ސަރުކާރުން ކުރިއަށްގެންދާ 5 މިލިއަން ގަސް ޕްރޮޖެކްޓުގެ ދަށުން ގަސް އިންދުމުގެ ހަރަކާތުގައި ސޯޝަލް ޑިމޮކްރެޓިކް އެސް.ޑީ.އެމް އިން ބައިވެރިވެ، 750,000 (ހަތްލައްކަ ފަންސާސްހާސް) ގަސް އިންދުމުގެ ޕްލެޖްގައި މިއަދު ސޮއިކޮށްފިއެވެ.
މި ޕްލެޖްގައި ސޮއިކުރި ރަސްމިއްޔާތު ބޭއްވުނީ މިއަދު އެންވަޔަރމެންޓް މިނިސްޓްރީގައެވެ. މި ރަސްމިއްޔާތުގައި އެސް.ޑީ.އެމްގެ އިސް ފަރާތްތަކާއި، 5 މިލިއަން ގަސް ޕްރޮޖެކްޓުގެ އިސްވެރިން ބައިވެރިވިއެވެ.
ތިމާވެށި ހިމާޔަތްކުރުމަކީ އެސް.ޑީ.އެމްގެ އެންމެ އިސް އަމާޒުތަކުގެ ތެރޭގައި ހިމެނޭ ކަމެއް ކަމަށާއި، މި ޕްރޮޖެކްޓުގައި ބައިވެރިވުމަކީ އެ އަމާޒަށް ވާސިލުވުމަށް އެޅޭ މުހިންމު ފިޔަވަޅެއް ކަމަށް އެސް.ޑީ.އެމް އިން ބުނެއެވެ.
މި ރަސްމިއްޔާތުގައި މިނިސްޓަރު ވިދާޅުވީ އެސް.ޑީ.އެމް އިން މި ޕްރޮޖެކްޓުގައި ބައިވެރިވުމަކީ ވަރަށް އުފާވެރި ކަމެއް ކަމަށާއި ޕްރޮޖެކްޓުގެ ސަބަބުން ރާއްޖޭގެ ތިމާވެށި ރައްކާތެރިކުރުމަށް ބޮޑު ކުރިއެރުމެއް ލިބޭނެ ކަމަށް އުންމީދުކުރެވޭ ކަމަށެވެ.
އެސް.ޑީ.އެމްއިން މި ޕްލެޖްގެ ދަށުން އިންދާ 750,000 ގަސް، ރާއްޖޭގެ އެކި ރަށްރަށުގައި އިންދުމަށް ވަނީ ރޭވިފައެވެ.
ރާއްޖޭގައި ފަސް މިލިއަން ގަސް އިންދުމުގެ މަޝްރޫޢު އިފްތިތާހް ކުރެވިގެންދިޔައީ މިއަހަރުގެ ތިމާވެށީދުވަހުއެވެ. މިއީ މޫސުމީ ބަދަލުތަކުން ލިބޭ ގެއްލުން ކުޑަކޮށް، ރާއްޖޭގެ ތިމާވެށީގައި ނެތިދިޔުމުގެ ބިރު ހީވެފައިވާ ގަސްގަހާގެހި އާލާކޮށް، ރާއްޖެ ހޫނުވުން ކުޑަކުރުމަށް ރައީސް ޑރ. މުޙައްމަދު މުޢިއްޒު އިޢުލާންކުރެއްވި ޤައުމީ ޕްރޮގްރާމެކެވެ.
މި މަޝްރޫޢުގެ މައިގަނޑު މަޤްޞަދަކީ ރާއްޖޭގެ ތިމާވެށި ހިމާޔަތްކޮށް، މޫސުމަށް އަންނަ ބަދަލުތަކުގެ ނޭދެވޭ އަސަރުތައް ކުޑަކުރުމެވެ.
