ސަރުކާރުން ހުށަހަޅާފައިވާ އަރބަން ޑިވެލޮޕްމަންޓް ބިލު ފާސްކޮށްފި އެވެ.
މި ބިލަކީ ރާއްޖޭގެ އާބަން ސަރަހައްދުތައް ކަނޑައަޅައި އެފަދަ ސަރަހައްދު ތަރައްގީ ކުރުމާ ގުޅޭ ކަންކަން ގާނޫނީ އޮނިގަނޑެއްގެ ތެރެއިން އިންތިޒާމުކުރުމުގެ މަގްސަދުގައި ސަރުކާރުން ހުށަހަޅާފައިވާ ބިލެކެވެ. މިދިޔަ އޮގަސްޓު މަހުގެ 12 ވަނަ ދުވަހު މަޖިލީހަށް ހުށަހެޅި މި ބިލުގެ މަސައްކަތް މިއަދު މަޖިލީހުން ނިންމާލާފައިވާއިރު އެ ބިލު މަޖިލީހުން މިއަދު ފާސްކުރީ ވޯޓުގައި ބައިވެރިވެވަޑައިގެންނެވި 70 މެމްބަރުންގެ ވޯޓާއި އެކު އެވެ. ބިލު ފާސްކުރަން ނުފެންނަ ކަމަށް ވޯޓު ދެއްވީ އެމްޑީޕީ އަށް ނިސްބަތްވެވަޑައިގަންނަވާ 11 މެމްބަރުންނެވެ.
ސަރުކާރުގެ ފަރާތުން ވިލިނގިލީގެ ދާއިރާގެ މެމްބަރު އާޒިމް އަބްދުލް އަޒީޒް ހުށަހެޅުއްވި މި ބިލުގައިވާގޮތުން އަރބަން ސަރަހައްދުތައް ކަނޑައެޅުމާ، އަރބަން ސަރަހައްދުތައް ތަރައްގީކޮށް ހިންގުމާ ބެހޭ ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެމަތިން ރައީސުލްޖުމްހޫރިއްޔާ އެވެ. އަދި އެ ސަރަހައްދުތައް ކަނޑައެޅުމާ އެ ސަރަހައްދުތައް ތަރައްގީކޮށް ހިންގުމާބެހޭ ގައުމީ ސިޔާސަތު ކަނޑައަޅާ އާންމު ކުރަން ޖެހޭނެ ކަމަށް ބަޔާންކޮށްފައިވެ އެވެ.
އޭގެ އިތުރުން އަރބަން ސަރަހައްދުތައް ކަނޑައެޅުމުގައި އެ ސަރަހައްދުތަކުގެ ތެރޭގައި ހިމެނޭ ހުރިހާ ބިމެއް ވަކިވަކި ޒޯންތަކަށް ބަހާލައި އެއިން ކޮންމެ ޒޯނެއްގެ ބޭނުން ކަނޑައަޅަން ވާނެ ކަމަށް ބިލުގައި ބަޔާންކޮށްފައިވެ އެވެ. އަދި އެ ޒޯންތައް ވަކި ބޭނުންތަކަށް ޚާއްސަ ކުރެވިދާނެ ކަމަށް ވެސް ބިލުގައި ފާހަގަކޮށްފައިވެ އެވެ. އެގޮތުން ދިރިއުޅުމުގެ ބޭނުމަށް ޚާއްސަ ކުރެވޭ ޒޯނާ، ވިޔަފާރީގެ ބޭނުމަށް ޒޯން ޚާއްސަ ކުރުމާ، ސިނާއީ ބޭނުމަށް، ދަނޑުވެރިކަމުގެ ބޭނުމަށް، މުނިފޫހިފިލުވުމުގެ ބޭނުމަށް ޒޯން ޚާއްސަ ކުރުމުގެ އިތުރުން މިކްސްޑް ޔޫސް އަދި ރައްކާތެރިކަމާ ޚާއްސަ ބޭނުންތަކަށް ވެސް ޒޯންތައް ޚާއްސަ ކުރެވިދާނެ ކަމަށް ބިލުގައި ވެއެވެ.
