ރާއްޖޭގެ އުތުރަށް ގުގުރުމާއެކު ވިއްސާރަކުރާނެ: މެޓް އޮފީސް

ރާއްޖޭގެ އުތުރުގެ ރަށްތަކަށް ގުގުރުމާއެކު ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާއިން ލަފާކޮށްފިއެވެ. މެޓުން ވަނީ ދެކުނާއި މެދުރާއްޖެތެރޭގެ އެކި ހިސާބުތަކަށް ކެރީގެ އަސަރު ފޯރާނެ ކަމަށާއި ބައެއް ރަށްތަކަށް ގުގުރުން އެކަށީގެންވާ ކަމަށް ވެސް ލަފާކޮށްފައެވެ.

މިއަދު ހަވީރު 18:00 އާ ހަމައަށް މެޓުން މޫސުން ލަފާކޮށްފައިވާ ގޮތަށް ބަލާއިރު އުތުރުގެ އަތޮޅުތަކަށް ގުގުރުމާއެކު ވިއްސާރަކުރާނެއެވެ. އަދި ހުޅަނގުދެކުނާއި ހުޅަނގުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެކަމަށާއި، ވިލާގަނޑުގައި ގަޑިއަކު ގާތްގަނޑަކަށް 35 މޭލު ބާރުމިނަށް ވައިގަދަވުން އެކަށީގެންވާ ކަމަށް ވެސް މެޓުން ވަނީ ލަފާކޮށްފައެވެ.

ކަނޑުތައް އާދައިގެ ވަރަކަށް ގަދަވާނެ ކަމަށް ވެސް މެޓުން ލަފާކޮށްފައިވެއެވެ. ކުރިއަށް އޮތް 24 ގަޑިއިރަށް ބަލާއިރު ބައެއް ރަށްތަކަށް ކެރީގެއަސަރު ފޯރާނެ ކަމަށާއި، އަދި ގުގުރުން އެކަށީގެންވާ ކަމަށް މެޓުން ބުނެފައިވާއިރު، ރާޅުގެ އުސްމިން 3 ފޫޓާއި 6 ފޫޓުގައި ހުންނާނެ ކަމަށް ވަނީ މެޓުން ލަފާކޮށްފައެވެ.

މެޓު އޮފީހުން ބުނީ ޢީދު ބަންދު ތެރޭގައި އުތުރާއި މެދުރާއްޖެތެރޭގެ ރަށްތަކަށް ވައިގަދަވެ، ވިއްސާރަ ކުރާނެކަމަށް ލަފާކުރެވޭ ކަމަށެވެ. އަދި ކަނޑުތައްވެސް ގަދަވާނެ ކަމަށް ވަނީ ބުނެފައެވެ.