ބްރިޖުގައި ބޯޓުތައް ޖެހުނު މައްސަލަ: ކަސްޓަމްސްގެ އިހުމާލެއް އޮތްތޯ އެންއައިސީން ބަލަން ފަށައިފި

މާލެ ކައިރީގައި އަޅާފައި އޮއްވައި އޮޔާ ގޮސް ސިނަމާލެ ބްރިޖުގައި ދެ ބޯޓެއް ޖެހުނު ހާދިސާގައި، މޯލްޑިވްސް ކަސްޓަމްސް ސާވިސްއިން އެއްވެސް ޤާނޫނަކާއި ޤަވާއިދަކާ ނުވަތަ އުސޫލަކާ ޚިލާފުވެފައިވޭތޯ ބެލުމުގެ މަސައްކަތް ނޭޝަނަލް އިންޓެގްރިޓީ ކޮމިޝަން (އެންއައިސީ) އިން ފަށައިފިއެވެ.

އެންއައިސީން ނެރުނު ބަޔާނެއްގައި ހާމަކޮށްފައިވާ ގޮތުގައި، ކަސްޓަމްސްގެ ބެލުމުގެ ދަށުގައި އޮތް ދެ ބޯޓެއް އޮޔާ ގޮސް ބްރިޖުގެ ތަނބެއްގައި ޖެހުނު މައްސަލަ އެ ކޮމިޝަނުން ބަލަން ފަށާފައިވަނީ އަމިއްލަ އިސްނެގުމުގެ (ސުއޯ މޮޓޯ) މަތިންނެވެ. މި ތަޙުޤީޤުގައި ކަސްޓަމްސް އިން ޢަމަލުކުރަންޖެހޭ އުސޫލުތަކާ ޚިލާފު ޢަމަލެއް ހިންގާފައިވޭތޯ ވަރަށް ގާތުން ބަލަމުންދާނެ ކަމަށް އެ ކޮމިޝަނުން ބުނެފައިވެއެވެ.

މި ހާދިސާގައި ހިމެނެނީ (އައިއެމްއޯ) ނަންބަރެއް ރަސްމީކޮށް ދޫކޮށްފައިނުވާ "އޭއެލް 1" ނަމަކަށް ކިޔާ ބޯޓަކާއި، ޓޯގޯގައި ރަޖިސްޓްރީކޮށްފައިވާ "އެމްޓީ ކޭޖީ 1" ނަމަކަށް ކިޔާ ތެޔޮ އުފުލާ ދެ ބޯޓެވެ. ހާލުގައި ޖެހިގެން މި ދެ ބޯޓު ރާއްޖޭގެ ކަނޑުގެ ސަރަހައްދަށް ވަދެފައިވަނީ މިދިޔަ އެޕްރީލް މަހުގެ 26 ވަނަ ދުވަހުއެވެ. އަދި މި ބޯޓުތައް މާލެ ކައިރީގައި ހަފްތާއެއްހާ ދުވަހު އޮތްއިރުވެސް، ކަމާބެހޭ އެއްވެސް ފަރާތަކަށް އަންގާފައި ނުވާކަން ވަނީ ފާހަގަކުރެވިފައެވެ.

މި ހިނގާ މެއި މަހުގެ 10 ވަނަ ދުވަހު މި ދެ ބޯޓު އޮޔާ ދިޔަ ހާދިސާގައި، އެތަނުން އެއް ބޯޓުގެ ދަގަނޑު އެންޓަނާއަކާއި ނެވިގޭޝަން ލައިޓެއް ބްރިޖުގައި ޖެހިފައިވެއެވެ. ބްރިޖުގެ ދަށުން ގޮސް މި ބޯޓު މާލޭގެ ދެކުނު ފަރާތަށް އޮޔާ ގެންދިޔައިރު، ބްރިޖުގެ މައި އޮނިގަނޑަށް ބޮޑު ގެއްލުމެއް ނުވި ނަމަވެސް ބްރިޖުގައި ކޫރުންތަކެއް އެޅިފައިވާތީ އެކަން ކަމާބެހޭ އިދާރާތަކުން ދަނީ ބަލަމުންނެވެ.

މި ދެ ބޯޓު އޮޔާ ގޮސް މާލެ އަތޮޅުން ބޭރަށް ދާތީ، އޭގައި ތިބި ނުވަ ފަޅުވެރިން އެ ރޭ ވަނީ ކަމާބެހޭ ފަރާތްތަކުން ސަލާމަތްކޮށްފައެވެ. ވަރަށް ބޮޑަށް ބާވެފައިވާ މި ދެ ބޯޓު ދިޔަވެ، މާލެ އަތޮޅުގެ އިރުން ރާއްޖޭގެ ސަރަހައްދުން 30 ނޯޓިކަލް މޭލު ބޭރަށް އަޑިއަށް ގޮސްފައިވާ ކަމަށް އެމްއެންޑީއެފުން މީގެ ކުރިން ވަނީ ވިދާޅުވެފައެވެ.