ދެކުނުގެ 4 އަތޮޅު ވައިގެ ދަތުރުން ގުޅާލަން މޯލްޑިވިއަން އިން ތައްޔާރުވެއްޖެ

އައިލެންޑް އޭވިއޭޝަނުން ރާއްޖޭގެ އެންމެ ދެކުނުގެ ހަތަރު އެއާޕޯޓެއް ގުޅުވާލުމަށްޓަކައި، އަންނަ މަހުގެ ތެރޭގައި ކަނެކްޓިން ފްލައިޓްތަކެއް ފެށުމަށް ނިންމައިފިއެވެ.

މޯލްޑިވިއަނުން އިއްޔެ ވަނީ ދެކުނުގެ އަތޮޅުތަކަށް ކުރާ މި ދަތުރުތަކުގެ އަގުތައް ރަސްމީކޮށް ހާމަކޮށްފައެވެ.

މި ދަތުރުތައް ތާވަލުކުރެވިފައިވަނީ ގަމާއި ފުވައްމުލައް ސިޓީއާ ދެމެދު، ފުވައްމުލަކުން ކާޑެއްދޫ އަދި ކޫއްޑޫއަށް، އަދި ގަމުން ކާޑެއްދޫ އާއި ކޫއްޑޫއަށެވެ.

މި ދަތުރުތަކުގެ އެއްކޮޅު ޓިކެޓުގެ އަގުތައް ހުރީ 500 ރުފިޔާ އާއި 900 ރުފިޔާއާ ދެމެދުގައެވެ.

މޯލްޑިވިއަން ދެކުނުގެ ދަތުރުތަކާއި އަގުތައް

1. ގަން - ފުވައްމުލައް - 500 ރުފިޔާ
2. ފުވައްމުލައް - ކޫއްޑޫ - 650 ރުފިޔާ
3. ފުވައްމުލައް - ކާޑެއްދޫ - 650 ރުފިޔާ
4. ގަން - ކާޑެއްދޫ - 900 ރުފިޔާ
5. ގަން - ކޫއްޑޫ - 900 ރުފިޔާ

މި އާ ދަތުރުތަކާއެކު، އައްޑޫ ސިޓީން ފެށިގެން ގއ. އަތޮޅާ ހަމައަށް ދެކުނުގެ ސަރަހައްދުތައް ވައިގެ މަގުން ގުޅާލެވިގެންދާނެ ކަމަށް މޯލްޑިވިއަން އިން ވަނީ ބުނެފައެވެ.

މޯލްޑިވިއަނުން ދަނީ ރާއްޖޭގެ އުތުރުގެ އަތޮޅުތަކަށް ސީޕްލޭންގެ ހިދުމަތް ފުޅާކުރުމަށްވެސް މަސައްކަތް ކުރަމުންނެވެ.

މޯލްޑިވިއަން އިން ނ. ވެލިދޫއަށް ސީޕްލޭންގެ ޓެސްޓް ދަތުރުތައް މިހާރު ކުރަމުންދާއިރު ، އިތުރު ސަރަހައްދުތަކަށް މި ހިދުމަތް ފެށުމަށް އެކުންފުނިން ދަނީ ތައްޔާރުވަމުންނެވެ.