ދަތިތަކާހުރެ އިންތިހާބަށް ކުރިމަތި ނުލެވިދާނެތީ ކަންބޮޑުވަން: އެމްޑީޕީ

އެކިއެކި ދަތިތަކާހުރެ ކުރިއަށް އޮތް ލޯކަލް ކައުންސިލް އިންތިހާބުގައި ވާދަކުރުމުގެ ފުރުސަތު ކުޑަ ވަމުންދާތީ އެކަންކަމާއި ކަންބޮޑުވާ ކަމަށް އެމްޑީޕީން ބުނެފި އެވެ.

އެމްޑީޕީން ބުނެފައި ވަނީ އެންމެ ބޮޑަށް ދަތި ވަނީ އިލެކްޝަން ކޮމިޝަނުން ދީފައިވާ މުއްދަތު ކުޑަވުމުން ކަމަށެވެ.

މީގެ އިތުރުން ކުށާއި ދަރަނީގެ ރެކޯޑު ސާފުކުރުމާއި އިލެކްޝަން ކޮމިޝަނަށް ފޯމު ހުށަހެޅުމަށް އިލެކްޝަން ކޮމިޝަނުން ދީފައި ވަނީ ކުޑަ މުއްދަތެއް ކަމަށާއި، އެކަށީގެންވާ މުއްދަތު ނެތުމަކީ ކަންބޮޑުވާ ކަމެއް ކަމުގައި އެޕާޓީން ފާހަގަ ކުރެ އެވެ.

އެހެން ސިޔާސީ ޕާޓީތަކުން އިންތިހާބުގައި ވާދަކޮށް ފޯރިގަދަ ކެމްޕެއިން ހަރަކާތްތަކެއް ކުރިއަށް ގެންދާއިރު އެމްޑީޕީން އެންމެ ފަހުން ބުނެފައި ވަނީ އެޕާޓީން ރަސްމީކޮށް ކެމްޕެއިން ފަށާނީ އަންނަ މަހުގައި ކަމަށެވެ.

އެމްޑީޕީން މިފަދަ ކަންބޮޑުވުމެއް އިލެކްޝަން ކޮމިޝަނަށް އަމާޒުކޮށްފައިވާއިރު އެހެން ސިޔާސީ ޕާޓީ ތަކާއި، އިންތިހާބުގައި އަމިއްލަ ގޮތުން ވާދަކުރައްވާ ފަރާތްތަކަށްވެސް ދީފައި ވަނީ ހަމަ ހަމަ އުސޫލުން އެއް މުއްދަތެއްކަން ފާހަގަ ކޮށްލެވެ އެވެ.

އިންތިހާބަށް ކުރިމަތި ލުމުގެ ފުރުސަތު އަދިވެސް ހުޅުވާލާފައިވާއިރު އެންމެ ފަހުގެ މުއްދަތަކަށް ހަމަޖައްސާފައި ވަނީ އަންނަ އާދީއްތަ ދުވަހުގެ 15:00 ގެ ނިޔަލަށެވެ.

މިފަހަރުގެ އިންތިހާބުގައި ޖުމްހޫރީ ޕާޓީން ވާދަ ކުރަނީ ހަމަ އެކަނި މާމިގިލީ ދާއިރާ އަށެވެ. ޖުމްހޫރީ ޕާޓީން ވަނީ އެހެން ހުރިހައި ދާއިރާއަކަށްވެސް ޕީއެންސީ ޓިކެޓުގައި ވާދަކުރައްވާ ފަރާތްތަކަށް ތާއީދު ކުރައްވާ ކަމަށް އިއުލާނުވެސް ކޮށްފަ އެވެ. މާމިގިލީ ދާއިރާ އަކީ އެޕާޓީގެ ލީޑަރު ގާސިމް އިބްރާހިމް ނިސްބަތްވެ ވަޑައިގަންނަވާ ދާއިރާ އެވެ.