ކާބަން ކްރެޑިޓުން ފުވައްމުލަކަށް އަހަރަކު 4.5 މިލިއަން ޑޮލަރު ލިބިދާނެ: ރައީސް ނަޝީދު

ދުނިޔޭގެ ބާޒާރުގައި ކާބަން ކްރެޑިޓް ވިއްކައިގެން ފުވައްމުލަކު ސިޓީއަށް އަހަރަކު ގާތްގަނޑަކަށް 4.5 މިލިއަން ޑޮލަރު (ގާތްގަނޑަކަށް 89 މިލިއަން ރުފިޔާ) ލިބުމުގެ ފުރުސަތު އެބައޮތް ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕާސަން އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އެމްޑީޕީން ތިން ދުވަހުގެ މުއްދަތަކަށް ކުރިޔަށްގެންދަވާ "އެމްޑީޕީ ކޮންގްރެސް 2026 ގެ "ރަށްވެހި ތަރައްގީ" އިންވެސްޓްމަންޓް ފޯރަމްގެ ދެވަނަ ސެޝަންގައި ވާހަކަފުޅު ދައްކަވަމުންނެވެ.

ރައީސް ނަޝީދު ވިދާޅުވީ، އާންމު އުސޫލުން ބަލާއިރު ކޮންމެ 10 ހެކްޓަރެއްގެ ކަނޑޫފާ ނުވަތަ މެންގްރޯވް ސަރަޙައްދަކުން އެވްރެޖްކޮށް އަހަރަކު 5،000 ޓަނުގެ ކާބަން ކްރެޑިޓް ލިބޭ ކަމަށެވެ. އަދި ފުވައްމުލަކުގައި ޖުމްލަ 494 ހެކްޓަރު އޮތްއިރު، އެ ރަށުގެ މޭޔަރު ވިދާޅުވާ ގޮތުން ރަށުގެ ތިންބައިކުޅަ އެއްބަޔަކީ މެންގްރޯވް ސަރަޙައްދު ކަމަށް ވުމާއެކު، އެ ރަށުގެ ގުދުރަތީ ވަސީލަތްތަކުން އަހަރަކު 82،500 ޓަނުގެ ކާބަން ކްރެޑިޓް އުފެއްދިދާނެ ކަމަށް އެމަނިކުފާނު ލަފާކުރެއްވިއެވެ.

މި ކްރެޑިޓްތައް ބައިނަލްއަޤްވާމީ 'ކޮމްޕްލަޔަންސް މާކެޓް' ގައި ވިއްކައިގެން، ފުވައްމުލަކަށް އަހަރަކު 4.95 މިލިއަން ޑޮލަރު ނުވަތަ ގާތްގަނޑަކަށް 89 މިލިއަން ރުފިޔާ ހޯދިދާނެ ކަމަށް އެމަނިކުފާނު ފާހަގަކުރެއްވިއެވެ.

މީގެ އިތުރުން ރައީސް ނަޝީދު ވިދާޅުވީ، މިހާރު ފުވައްމުލަކު ސިޓީގެ މުޅި ބަޖެޓަކީ 86 މިލިއަން ރުފިޔާ ކަމަށާއި، އޭގެ ތެރޭގައި ސަރުކާރުން ދޭ ބްލޮކް ގްރާންޓުގެ ގޮތުގައި ހިމެނެނީ 55 މިލިއަން ރުފިޔާ ކަމަށެވެ. އެހެންކަމުން، ކާބަން ކްރެޑިޓްގެ ވިޔަފާރީގެ ތެރެއިން ލިބޭ އާމްދަނީން ކައުންސިލްގެ ބަޖެޓަށް ބޮޑު ކުރިއެރުމެއް އަންނާނެ ކަމަށް އެމަނިކުފާނު ވިދާޅުވިއެވެ.

ހަމައެއާއެކު، އައްޑޫ ސިޓީން ވެސް މިފަދަ ގޮތަކަށް 6 މިލިއަނަށް ވުރެ ގިނަ ޑޮލަރު ޖެނެރޭޓް ކުރެވިދާނެ ކަމަށާއި، އަދި ކަނޑިތީމު ފަދަ ރަށްރަށުން ވެސް އަހަރަކު ގާތްގަނޑަކަށް އެއްލައްކަ ޑޮލަރުގެ ކާބަން ކްރެޑިޓް ހޯދުމުގެ ފުރުސަތު އޮތް ކަމަށް ރައީސް ނަޝީދު ފާހަގަކުރެއްވިއެވެ. އެހެންކަމުން ތިމާވެށި ހިމާޔަތްކޮށް، އޭގެ މަންފާ މާލީ ގޮތުން ރަށްރަށުގެ ތަރައްގީއަށް ހޯދުމަކީ މުހިންމު ކަމެއް ކަމަށް އެމަނިކުފާނު ވިދާޅުވިއެވެ.