮށްފި

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ވެރިކަން ނިމުމަކަށް ގެނައުމަށްޓަކައި، އެ ގައުމުގެ އިދިކޮޅު އިއްތިހާދުން އަރަބި ޕާޓީތަކާ އެކު އެއްބަސްވުމަކަށް އައުމަށް ގޮވާލައި ތެލް އަވީވްގެ މަގުތަކަށް އެތައް ހާސް ބަޔަކު ނުކުމެ ވަރުގަދަ މުޒާހަރާއެއް ކޮށްފިއެވެ.

ހޮނިހިރު ދުވަހު ބޭއްވި މި އެއްވުމުގެ ބައިވެރިން އޭއެފްޕީ ނިއުސް އެޖެންސީއަށް މައުލޫމާތު ދެމުން ބުނެފައިވަނީ، މިއީ ގައުމަށް ހަގީގީ ސިޔާސީ ބަދަލެއް ގެނައުމަށް ލިބޭނެ އެންމެ ފަހު ފުރުސަތު ކަމަށް ވެދާނެ ކަމަށެވެ. އަދި އިސްރާއީލުގައި އެންމެ ގިނަ ދުވަހު ބޮޑުވަޒީރުކަން ކުރައްވާފައިވާ ނަތަންޔާހޫއަކީ އަމިއްލަ މަންފާއަށްޓަކައި ކަންކަން އޮޅުވާލުމަށް ކުޅަދާނަ، މަކަރުވެރި ރޭވުންތެރިއެއްގެ ގޮތުގައި މުޒާހަރާގެ ބައިވެރިން ވަނީ ސިފަކޮށްފައެވެ.

އިދިކޮޅު މައި ލީޑަރު ގަޑީ އައިޒެންކޮޓް މީގެކުރިން އިޒްރޭލުގެ އަރަބި ޕާޓީތަކާއެކު ކޯލިޝަން ހެދުމަށް ދެކޮޅު ހެއްދެވި ނަމަވެސް، ވޭތުވެދިޔަ އަންގާރަ ދުވަހު ބޭއްވި އާންމު އިންތިޚާބުން ނުކުތް ނަތީޖާގެ ސަބަބުން، ސަރުކާރެއް އެކުލަވައިލުމަށް އެ ޕާޓީތަކުގެ އެހީތެރިކަން ހޯދުމަކީ މިހާރު އޭނާއަށް މަޖުބޫރުވެފައިވާ މަގަކަށް ވަނީ ވެފައެވެ.

ރާމަﷲ ގައި ހުރެ އަލްޖަޒީރާއަށް ރިޕޯޓުކުރި ނޫސްވެރިޔާ ނޫރު އޯޑޭ ބުނި ގޮތުގައި، އިޒްރޭލުގެ ގިނަ ރައްޔިތުން ބޭނުންވަނީ ވެރިކަން ބަދަލުކުރުމަށް ކުރި ވޯޓުގެ ނަތީޖާ އަމަލީ ގޮތުން ފެނުމަށެވެ. އަދި އައިޒެންކޮޓާއި ޔަހޫދީ އިޒްރޭލު ޕާޓީތަކުގެ އެހެން ލީޑަރުން ރައްޔިތުންގެ އަޑުއަހަންޖެހޭ ކަމަށް އެމީހުން ގަބޫލުކުރެއެވެ.

މީގެއިތުރުން، ހޮނިހިރު ދުވަހުގެ މުޒާހަރާތަކާ ދެކޮޅަށް ނަތަންޔާހޫއަށް ތާއީދުކުރާ ހަރުކަށި ފަރާތްތަކުން ވެސް މަގުތަކަށް ނުކުމެފައިވާ ކަމަށް އޯޑޭ ރިޕޯޓުކުރިއެވެ. އެ ފަރާތްތަކުން ދިޔައީ "ޓެރަރިސްޓުން" ކަމަށް ބުނާ ބަޔަކާއެކު އިޒްރޭލުގައި ސަރުކާރެއް އުފައްދައިގެން ނުވާނެ ކަމަށް ގޮވައި، އަޑުއުފުލަމުންނެވެ.

އަންގާރަ ދުވަހުގެ އިންތިޚާބުގައި ނަތަންޔާހޫގެ އިއްތިހާދަށް 53 ގޮނޑި ލިބިފައިވާއިރު، އައިޒެންކޮޓްގެ އިއްތިހާދަށް ކާމިޔާބު ކުރެވުނީ 48 ގޮނޑިއެވެ. މިއާއެކު، 120 މެންބަރުން ހިމެނޭ އިޒްރޭލުގެ ޕާލަމެންޓުގެ އަޣުލަބިއްޔަތު (61 ގޮނޑި) ހޯދައިގެން ސަރުކާރެއް އެކުލަވައިލުމުގެ ފުރުސަތު އެއްވެސް ފަރާތަކަށް އަމިއްލައަކަށް ލިބިފައެއް ނުވެއެވެ.

މި އިންތިޚާބުގައި އެ ގައުމުގެ އަރަބި ތިން ޕާޓީން ވަނީ ތާރީޚީ ބޮޑު ކާމިޔާބީއެއް ހޯދައި، ޖުމްލަ 19 ގޮނޑި ކާމިޔާބުކޮށްފައެވެ. ސެންޓްރަލް އިލެކްޝަން ކޮމިޓީގެ ތަފާސްހިސާބުތަކުން ދައްކާ ގޮތުގައި، އަރަބި ތިން ޕާޓީއެއް ހިމެނޭ އިއްތިހާދެއް ކަމަށްވާ 'ރާމް' އަދި 'ޖޮއިންޓް ލިސްޓް' އަށް ގާތްގަނޑަކަށް 840،000 މީހުން ވޯޓު ދީފައިވެއެވެ. މިއީ 2022 ވަނަ އަހަރު ބޭއްވި އިންތިޚާބާ އަޅާބަލާއިރު 64 އިންސައްތައިގެ ބޮޑު ކުރިއެރުމެކެވެ.

އަރަބި ޕާޓީތަކުން ހޯދި މި ކާމިޔާބީއާއެކު، އައިޒެންކޮޓްއާ ގުޅިގެން ކޯލިޝަނެއް އެކުލަވައިލައިފިނަމަ 67 ގޮނޑީގެ ފަހި އަޣުލަބިއްޔަތަކުން ސަރުކާރެއް އުފެއްދުމުގެ ފުރުސަތު އެބައޮތެވެ. ނަމަވެސް، އިޒްރޭލުގެ ސިޔާސީ މަސްރަހުގައި އަދިވެސް ގިނަ ބަޔަކު އަރަބި ދަރިކޮޅުގެ މީހުންނާ ގުޅިގެން ސަރުކާރެއް ހިންގުމަށް ފާޅުގައި ދެކޮޅު ހަދަމުންދާތީ، މިއީ އެ ގައުމަށް ސިޔާސީ ގޮތުން ކުރިމަތިވެފައިވާ ބޮޑު އިމްތިހާނެކެވެ.