ސްޕެއިންގައި ހިނގި ނުރައްކާތެރި ރެއިލް އެކްސިޑެންޓް
ސްޕެއިންގެ ރޭލު އެކްސިޑެންޓު: ގެއްލުމުގެ ބަދަލަށް 20 މިލިޔަން ޔޫރޯ
ރިޟްވާން މޫސާ - 28 ޖެނުއަރީ 2026 - 05:42
ސްޕެއިންގައި ހިނގައި ދިޔަ ނުރައްކާތެރި ރެއިލް އެކްސިޑެންޓުގައި ގެއްލުންވި ފަރާތްތަކާއި އެފަރާތްތަކުގެ އާއިލާއަށް 20 މިލިއަން ޔޫރޯ ދިނުމަށް އެގައުމުގެ ސަރުކާރުން ނިންމައިފި އެވެ.
މިދިޔަ ހަފްތާގައި ހިނގި މި ނުރައްކާތެރި ރެއިލް އެކްސިޑެންޓް ހިނގާފައިވަނީ ސްޕެއިންގެ އަޑަމޫސްގަ އެވެ. އެކްސިޑެންޓުގައި 45 މީހުން މަރުވެ 150އަށްވުރެ ގިނަ މީހުންނަށް ވަނީ ޒަހަމްވެފައެވެ. އެއީ 2013ވަނަ އަހަރުގެ ފަހުން އެ ފަދަ ހާދިޘާއެއްގައި ސްޕެއިންގައިއެހާ ގިނަ މީހުން މަރުވި ޢަދަދެވެ.
ސްޕެއިންގެ ދަތުރުފަތުރާބެހޭ ވަޒީރު، އޮސްކަރ ޕުއެންޓޭ ވިދާޅުވީ މަރުވި މީހުންގެ ޢާއިލާތަކަށް 216،000 ޔޫރޯ ކުރިއަށް އޮތް ތިން މަސް ދުވަހުގެ ތެރޭގައި ދޫކުރާނެ ކަމަށެވެ.
ސަރުކާރުން އެހީގެ ގޮތުގައި ދެނީ 72،000 ޔޫރޯއާއި، އިންޝޫރަންސް ފައިސާގެ ގޮތުގައި އެޑްވާންސްކޮށް ދޫކުރާ 72،000 ޔޫރޯއާއި ކޮންމެ ފަސިންޖަރަކު ވެސް ނެގުން މަޖުބޫރު ޓްރެވަލް އިންޝޫރަންސްގެ ދަށުން ލިބޭ 72،000 ޔޫރޯއެވެ.
އަޑަމޫސްގެ ރޭލު އެކްސިޑެންޓު ހިމެނޭހެން އިތުރު ތިން ހާދިޘާއެއް އެއް ހަފްތާގެ ތެރޭގައި ސްޕެއިންގައި ހިނގާފައިވާއިރު، ދަތުރުފަތުރާ ބެހޭ ވަޒީރަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ. ސްޕެއިންގެ މައި އިދިކޮޅު ސިޔާސީ ޕާޓީ، ޕީޕަލްސް ޕާޓީއިން ވަނީ އޭނާގެ އިސްތިޢުފާއަށް ގޮވާލައިފައެވެ.
ގުޅުން ހުރި ޙަބަރުތައް
