ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް

މާލޭގެ މަޖީދީ މަގުގައި ވަގުތީ މިސްކިތެއްގެ ގޮތުގައި ހުރި ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް ހަމަޖެހިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

މިނިސްޓަރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މާލޭގެ މަޖީދީ މަގުގައި ގިނަ ދުވަސްތަކެއްވަންދެން ވަގުތީ މިސްކިތެއްގެ ގޮތުގައި ހުރި ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް އެހީ ހަމަޖެހިފައިވާ ކަމަށެވެ. މިނިސްޓަރު ވިދާޅުވީ އެ މިސްކިތް އެޅުމަށްޓަކައި މި ރަމަޟާން މަހުގެ 27 ވިލޭރޭ މިސްކިތުގެ ބިންގާއެޅުމަށް އެހީދެއްވާ ފަރާތުން ވަނީ އެދިފައި ކަމަށާއި ރަމަޟާން މަސް ނިމިމުން ވަގުތީ މިސްކިތް ތަޅާލައި އައު މިސްކިތުގެ އަމަލީ މަސައްކަތް ފެށިގެންދާނެ ކަމަށެވެ.

މީގެ އިތުރުން މާލޭގެ ބަންޑާރަ މިސްކިތް ހުރިތަނުގައި ވެސް ޒަމާނީ ބޮޑު މިސްކިތެއް އެޅުމުގެ މަސައްކަތް ރަމަޟާން މަހުގެ ފަހުން ފެށިގެން ދާނެ ކަމަށް މިނިސްޓަރު މިއަދު ވަނީ ވިދާޅުވެފައެވެ. މިނިސްޓަރު ވިދާޅުވީ އެމިސްކިތް އެޅުމަށް ވެސް ދީލަތި ފަރާތަކުގެ އެހީ ހަމަޖެހިފައިވާ ކަމަށެވެ. އަދި މިއާއެކު މާލޭގެ ބޮޑެތި ހުރިހާ މިސްކިތެއް އައު ވެގެންދާނެ ކަމަށް މިނިސްޓަރު ވަނީ ވިދާޅުވެފައެވެ.