އެޕްރީލްއިން ފެށިގެން ވީއައިއޭ އިން ފަތުރުވެރިންނަށް އީގޭޓްގެ ޚިދުމަތް

ވެލާނާ އިންޓަރނޭޝަނަލް އެއާޕޯޓު، ވީއައިއޭގެ އައު ޓާމިނަލުގައި ހަރުކޮށްފައިވާ ޒަމާނީ އީގޭޓްތަކުގެ ޚިދުމަތް އަންނަ މަހުގެ 1 ވަނަ ދުވަހުން ފެށިގެން ފަތުރުވެރިންނަށް ލިބޭނެކަމަށް ހޯމް މިނިސްޓަރު ޢަލީ އިޙުސާން ވިދާޅުވެއްޖެއެވެ.

އީ-ގޭޓްގެ ބޭނުމަކީ ވީއައިއޭ ބޭނުންކުރާ ދިވެހިންނާއި ފަތުރުވެރިން ބޯޑަރ ކޮންޓްރޯލް ކައުންޓަރުތަކުގައި ގިނައިރު ވަންދެން ކިއުގައި ހޭދަކުރަން ޖެހުން ނިމުމަކަށް ގެނައުންކަމަށް ސަރުކާރުން ވަނީ ބުނެފައެވެ.

ރައީސް އޮފީހުގައި އޮތް ނޫސްވެރިންގެ ބައްދަލުވުމެއްގައި،ހޯމް މިނިސްޓަރު އިޙުސާން ވަނީ ރާއްޖޭގެ ބޯޑަރުގެ ރައްކާތެރިކަން ވަރުގަދަކުރުމަށް ކުރެވެމުންދާ މަސައްކަތްތަކުގެ ތަފްސީލް ހާމަކުރައްވާފައެވެ.

މިނިސްޓަރ ފާހަގަކުރެއްވި ގޮތުގައި، ރައީސްގެ ވަޢުދުފުޅާ އެއްގޮތަށް މިއަހަރުގެ ޖަނަވަރީ 1 އިން ފެށިގެން ރާއްޖޭގެ މައި ބޯޑަރުގައި އީ-ގޭޓްތައް ބޭނުންކުރަން ފަށާފައިވާ ކަމަށާއި، މިހާރު ދިވެހި ރައްޔިތުންނަށް އެ ޚިދުމަތް ލިބެމުންދާ ކަމަށެވެ.

މީގެއިތުރުން، 2026 ވަނ އަހަރުގެ އޭޕްރީލް މަހުގެ 1 ވަނަ ދުވަހާ ހަމައަށް މި އީ-ގޭޓްތަކަކީ ރާއްޖެ ޒިޔާރަތްކުރާ ފަތުރުވެރިންނަށްވެސް ބޭނުންކުރެވޭނެ ވަސީލަތްތަކަކަށް ހައްދަވާނެ ކަމަށް މިނިސްޓަރު ވިދާޅުވިއެވެ. އަދި މިހާރު ބާކީ ހުރި 10 ގޭޓް ހަރުކުރުމުގެ އަމަލީ މަސައްކަތްތައް ކުރިއަށްދާކަންވެސް މިނިސްޓަރ ފާހަގަކުރެއްވިއެވެ.

ވީއައިއޭގެ އައު ޓާމިނަލުގެ އެރައިވަލް އާއި ޑިޕާޗަރ ހިމެނޭހެން ޖުމްލަ 20 ގޭޓް ހަރުކުރުމަށް ވަނީ ނިންމާފައެވެ. މީގެ ތެރެއިން ފުރަތަމަ 10 ގޭޓް ހަރުކޮށް ބޭނުންކުރަން ވަނީ ފަށާފައެވެ. މި ޚިދުމަތް ފެށިގެން ގޮސްފައިވަނީ ހަމައެކަނި ދިވެހީންނަށް ނަމަވެސް މި ޚިދުމަތް ރާއްޖެ އަންނަ ފަތުރުވެރިންނަށްވެސް ލިބޭނެގޮތަށް ހަމަޖައްސާނެކަމަށް މީގެ ކުރިން ސަރުކާރުން ވަނީ ބުނެފައެވެ.