ޤަރުނެއް ވާން ކައިރިވެފައިވާ ބަންޑާރަ މިސްކިތް ތަޅައިލުން ބަލައި ނުގަނެވޭނެ: މޭޔަރު އާޒިމް

ޤައުމެއްގެ ކާބަފައިން ދޫކޮށްފައިވާ މުހިއްމު އާސާރުތަކަކީ، އެ ޤައުމެއްގެ މޫނުބަލާ ލޯގަނޑު ކަމަށް ވާއިރު، ޤަރުނެއް ވާން ކައިރިވެފައިވާ ބަންޑާރަ މިސްކިތް ތަޅައިލުމަށް ސަރުކާރުން ނިންމި ނިންމުން އެއްގޮތަކަށް ވެސް ބަލައި ނުގަންނަ ކަމަށް މާލޭގެ މޭޔަރު އާދަމް އާޒިމް މިރޭ ވިދާޅުވެއްޖެއެވެ.

މާލޭގެ ބަންޑާރަ މިސްކިތް ހުރިތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރަމަޟާން މަހުގެ ފަހުން ފެށިގެން ދާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވަނީ ވިދާޅުވެފައެވެ. މިނިސްޓަރު ވިދާޅުވީ އެމިސްކިތް އެޅުމަށް ހަމަޖެހިފައިވަނީ ދީލަތި ފަރާތަކުގެ އެހީގައި ކަމަށެވެ.

މިކަމާ ގުޅިގެން މޭޔަރު އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ ޤައުމެއްގެ ކާބަފައިން ދޫކޮށްފައިވާ މުހިއްމު އާސާރުތަކަކީ، އެ ޤައުމެއްގެ މޫނުބަލާ ލޯގަނޑު ކަމަށް ވާއިރު، ޤަރުނެއް ވާން ކައިރިވެފައިވާ ބަންޑާރަ މިސްކިތް ތަޅައިލުމަށް ސަރުކާރުން ނިންމި ނިންމުން އެއްގޮތަކަށް ވެސް ބަލައި ނުގަންނަ ކަމަށެވެ. ވިދާޅުވީ ބާޑަރަ މިސްކިތަކީ ދިވެހިންގެ ދީނާއި ސަޤާފަތާއި ތާރީޚު ދައްކުވައިދޭ މުހިއްމު ރަމްޒެއް ކަމަށާއި ބަންޑާރަ މިސްކިތް ހުރި ހިސާބުގެ ގޮތުން މާލެ ސިޓީއަށް ޒިޔާރަތްކުރާ މީހުންގެ މެދުގައި ވެސް، އެ ބިނާ އަކީ ވަރަށް މަޤުބޫލު ތަނަކަށް ވެފައިވާ ކަމަށެވެ.

މޭޔަރު ވިދާޅުވީ ބަންޑާރަ މިސްކިތް ތަޅައިލުމަކީ، ރާއްޖޭގެ ތާރީޚީ ބިނާތަކާއި ޘަޤާފީ ތަރިކަ ރައްކާތެރިކުރުމުގެ ޤާނޫނާ ވެސް ޚިލާފު ކަމަކަށް ވާތީ، ސަރުކާރުގެ މި ނިންމުން ބަދަލުކުރުމަށް ގޮވައިލާ ކަމަށެވެ.

ފާހަގަކުރެވޭ ގޮތުގައި ގިނަ ބަޔަކު ދަނީ ބަންޑާރަ މިސްކިތް ތަޅާނުލައި، ހިމާޔަތްކުރުމަށް ގޮވާލަމުންނެވެ. އަދި "ސޭވް ބަންޑާރަ މިސްކިތް" ނަމުގައި ގިނަ ބަޔަކު ދަނީ ސޯޝަލް މީޑިއާ ކެމްޕެއިނެއް ވެސް ކުރަމުންނެވެ.

އެއާއެކު އިސްލާމިކް މިނިސްޓަރު މިރޭ ވިދާޅުވީ ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމެނާފަ އޮންނަ މިސްކިތެއްނޫން ކަމަށާއި އެހެންކަމުން އެތަނުގައި ބޮޑު މިސްކިތެއް ބިނާކުރަން ޤަސްތުކުރީ ކަމަށެވެ. މިނިސްޓަރު ވިދާޅުވީ އެ މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ، އެއާ އެއްގޮތަށް ކަމަށާއި އެހެންކަމުން އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުންވާ ކަމަށެވެ.