އައިސީސީއަށް ދެމުންގެންދާ އިންޒާރުތަކާ ދެކޮޅަށް ފިޔަވަޅު އަޅަން ހިއުމަން ރައިޓްސް ވޮޗުން ގޮވާލައިފި
ސައިފް އަޒުހަރު - 02 ޑިސެމްބަރު 2024 - 07:12
އިންޓަރނޭޝަނަލް ކްރިމިނަލް ކޯޓުގެ އަހަރީ ބައްދަލުވުން ބާއްވާ، ހޭގްގައި ހުންނަ "ވޯރލްޑް ފޯރަމް ކޮންވެންޝަން ސެންޓަރ"
އިންޓަރނޭޝަނަލް ކްރިމިނަލް ކޯޓަށް ކުރިމަތިކުރަމުންދާ އިންޒާރުތަކަށް ރިއާޔަތްކޮށް އެކަން ހުއްޓުވަން ފިޔަވަޅުތަކެއް އެޅުމަށް، އިންސާނީ ހައްގުތަކަށް ވަކާލާތުކުރާ ބައިނަލްއަގްވާމީ ޖަމާއަތެއް ކަމަށްވާ ހިއުމަން ރައިޓްސް ވޮޗުން މެމްބަރު ގައުމުތަކަށް އިލްތިމާސްކޮށްފިއެވެ.
މިކަމަށް އިލްތިމާސްކޮށް ހިއުމަން ރައިޓްސް ވޮޗުން ބަޔާނެއް ނެރުނީ، ހޭގްގައި މިއަދު ފަށާ އިންޓަރނޭޝަނަލް ކްރިމިނަލް ކޯޓުގެ އަހަރީ އެސެމްބްލީއާ ދިމާކޮށެވެ.
ހިއުމަން ރައިޓްސް ވޮޗުން ބުނެފައިވަނީ، އިސްރާއީލުގެ ބޮޑުވަޒީރު ނަތަންޔާހޫއާއި، އޭނާގެ ސަރުކާރުގެ ކުރީގެ ޑިފެންސް މިނިސްޓަރު ގަލަންޓް އަދި ހަމާސްގެ އަސްކަރީ ގޮފީގެ ވެރިޔާ މުޙައްމަދު ދިއާބް އިބްރާހިމް އަލް-މަސްރީ ހައްޔަރުކުރުމަށް ނެރުނު އަމުރާގުޅިގެން އައިސީސީއަށް ބޮޑެތި ފިއްތުންތައް ކުރިމަތިކުރަމުން ގެންދާ ކަމަށެވެ.
އައިސީސީއަށް އިންޒާރުތައް ދެ ފަރާތްތަކުގެ ތެރޭގައި އެމެރިކާގެ ގާނޫނުހަދާ މަޖިލީހުގެ މެމްބަރުން ހިމެނޭކަން ފާހަގަކޮށް، ކޯޓުގެ އޮފިޝަލުންނާއި އަދި ކޯޓުގެ އަމުރު ތަންފީޒުކުރަން އެއްބާރުލުންދޭ ފަރާތްތަކާ ދެކޮޅަށް ދަތިކުރުމުގެ ފިޔަވަޅު އަޅާނޭކަމުގެ އިންޒާރުތައް ދީފައިވާކަންވެސް ހިއުމަން ރައިޓްސް ވޮޗުގެ ބަޔާނުގައި ފާހަގަކޮށްފައި ވެއެވެ.
ހިއުމަން ރައިޓްސް ވޮޗުގެ އިންޓަރނޭޝަނަލް ޖަސްޓިސް ޑިރެކްޓަރ ލިޒް އިވަންސަން ވިދާޅުވީ، ރަޝިޔާގެ ރައީސް ލަޑިމިއާ ޕޫޓިން އާއި ބެންޖަމިން ނަތަންޔާހޫ ހައްޔަރުކުރުމަށް ވިޔަސް އައިސީސީން އަމުރު ނެރުމަކީ، އެއްވެސް މީހަކީ ގާނޫނަށްވުރެ މަތީގައި ހުންނަ މީހެއް ނޫންކަން ހާމަވެގެންދާ ކަމެއް ކަމަށެވެ.
އެހެންވެ، މިއަދު ފަށާ އައިސީސީ މެމްބަރު ގައުމުތަކުގެ އަހަރީ ބައްދަލުވުމުގައި، އެ ކޯޓުގެ އަމުރުތައް ތަންފީޒުކުރުމާއި، އަދުލުއިންސާފު ގާއިމްކުރުމަށް ކޯޓުން ކުރަމުންދާ މަސައްކަތްތައް، އެއްވެސް ހުރަހެއް ކުރިމަތިކުރުމަކާނުލައި ކުރިއަށް ގެންދިއުމަށް މެމްބަރު ގައުމުތަކުން އަހުދުވުމަށް ހިއުމަން ރައިޓްސް ވޮޗުން އިލްތިމާސް ކޮށްފައި ވެއެވެ.
އިސްރާއީލާއި، ހަމާސްގެ ވެރިން ހައްޔަރުކުރުމަށް ނެރުނު އަމުރު ތަންފީޒުކުރުމަށް އެއްބާރުލުން ދިނުމަށް، އިންޓަރނޭޝަނަލް ކްރިމިނަލް ކޯޓުގެ ޗީފް ޕްރޮސިކިއުޓަރ ކަރިމް ޚާންވެސް، އެ ކޯޓުގެ މެމްބަރު ހުރިހާ ގައުމަކަށް ގޮވާލައްވާފައި ވެއެވެ.
އިންޓަރނޭޝަނަލް ކްމިމިނަލް ކޯޓު މުއާހަދާގައި 125 ގައުމުން ބައިވެރިވެ ސޮއިކޮށްފައިވާއިރު، އެ މުއާހަދާގެދަށުން، ހައްޔަރުކުރަން ކޯޓުން އަމުރުނެރޭ ކޮންމެ މީހަކު މެމްބަރު ގައުމަކަށް ދިޔަޔަސް، ވަގުތުން ހައްޔަރުކޮށް ޝަރީއަތް ހިންގުމަށްޓަކައި ނެދަރލޭންޑްގެ ހޭގްގައި ހުންނަ ކޯޓާ ހަވާލުކުރަން ޖެހެއެވެ.
އެކަމަކު، ނަތަންޔާހޫ ހައްޔަރު ކުރުމުގެ އަމުރު ބަލައިގަތުމަށް އިސްރާއީލާއި، އެމެރިކާއިންވަނީ ދެކޮޅު ހަދާފައެވެ.
އޭގެ ނަތީޖާއެއްގެގޮތުން، ނަތަންޔާހޫ ހައްޔަރުކުރުމަށް އައިސީސީން އަމުރު ނެރުނު އަސްލު މައްސަލަ ކަމަށްވާ، ޣައްޒާގައި ހިންގާ ނަސްލުނައްތާލުމުގެ ޖަރީމާ، ނަތަންޔާހޫ އިސްވެހުރެ ހުއްޓާނުލާ ކުރިއަށް އެބަ ގެންދެއެވެ.
ނަތަންޔާހޫއަކީ ދުނިޔޭގެ ޖިނާއީ ކޯޓަށް ބޭނުންވާ މުޖުރިމެއް ކަމަށް ކަނޑައެޅިގެން ދިއުމުންވެސް، އިސްރާއީލަށް ވާގިވެރިވާ ހުޅަނގުގެ ބައެއް ގައުމުތަކުން ގެންދަނީ، ޣައްޒާގެ އާންމުން މެރުމަށް ބަރާބަރަށް އިސްރާއީލަށް ހަތިޔާރުވެސް ފޯރުކޮށްދެމުންނެވެ.
ގުޅުން ހުރި ޙަބަރުތައް
